Read ewe Lododowo 27 Bible Online

Lododowo 27 - ewe bible

Lododowo 27

¹Megaƒo adegbe ɖe etsɔ, si gbɔna ŋu o, elabena mènya nuka dzi ge etsɔ ala o.

²Ame bubu nekafu wò, eye menye wò ŋutɔ wò nu o, ame tutɔ, eye menye wò nuyiwo o.

³Kpe la, nu kpekpee, eye ke la, agbae; ke bometsila ƒe dziku kpena wu wo ame eve la.

⁴Dziku la, nu nyayrãe, eye dɔmedzoe dzea agbo; ke ameka ale ŋu anɔ te ɖe ŋuʋaʋã nu?

⁵Mokaka ɖe mo na ame kaŋ enyo wu amelɔlɔ̃ le adza me.

⁶Xɔlɔ̃ ƒe abidede ame ŋu medze vɔ̃ o; ke ketɔwo ƒe nugbugbɔ sɔ gbɔ ŋutɔ!

⁷Ƒoɖilae zɔa anyitsi me, ke dɔwuitɔ la nu vevewo katã vivia enu.

⁸Ŋutsu, si si tso wo de la, le abe xevi, si si tso eƒe atɔ me ene.

⁹Ami kple dzudzɔ ʋeʋẽe donu doa dzidzɔ na dzi; xɔlɔ̃ ƒe nya vivi nyo wu ame ŋutɔ ƒe aɖaŋuɖoɖo.

¹⁰Megagblẽ xɔ̃wò kple fofowò xɔlɔ̃ ɖi o; gbesigbe hiã tu wò la, megade nɔviwò ƒe me o; aƒelika, si te ɖe ame ŋu, nyo wu ame nɔvi le adzɔge.

¹¹Vinye, dze nunya, be nado dzidzɔ na nye dzi, ne mate ŋu aɖo nya ŋu na amesiwo le alɔme ɖem le ŋunye.

¹²Ne nunyala kpɔ dzɔgbevɔ̃e la, eɣlaa eɖokui; ke ame bebewuwo dea ta eme, eye wòle na wo be, woakpɔ wo tɔnua.

¹³Ɖe avɔ le eŋu, elabena eƒu asi akɔ ɖe ame bubu nu, eye natsɔe aɖo awɔba le ame tutɔ ta.

¹⁴Amesi yra ehavi ŋdi kanya asi madetsimee kple ɣli la, woabui fiƒoɖe nɛ.

¹⁵Betrɔ, si nɔa ɖuɖu dzi ɖaa, ne tsi ga le dzadzam la, kple nyɔnu nyawɔla wosɔ;

¹⁶amesi be, yeatsi enu la, ya nu wòbe, yeatsi, eye ɖe wòbe, yeatsɔ yeƒe nuɖusi aku amii.

¹⁷Alesi wotsɔa ga nyrea gae la, nenema ame nyrea nɔviae.

¹⁸Amesi kpɔa eƒe gboti dzi la, aɖu eƒe kutsetse; nenema ke amesi dzɔa eƒe aƒetɔ ŋu la, woade bubu eŋu.

¹⁹Alesi ŋku me ɖla ŋku me le tsi mee la, nenema amegbetɔ ƒe dzi sɔna ɖe amegbetɔ tɔ ŋui.

²⁰Tsieƒe kple aʋli me maɖi ƒo akpɔ o; nenema amegbetɔ ƒe ŋku hã maɖi ƒoe o.

²¹Sonu ɖe klosalo ŋu, eye kpo ɖe sika ŋu, nenema ŋutsu le ɖe eƒe ŋkɔxɔxɔ ŋui.

²²Ne èɖe bometsila kple bli to me hetsɔ tati toe la, eƒe bometsitsi mado le eŋu akpɔ o ɖe!

²³Wò alẽwo ƒe nɔnɔme nenɔ nyanya na wò, eye lé ŋku ɖe wò lãhawo ŋu;

²⁴elabena kesinɔnu menɔa anyi ɖaa o, alo ɖe fiakuku noa anyi na dzidzimeawo katãa?

²⁵Ne gbe megali o, eye gbe fewo to, eye woƒo gbe nu ƒu le towo dzi la,

²⁶ekema alẽviwo nye avɔ na wò, eye gbɔ̃tsuwo nye ho natsɔ aƒle agblee;

²⁷gbɔ̃notsi sɔ gbɔ na wò nuɖuɖu kple aƒewòmetɔwo ƒe nuɖuɖu kpakple wo dɔlanyɔnuwo ƒe nunyiame.