Read ewe Lododowo 14 Bible Online

Lododowo 14 - ewe bible

Lododowo 14

¹Nyɔnuwo ƒe nunya tua woƒe xɔ; ke bometsitsi tsɔa eya ŋutɔ ƒe asi gbãnɛ ƒua anyi.

²Amesi vɔ̃a Yehowa la, toa mɔ dzɔdzɔe dzi; ke amesi toa mɔ gɔglɔ̃ dzi la, doa vloe.

³Bometsila ƒe nu enye ameƒoti hena eƒe dàda; ke nunyalawo ƒe nuyi kpoa wo dzi.

⁴Ne nyiwo meli o la, lãto me ɖia ƒuƒlu; ke nyitsu ƒe ŋusẽ wotsɔna kpɔa agblemenu geɖe.

⁵Ɖasefo nyateƒetɔ mekaa aʋatso o; ke aʋatsoɖasefo daa alakpa.

⁶Fewuɖula le nunya dim ʋuu do kpoa; ke sidzedze le bɔbɔe na nugɔmeselawo.

⁷Te ɖa le bometsila gbɔ, elabena mèdzea si gɔmesese ƒe nuyiwo o.

⁸Nunyalawo ƒe ayedzedze enye be, woalé ŋku ɖe woƒe zɔzɔme ŋu; ke bometsilawo ƒe bometsitsi enye alakpa.

⁹Avulévɔsa le alɔme ɖem le bometsilawo ŋu; ke ŋudzedze kpɔkpɔ le nuteƒewɔlawo dome.

¹⁰Dzi nya eya ŋutɔ ƒe nuxaxa, eye ame tutɔ mate ŋu akpɔ dzidzɔ ɖee ti o.

¹¹Ame vɔ̃ɖiwo ƒe aƒe agblẽ, ke nuteƒewɔlawo ƒe agbadɔ ade ama.

¹²Amea ɖewo ƒe mɔ dzɔ le wo ŋku me; ke eƒe nuwuwu enye ku ƒe mɔ.

¹³Veve le dzi me wotoa egbɔ koa nu; ke dzidzɔ sia ƒe nuwuwu nyea nuxaxa.

¹⁴Tosẽla ƒe zɔzɔme ɖia ƒo nɛ, nenema enye ame nyui ƒe nuwɔwɔ hã.

¹⁵Amebebewu xɔa nya sia nya dzi sena; ke nunyala léa ŋku ɖè eƒe afɔɖeɖe ŋu.

¹⁶Nunyala vɔ̃na, eye wòtsria vɔ̃; ke bometsila nyrãna, eye wòɖoa dzi ɖe eɖokui ŋu.

¹⁷Dɔmedzoetɔ wɔa bometsinu; woalé fu amesi ɖoa aye ɖe tame

¹⁸Amebebewuwo tae nye bometsitsi, ke nunyalawo vaa sidzedze goŋgoŋ.

¹⁹Ame vɔ̃ɖilɔwo abɔbɔ na ame nyuiwo, eye nuvɔ̃wɔlawo anɔ ame dzɔdzɔewo ƒe agbo nu.

²⁰Ame dahe ƒe hatiwo ke hã léa fui; ke xɔlɔ̃ bɔ ɖe kesinɔtɔ si.

²¹Amesi doa vlo ehavi la, ewɔ nuvɔ̃; ke amesi vea hiãtɔ nu la, woayrae!

²²Ɖe amesiwo ɖoa vɔ̃ ɖe tame la, metrana oa? Ke amenuveve kple nyateƒe vana na amesiwo ɖoa nyuie ɖe tame.

²³Agbagbadzedze hea viɖe ve; ke nu kpoloe ƒoƒo hea hiã vɛ.

²⁴Nunyalawo ƒe kesinɔnu enye fiakuku; ke bometsilawo ƒe bometsitsi la, bometsitsi ko wònye.

²⁵Ɖasefo nyateƒetɔ enye amexɔla ɖe agbe; ke aʋatsoɖasefo enye alakpatɔ!

²⁶Dzideƒo vevi le Yehowa-vɔvɔ̃ me, eye sitsoƒe wònye na viawo.

²⁷Yehowa-vɔvɔ enye agbevudo, ne woaƒo asa na ku ƒe mɔ̃.

²⁸Fia ƒe atsyɔ̃ le dukɔ ƒe agbɔsɔsɔ me; ke ne amewo zu ʋee la, ekema amegãɖuɖu yi to.

²⁹Dzigbɔɖitɔ la, nunya geɖe le esi; ke dɔmedzoetɔ ɖoa boblo bometsitsi.

³⁰Dzi nyodɔme enye agbe le lã me; ke ŋuʋaʋã enye ŋuɖui le ƒuwo me.

³¹Amesi te ame tsa ɖe anyi la, ɖea alɔme le ewɔla ŋu; ke amesi vea ame dahe nu la, ɖea bubu eŋu.

³²Woatsɔ ame vɔ̃ɖi ƒe vɔ̃wɔwɔ atutui aƒu anyi; ke ame dzɔdzɔe la akpɔ sitsoƒe le eƒe ku me.

³³Nunya le nugɔmeselawo ƒe dzi me, eye wòɖea eɖokui fiana le bometsilawo dome.

³⁴Dzɔdzɔenyenye ɖoa dukɔ ɖe dzi; ke nuvɔ̃ enye anyigbadzitɔwo ƒe ahɔhlɔ̃bɔbɔ.

³⁵Dɔla nyanu ƒe nu anye fia ŋu; ke ado dziku ɖe esi wɔa ŋukpenanu la ŋu.