Read ewe Lododowo 17 Bible Online

Lododowo 17 - ewe bible

Lododowo 17

¹Abolo ƒuƒlu ɖuɖu, si me dzidzeme le, nyo wu aƒe, si me yɔ fũ kple akpedavɔsa, eye dzre kpe ɖe eŋu.

²Kluvi nyanu aɖu amegã ɖe aƒevi ŋukpenanuwɔla dzi, eye eya kple nɔviawo anyi dome.

³Sonu li de klosalo ŋu, eye kpo li ɖe sika ŋu; ke Yehowa doa dziwo kpɔna.

⁴Vɔ̃ɖitɔ léa to ɖe alakpanuyiwo ŋu, eye aʋatsokala ƒua to anyi ɖe gbegblẽ ƒe aɖe ŋu.

⁵Amesi ɖea alɔme le ahetɔ ŋu la, edoa vlo ewɔla; amesi kpoa dzidzɔ le dzɔgbevɔ̃e ŋu la, womagbe tohehe nɛ o.

⁶Amegã ɖeɖi ƒe fiakuku enye viawo ƒe viwo, eye viwo ƒe atsyɔ̃ enye wo fofowo.

⁷Nyagãgbɔgbɔ medze bometsila o, ʋuu keke aʋatsokaka nahayi bubume dze ge o.

⁸Zãnuxɔla bu be, kpe xɔasi wonye yexɔ; afisiafi, si wòtrɔ ɖo la, edzea aye.

⁹Amesi ɖia dziɖaɖa ɖe to me la, ele lɔlɔ̃ dim, ke amesi hea nya xoxo ɖe go la, klãa xɔlɔ̃wo dome.

¹⁰Nyaheɖeameŋu dea tame na nugɔmeselawo wu na woƒe bometsilawo zi alafa.

¹¹Aglãdzela dia vɔ̃ɖiwɔwɔ yome; nyala woaɖɔ dɔla sɔ̃ŋuta ɖe eŋu.

¹²Gododo sisiblisinɔ, si ŋu woɖe viwo le la, nyo wu gododo bometsila le eƒe bometsitsi me.

¹³Amesi tsa vɔ̃ ɖo nyui teƒe la, dzɔgbevɔ̃e mate ɖa le eƒe me o.

¹⁴Dzregɔmetoto le, abe alesi woŋɔa tɔe ene; eyata dzudzɔ, hafi ne wòava do gã.

¹⁵Amesi tso afia nyui na ame vɔ̃ɖi kple amesi bu fɔ ame dzɔdzɔe la, ŋunyɔ woa kple eve la siaa wonye na Yehowa.

¹⁶Nukata bometsila lé ga ɖe asi be, yeaƒle nunyae, evɔ tagbɔ mele esi o ɖe!

¹⁷Xɔlɔ lɔ̃a ame ɣesiaɣi, eye wòtrɔna dzɔa ame nɔvi le hiã me.

¹⁸Amesi Iéa fe nu, eye wòƒua asi akɔ ɖe ehavi nu la, ame manyanue.

¹⁹Amesi laa dzidada la, ele dzre lɔ̃m; amesi ɖea eƒe agbo wòkɔna tsrala la, ele gbegblẽ dim.

²⁰Amesi si alakpadzi le la, makpɔ nu nyuia ɖeke o, eye amesi ƒe aɖe medoa mɔ ɖeka o la, age ɖe dzɔgbevɔ̃e me.

²¹Amesi dzi bometsila la, akpa nuxaxa, eye bometsila toto makpa dzidzɔ o.

²²Dzi kpɔdzidzɔ nana lãme hayana, ke gbɔgbɔ xanu nana ƒuwo ƒuna kplakplakpla.

²³Ame vɔ̃ɖi xɔa zãnu tsoa akɔnu, ne yeaglɔ̃ nya dzɔdzɔe ƒe mɔ.

²⁴Nunya le nugɔmesela ŋku me; ke bometsila ƒe ŋku le anyigba ƒe mlɔenu ke.

²⁵Vi tsibome enye dziku na fofoa kple nuxaxa na dada.

²⁶Tohehe na ame dzɔdzɔewo menyo o, ʋuu keke wòahayi bubume, siwo wɔa nuteƒe la, ƒoƒo nye ge o.

²⁷Amesi mekea nu kplakplakpla o la, sidzedze le esi, eye ame ɖɔŋuɖo enye nugɔmesela.

²⁸Ne bometsila zi kpi la, wohunɛ nunyalae, ne emiã eƒe nuyiwo la, wohunɛ nugɔmeselae.