Read ewe Lododowo 24 Bible Online

Lododowo 24 - ewe bible

Lododowo 24

¹Megaʋã ŋu ame vɔ̃ɖiwo o, eye megadzro wò, be naɖe ha kpli wo o;

²elabena wole gbegblẽ bum le dzi me, eye woƒe nuyiwo gblɔa dzɔgbevɔ̃e.

³Nunya wotsɔna tua xɔe, gɔmesese wotsɔna lia kee,

⁴eye sidzedze wotɔna dea kesinɔnu nyui vovovowo woƒe xɔwo me taŋtaŋ.

⁵Ŋutsu nyanu sesẽna, eye ŋutsu nugɔmesela ɖea ŋusẽ fiana.

⁶Elabena tamebubu natsɔ awɔ aʋae, eye adaŋudela geɖewo hea dziɖuɖu vanɛ.

⁷Nunya enye gbloti xɔasi na bometsila, eyata mekea nu le ʋɔnu o.

⁸Amesi ɖoa vɔ̃ be, yeawɔ la, eya woyɔna be ame vɔ.

⁹Bometsila ƒe tameɖoɖo enye nuvɔ̃, eye fewuɖula enye ŋunyɔ na amegbetɔwo.

¹⁰Ne ègbɔdzɔ le xaxaɣi la, ekema ŋusẽ boo mele ŋuwò o.

¹¹Xɔ na amesiwo wokplɔ yina wuwu ge, eye ɖe amesiwo woyina nu ɖa gee la.

¹²Ne ègblɔ be: „Míenyae o“ la, kpɔ ɖa, amesi da dziwo kpɔna la, adze sii, eye amesi ɖea ŋku ɖe wò luʋɔ la, anyae, eye wòaɖo eteƒe na amegbetɔ le eƒe nuwɔwɔ nu.

¹³Vinye, no anyitsi, elabena enye, eye anyixe avivi le wò ve me.

¹⁴Nenema ke srɔ̃ nunya na wò luʋɔ, eye ne wò asi tui la, ekema ŋkeke li gbɔna na wò, eye wò mɔkpɔkpɔ mazu dzodzro o.

¹⁵Wò ame vɔ̃ɖi, megade xa ɖe ame dzɔdzɔe ƒe nɔƒe ŋu o; megagblẽ eɖɔƒe o.

¹⁶Elabena ame dzɔdzɔe dzea enyi zi adre, eye wògafɔna; ke ame vɔ̃ɖiwo dzea dzɔgbevɔ̃e me.

¹⁷Ne wò futɔ dze enyi la, dzi megadzɔ wò o, eye ne ekli nu la, wò dzi megatso aseye o,

¹⁸bena ne Yehowa nakpɔe, medze eŋu o, eye wòaklo eƒe dɔmedzoe ɖa le eŋu o.

¹⁹Dzi megaku wò ɖe eme vlowo ŋu o, eye megaʋã ŋu ame vɔ̃ɖiwo o,

²⁰elabena ŋu nyui kegbe meli na ame vlowo o, eye ame vɔ̃ɖiwo ƒe akaɖi atsi.

²¹Vinye, vɔ Yehowa kple fia la, eye megado ka kple godzelawo o;

²²elabena woƒe gbegblẽ aƒo ɖi kpo yi, eye ameka nya woa kple eve la ƒe dzɔgbevɔ̃e?

²³Nya siawo hã tso nunyalawo gbɔ. Ame dzi dede le ʋɔnudɔdrɔ̃ me menyo o.

²⁴Amesi gblɔna na fɔɖila be: „Tɔwò dzɔ“ la, dukɔwo aƒo fi adee, eye anyigbadzitɔwo ado ɖiŋu nɛ.

²⁵Ke amesiwo hea to la, yayra ava wo dzi fu.

²⁶Amesi doa nya ŋu tututu la ƒe nuyi wiogbugbɔna.

²⁷Wɔ wò dɔwo le xexe, eye nade wò agble, emegbe hafi natu xɔ.

²⁸Meganye ɖasefo de nɔviwò ŋu dzodzro o, eye megatsɔ wò nuyiwo da alakpae o.

²⁹Megagblɔ be; „Alesi wòwɔm la, nenema mawɔe, eye made eteƒe na ame le eƒe nuwɔwɔ nu“ o!

³⁰Mele kuviatɔ ƒe agble kple ame manyanu ƒe weingble ŋu yi.

³¹Eye kpɔ ɖa aŋɔka yɔ eme taŋ, gbe to ɖe eme, eye eƒe kpegliwo mũ.

³²Tete meɖe ŋku ɖee, eye wòde dzi gbɔ nam, mekpɔe, eye wòzu nuxaxlɔ̃ nam:

³³„Madɔ alɔ̃ vie, madɔ akɔlɔ̃e vie, made asi asitɛ me, ne magbɔ ɖe eme“ la,

³⁴ahedada ɖe wòƒona ɖe ame dzi abe mɔzɔla ene, eye hiã abe ŋutsu, si bla akpa ene.