Read ewe Lododowo 11 Bible Online

Lododowo 11 - ewe bible

Lododowo 11

¹Nuɖanu amebatɔ enye ŋunyɔ na Yehowa; ke nudanu blibo dzea eŋu.

²Afisi dàda le la, afima ŋukpe hã le; ke amesiwo bɔbɔa wo ɖokui ɖe anyigba la, si me nunya le?

³Fɔmaɖi enye nuteƒewɔlawo kplɔla; ke alakpa tsrɔ̃a ame mawɔnuteƒewo.

⁴Kesinɔnu menye viɖea ɖeke le dzikudogbe o; ke dzɔdzɔenyenye ɖea ame tsoa ku me.

⁵Ame maɖifɔ ƒe dzɔdzɔenyenye taa mɔ na; ke ame vɔ̃ɖi ƒe vɔ̃wɔwɔ tsɔnɛ ƒua anyi.

⁶Nuteƒewɔlawo ƒe dzɔdzɔenyenye ɖea wo; ke ame mawɔnuteƒewo ŋutɔ ƒe dzodzro wotsɔna léa woa.

⁷Ne ame vɔ̃ɖi la ku la, ekema eƒe mɔkpɔkpɔ nu yi, eye ame vlowo ƒe lala zu ya.

⁸Woɖea ame dzɔdzɔe tsoa hiã me, eye ame vɔ̃ɖi xɔna ɖe eteƒe.

⁹Yakamewo ƒe nuƒoƒo tsrɔ̃a wo haviwo; ke nunya wotsɔna ɖea ame dzɔdzɔewoe.

¹⁰Ne enyo na ame dzɔdzɔewo la, ɖu kpɔa dzidzɔ; eye ne ame vɔ̃ɖiwo tsrɔ̃ la, aseye ɖina.

¹¹Nuteƒewɔlawo ƒe yayra nana ɖu ƒe ŋkɔ ɖea dzi; ke ame vɔ̃ɖiwo ƒe nu nana wogbãnɛ ƒua anyi.

¹²Ame manyanu doa vlo ehavi; ke ame nyanu zia kpi.

¹³Amegɔmezɔla nua go nya ɣaɣla, ke nyateƒetɔ ɣlaa nya.

¹⁴Ne kplɔla meli o la, dukɔ yia to, ke ɖeɖe toa adaŋudela geɖewo dzi.

¹⁵Amesi ƒu asi akɔ de ame bubu nu la, eme menyo nɛ o; ke amesi gbe fenuléle la, anɔ dedie.

¹⁶Nyɔnu nyodɔme ƒe asi sua bubu dzi; ke ŋutasẽlawo ƒe asi sua kesinɔnu ko dzi.

¹⁷Dɔmenyotɔ woa nyuie na eya ŋutɔ ɖokui; ke ŋutasẽla wɔa nu vevee eya ŋutɔ ƒe ŋutilã.

¹⁸Ame vɔ̃ɖi kpɔa viɖe ƒuƒlu; ke amesi ƒãa dzɔdzɔenyenye la, akpɔ fetu vavã.

¹⁹Dzɔdzɔenyenye vavã hea agbe ve; ke vɔ̃ɖiyometiti hea ku vɛ.

²⁰Amesiwo si alakpadzi le la, ŋunyɔ wònye na Yehowa; ke amesiwo fɔɖiɖi mele woƒe zɔzɔme ŋu o la, ƒe nu nyea eŋu.

²¹Mina míatso gbe, ne woahagbe tohehe na ame vɔ̃ɖi fi! Ke woade ame dzɔdzɔe ƒe ƒome ya.

²²Nyanu dzetugbee, si nye avɔ la, le abe aƒeha, si sikagɛ le ŋɔti me na ene.

²³Ame dzɔdzɔewo ƒe didi enye dzɔgbenyuie ɖeɖe sɔŋ; ke ame vɔ̃ɖiwo ƒe mɔkpɔkpɔ enye dziku.

²⁴Amea ɖewo na nu geɖe, ke wokpɔa ho ɖe edzi; amea ɖewo vea nu le nusi dze be, woawɔ la gbɔ, ke ahe ko wodana.

²⁵Woaɖi ƒo na luʋɔ dɔmenyotɔ la taŋ, eye woana tsi amesi na tsi wono.

²⁶Amesi mia asi ɖe bli dzi la, amewo aɖo ɖiŋu nɛ, ke yayra ava blidzrala ƒe ta dzi.

²⁷Ani esi ti nyuie yome la, eƒe nu adze ame ŋu; ke amesi di vɔ̃ la, ado goe.

²⁸Amesi ɖo ŋu ɖe eƒe kesinɔnu ŋu la, adze anyi; ke ame dzɔdzɔewo ade ama abe aŋgba ene.

²⁹Amesi gblẽ eƒe aƒe la, aɖu aya; eye bometsila azu dɔla na nunyala.

³⁰Ame dzɔdzɔe ƒe kutsetse enye agbeti, eye nunyala xɔa dziwo na eɖokui.

³¹Kpɔ ɖa, woɖoa eteƒe na ame dzɔdzɔe ke hã le anyigba dzi, ʋuu keke wòayi ame vɔ̃ɖiwo kple nuvɔ̃wɔlawo nye gea?