Read ewe Yesaya 13 Bible Online

Yesaya 13 - ewe bible

Yesaya 13

¹Nya, si Yesaya, Amoz vi la, kpɔ ɖe Babel ŋu enye si:

²Mitu aflaga ɖe to ƒeƒle la ta me, mido ɣli yɔ wo, mimiã asi wo, ne woage ɖe amegãwo ƒe du la me!

³Medɔ nye ame kɔkɔewo, meyɔ nye kalẽtɔwo, nye aseyetsolawo kple adegbeƒolawo ɖe nye dɔmedzoe la ŋu.

⁴Miƒu to anyi, zi le ɖiɖim le towo dzi abe dukɔ geɖewo tɔ ene; fiaɖuƒewo kple anyigba dzi dukɔ, siwo kpe ta la ƒe howɔwɔ le ɖiɖim. Yehowa Zebaot le aʋakɔwo xlẽm!

⁵Wotso anyigba didi dzi, tso dziƒo ƒe mlɔenu, Yehowa kple eƒe dziku ƒe dɔwɔnuwo, ne woagblẽ anyigba blibo la.

⁶Mifa avi, elabena Yehowa ƒe ŋkeke la tu aƒe, egbɔna abe ŋusẽkatãtɔ ƒe nugbegblẽ ene.

⁷Eyata asiwò katã ado agblɔ, eye amegbetɔwo ƒe dziwo katã alólo gbanaa.

⁸Dzidzi ƒo wo, nutsoame kple veve lé wo, eye wole ku lém abe nyɔnu dzivi ene; wofa ŋku ɖe wo nɔewo dzi gã, eve woƒe mo le vem hẽ!

⁹Kpɔ ɖa, Yehowa ƒe ŋkeke dziŋɔ la gbɔna, dziku kple dɔmedzoe heliheli, ne wòado gbegbe anyigba la, eye woatsrɔ̃ nuvɔ̃wɔlawo ɖa le edzi.

¹⁰Elabena dziƒoɣletiviwo kple woƒe avũ kple avũtɔwo mana woƒe kekeli naklẽ o, ne ɣe dze la, ado viviti, eye ɣleti mana eƒe kekeli naɖi o.

¹¹Matu xexeame ƒe vɔ̃ɖiwɔwɔ kple ame vɔ̃ɖiwo ƒe vodada ŋu fe na wo, mana dadalawo ƒe dada nu natso, eye mate ŋutasẽlawo ƒe adegbeƒoƒo ɖe to.

¹²Mana amegbetɔ nave abe sika nyuitɔ ene, eye ame kodzogbea abe Ofir-sika ene.

¹³Eyata matsɔ Yehowa Zebaot ƒe dzikudodo kple eƒe dɔmedzoedogbe ana dziƒo nadzo kpekpekpe, eye anyigba naʋuʋu le enɔƒe.

¹⁴Ava me na wo abe sãde, si wonyã ɖe nu, kple alẽ, siwo amea ɖeke mele wo nu o la ene; amesiame atu ta eƒe dukɔ gbɔ, eye amesiame asi ayi eƒe anyigba dzi.

¹⁵Woada nu amesi ke woakpɔ, eye amesi ke asi tu la, atsi yi nu;

¹⁶woaxlã wo viwo ɖe nu le wo ŋku me, woaha woƒe aƒewo, eye woade asi wo srɔ̃wo ŋu.

¹⁷Kpɔ ɖa, made adã Mediatɔwo ƒe ta me ɖe wo ŋu, amesiwo mebua klosalo o, eye sika medzroa wo o;

¹⁸woƒe dawo tea ɖekakpuiwo, womekpɔa nublanui na fu nɔdɔmee o, eye woƒe ŋkuwò mevea ɖeviwo nu o.

¹⁹Ale woava me na Babel, si nye fiaɖuƒewo ƒe nu vevi kple Kaldea-tɔwo ƒe adegbeƒoƒo kple atsyɔ la, abe alesi Mawu trɔ Sodom kple Gomora bu anyi ene.

²⁰Womatso aƒe ɖe afima akpɔ o tegbee, eye wòatsi anyi aƒedoe tso dzidzime yi dzidzime, Arabiatɔwo matu agbadɔ ɖe afima o, eye lãkplɔviwo mana lãwo natsyɔ akɔ ɖe afima o;

²¹gbemelãwo atsyɔ akɔ ɖe afima, eye favieʋuto ayɔ woƒe xɔwo me, golowo atso aƒe ɖe afima, eye azizãwo aɖi adzra le afima.

²²Gbevũwo axlã le woƒe dziƒoxɔwo me kple amegãxiwo le woƒe agbeɖuɖu ƒe fiasãwo me. Woƒe ɣeyiɣi tu aƒe, eye woƒe ŋkeke mahe ɖe megbe o.