Read ewe Hawo ƒe ha 4 Bible Online

Hawo ƒe ha 4 - ewe bible

Hawo ƒe ha 4

¹Èdze tugbe, xɔ̃nye, èdze tugbe ŋutɔ. Wò ŋkuwo nye ahɔne ƒe ŋkuwo le moxevɔ la me. Wò ɖa le abe gbɔ̃hawoe tsyɔ akɔ anyi de Gilead-to kɔgo ene.

²Wò aɖuwo le abe alẽha, si woke tu na tete, eye wodo tso tsileƒe la ene; wo katã wonye venɔwo, eye wo dometɔa ɖeke metsi ko o.

³Wò nuyiwo le abe ka dzẽ ene, eye wò nu dze ani; wò tonuƒuiwo le dzedzem le moxevɔ me abe yevuboɖa, si me wole ene.

⁴Wò ka le abe Dawid ƒe xɔ tsrala, si wotu bena gbetakpɔkpɔ ene Woku akpoxɔnu gagã akpe de eŋu, siwo katã nye kalẽtɔwo ƒe akpoxɔnuwo.

⁵Wò nowo le abe sãdevi eve, zi venɔvi, siwo le gbe ɖum le dzogbenyawo me ene.

⁶Mayi atike ʋeʋẽe towo kple dzudzɔ ʋeʋẽe donu togbɛwo dzi, hafi anyinu nafa, eye vɔvɔli nu nayi.

⁷Xɔ̃nye, nusianu nyo le ŋuwò, dzuƒea ɖeke mele ŋuwò o.

⁸Ɖi kplim tso Libanon dzi, ŋugbetɔ, ɖi kplim tso Libanon dzi! Zɔ tso Amana ta me, tso Senir kple Xermon ta me, tso dzatawo nɔƒe kple lãkletowo dzi.

⁹Nɔvinyenyɔnu, nye ŋugbetɔ, ègblẽ tame nam, ètsɔ wò nukpɔkpɔ kple kɔsɔkɔsɔ, si le wò kɔdzonuwo me, gblẽ tame nam.

¹⁰Nɔyinyenyɔnu, nye ŋugbetɔ, wò lɔlɔ̃ vivina loo! Wò lɔlɔ̃ nyo wu wein, eye wo ami ƒe ʋeʋẽ ƒo atike ʋeʋẽewo la.

¹¹Ŋugbetɔ, anyitsi le tsyɔtsyɔm le nuyi ŋu na wò; anyitsi kple notsi le wò aɖe te; wò avɔwo me ƒe ʋeʋẽ le abe Libanon ƒe ʋeʋẽ ene.

¹²Nɔvinyenyɔnu, nye ŋugbetɔ enye abɔ, si ƒe ʋɔ wodo, vudo, si nu wotu nu do, kple tsidzɔƒe, si nu wotre.

¹³Wò numiemiewo nye yevuboɖabɔ, si me kutsetse nyuiwo, koferseƒoƒo kple gbe ʋeʋẽewo,

¹⁴gbe ʋeʋẽewo kple agumetaku, gbekee, botsyo kple dzudzɔ ʋeʋẽe dogbewo katã, mire kple aloe kpakple atike veviwo katã te.

¹⁵Abɔ me tsidzidzi, tsi gbagbe vudo kple tɔʋu, si si tso Libanon dzi la nènye.

¹⁶Anyieheya, tso, eye dzieheya, va, naƒo ato nye abɔ me, ne eƒe ʋeʋẽ nagbagba di.

¹⁷Nye lɔlɔ̃tɔ va eƒe abɔ me, eye wòɖu eƒe kutsetse nyuiawo.