Read ewe Lododowo 28 Bible Online

Lododowo 28 - ewe bible

Lododowo 28

¹Amea ɖeke menyãa ame vɔ̃ɖiwo ɖe nu, hafi wosina o; ke ame dzɔdzɔewo ɖea dzi ɖi abe dzatavi ene.

²Anyigbadzitɔwo ƒe vodadawo nana emegãwo sɔ gbɔna, eye to nugɔmesela nyanu ɖeka dzi nu dzɔdzɔe wɔwɔ nɔa anyi dedie.

³Amegã, si te ame dahewo de anyi la, le ahe tsidzadza, si de anyigba, eye mehe nuɖuɖu vɛ o ene.

⁴Amesiwo ɖe asi le se la ŋu la, kafua ame vɔ̃ɖiwo, ke amesiwo dzraa se ɖo la, dzea agbo ɖe wo ŋu.

⁵Nu vɔ̃ɖi wɔlawo mesea nu dzɔdzɔe wɔwɔ gɔme o, ke amesiwo dia Yehowa la, sea nuwo katã gɔme.

⁶Ame dahe, si fɔɖiɖi mele eƒe zɔzɔme ŋu o la, nyo wu kesinɔtɔ, si zɔa mɔ gɔglɔ̃ dzi.

⁷Amesi dzraa se ɖo la, vi nyanue; ke amesi tsoa nutsuɖuɖu ɖoa dɔe la, dea ŋukpe fofoa ŋu.

⁸Amesi lsɔa demexɔxɔ kple kasaɖiɖi dzia eƒe kesinɔnuwo ɖe edzii la, ele nu tum ɖo na amesi vea eme dahewo nu.

⁹Amesi ɖe to ɖa, be yemase se o la, eƒe gbedodoɖa ke hã nye ŋunyɔ.

¹⁰Amesi ble nuteƒewɔlawo yi mɔ vɔ̃ɖi dzi la, eya ŋutɔ age adze eƒe ɖo me; ke fɔmaɖilawo anyi nu nyui ƒe dome.

¹¹Kesinɔtɔ bua eɖokui nunyalae; ke ame dahe nugɔmesela le egɔme kpɔm.

¹²Ne ame dzɔdzɔewo le aseye tsom la, atsyɔ̃ɖoɖo teƒe mekɔna o; ke ne ame vɔ̃ɖiwo ƒe alɔ de dzi la, amewo kpɔkpɔ nyea dɔ.

¹³Amesi tsɔ nu tsyɔ eƒe vodada dzi la, madze edzi nɛ o; ke amesi ʋu eme, eye wòdzudzɔe la, woave enu.

¹⁴Woayra ŋutsu, si le vɔvɔ̃ dzi daa, ke amesi sẽ eƒe dzi me goŋgoŋ la, adze dzɔgbevɔ̃e me.

¹⁵Ame vɔ̃ɖi si le dukɔ dahe dzi ɖum la, le abe dzata ɖegbe kple sisiblisi dɔwui ene.

¹⁶Amegã, si ɖo ko le gɔmesese me la, ameteteɖeanyi bɔ ɖe esi; amesi lé fu amebaba la, anɔ agbe didie.

¹⁷Amesi dzi hlɔ̃fe le, ne esi vaseɖe aʋli me ke hã, amea ɖeke megalée o!

¹⁸Amesi fɔɖiɖi mele eƒe zɔzɔme ŋu o la, woakpe ɖe eŋu; ke amesi toa mɔ gɔglɔ̃ dzi la, adze anyi zi ɖeka

¹⁹Amesi ɖe eƒe agble la, nuɖuɖu abɔ ɖe esi; ke amesi ti yakanuwo yome la, ahedada ado gã ɖe edzi.

²⁰Woayra nuteƒewɔla geɖe; ke amesi tsi klokloklo ɖe hokpɔkpɔ ŋu la, womagbe tohehe nɛ o.

²¹Amedzidede menyo o, abolo kakɛ pɛ hã ana ame dada vo.

²²Ŋubiala le yɔyɔm ɖe kesinɔnu ŋu; ke menyae be, hiã le ye dzi va ge o.

²³Amesi ka mo na ame la, axɔ akpe emegbe wu amesi ɖe ami ɖe eƒe aɖe.

²⁴Amesi da adzo fofoa kple ɖaɖaa hegblɔ be: Menye nuvɔ̃a ɖeke o la! nugblẽlawo ƒe hati wònye.

²⁵Ŋubiala ɖɔa dzre, ke amesi ɖoa dzi ɖe Yehowa ŋu la, woaɖi ƒo nɛ taŋ.

²⁶Amesi ɖoa dzi ɖe eya ŋutɔ ƒe gɔmesese ŋu la, bometsilae; ke amesi zɔna le nunya me la, woaɖee.

²⁷Amesi naa nu ame dahe la, hiã matui akpɔ o, ke amesi trɔa mo ɖe aga la, woaɖo ɖiŋu geɖe nɛ.

²⁸Ne ame vɔ̃ɖiwo ƒe alɔ ɖe dzi la, amewo ɣlaa wo ɖokui; ke ne wotsrɔ̃ la, ame dzɔdzɔewo dzina ɖe dzi.