Read ewe Lododowo 21 Bible Online

Lododowo 21 - ewe bible

Lododowo 21

¹Fia ƒe dzi le abe tɔʋu ene le Yehowa si me; afisi wòlɔ̃ la, eya wòkplɔnɛ yinae.

²Ŋutsu be mɔwo katã dzɔ le eŋku me; ke Yehowa ye daa dziwo kpɔna.

³Nusi dzɔ, eye wòle eteƒe la, wɔwɔ nyo Yehowa ŋu wu vɔsa.

⁴Ame vɔɖiwo ƒe akaɖi enye nuvɔ̃, dadaŋkuwo kple dzi, si vu gblotoo.

⁵Veviedola ƒe tameɖoɖo hea viɖe vɛ; ke amesi tsi klokloklo la, dea hiã aƒe.

⁶Alakpaɖe tsɔtsɔ kpɔ kesinɔnui enye ƒuƒu, si nu yina, ku ƒe mɔ̃ wònye.

⁷Ame vɔ̃ɖiwo ƒe sesẽnuwɔwɔ tsrɔ̃a wo; elabena wogbea nusi dzɔ la wɔwɔ.

⁸Ŋutsu fɔɖila ƒe mɔ gɔdɔ; ke ame dzadzɛ la ƒe nuwɔwɔ toe mɔ ɖeka.

⁹Enyo, ne woanɔ dzogoe dzi le xɔta wu nyɔnu nyawɔla nana aƒe me kple ame.

¹⁰Ame vɔ̃ɖi ƒe luʋɔ le vɔ̃ yome dim, ehavi ƒe nu mewɔa nublanui nɛ o.

¹¹Ne wohe to na fewuɖula la, ekema amebebewu dzea nunya; ke ne wofia nu nunyala la, edzea si nu.

¹²Dzɔdzɔetɔ la ɖea ŋku ɖe ame vɔ̃ɖi ƒe aƒe ŋu, eye wòkplɔa gbegblẽ ƒua ame vɔ̃ɖiwo.

¹³Amesi xe nu to me ɖe ame dahewo ƒe ɣlidodo la, eya hã ado ɣli, eye womesea o.

¹⁴Adzamenunana faa dɔmedzoe nu, eye zãnunana, si wohe ɖe akɔnu vɛ la, laa adãwɔwɔ nu.

¹⁵Nu dzɔdzɔe wɔwɔ enye dzidzɔ na ame dzɔdzɔe; ke enye ŋɔdzi na nu madzɔmadzɔ wɔlawo.

¹⁶Amesi tra tso gɔmesese ƒe mɔ dzi la, agbɔ ɖe eme le ŋɔliwo ƒe takpeƒe.

¹⁷Amesi lɔ̃a dzidzɔkpɔkpɔ la, azu hiãtɔ; eye amesi lɔ̃a wein kple ami ʋeʋẽe la, makpa ho o.

¹⁸Ame vɔ̃ɖi enye avulénu ɖe ame dzɔdzɔe nu, eye ame mawɔnuteƒewo xɔna de nuteƒewɔla teƒe.

¹⁹Gbedadaƒonɔnɔ nyo wu nyɔnu nyawɔla kple dzikutɔ gbɔ nɔnɔ.

²⁰Nu xɔasiwo kple ami le nunya ƒe me, ke bometsila tsɔa wo doa dzodzoe.

²¹Amesi ti dzɔdzɔenywnye kple lɔlɔ̃ yome la, eƒe asi atu agbe, dzɔdzɔenyenye kple bubu.

²²Nunyala ha kalẽtɔwo ƒe du, eye wòmũa woƒe kpoƒuƒu, si ŋu wole dzi ɖom do la, ƒua anyi.

²³Amesi dzraa eƒe nu kple aɖe ɖo la, dzraa eƒe agbe ɖo tso hiã me.

²⁴Dadala kple adegbeƒola, si wɔa nu tovo vivivo la, woyɔna be fewuɖula.

²⁵Kuviatɔ ƒe nudzodzro wunɛ, elabena eƒe asi gbe dɔwɔwɔ.

²⁶Wole nu dim gbawotsyogbe; ke ame dzɔdzɔe la naa nu, eye metea ame o.

²⁷Ŋunyɔ enye ame vɔ̃ɖi ƒe vɔsa, aleke wòahanɔ, nenye ŋukpenanuwɔwɔ ta wohee vɛ ɖo?

²⁸Aʋatsoɖasefo atsrɔ̃; ke amesi se nya kple to la, aƒo nu ɣesiaɣi.

²⁹Ame vɔ̃ɖi ɖoa mo vloe; ke nuteƒewɔla léa ŋku ɖe eƒe zɔzɔme ŋu.

³⁰Nunya kple gɔmesese kpakple aɖaŋuɖoɖoa ɖeke meli ɖe Yehowa ŋu o.

³¹Woblaa akpa na sɔ ɖe aʋawɔgbe ŋu, ke Yehowa si mee dziɖuɖu le.