Read ewe Yesaya 16 Bible Online

Yesaya 16 - ewe bible

Yesaya 16

¹Miɖo anyigbadziɖula ƒe alẽviwo ɖa tso Sela to gbegbe ɖe Zion-nyɔnuvi ƒe to la gbɔ!

²Moab-nyɔnuviwo anɔ abe xevi, si wonyã le atɔ me wòsi ene le Arnon ƒe tɔtsoƒe.

³De adaŋu, drɔ̃ ʋɔnu, na wò vɔvɔli nanɔ abe zã ene le ŋdɔkutsu dzatsɛ! Yia amesiwo wonyã de gbe, eye megaɖe ame sisiwo gɔme ɖe go o!

⁴Na Moab ƒe amesiwo wonyã de gbe la, nanɔ gbɔwò, eye nanye sitsoƒe na wo tso nugblẽla si me, vaseɖe esime ŋutasesẽ nu natso, tsɔtsrɔ̃ nawu enu, eye amefanyala nate ɖa le anyigba dzi!

⁵Eye woatsɔ amenuveve ali ke fiazikpuia ɖe, eye ʋɔnudrɔ̃laa ɖe anɔ edzi le Dawid ƒe agbadɔ me ɖikaa, amesi dia nya dzɔdzɔe yome, eye wòsea dzɔdzɔenyenye me.

⁶Míese Moab ƒe dàda, alesi wòle asi tɔm akɔe vevie, eƒe dàda, eƒe dziku kple eƒe nu kpoloe ƒoƒo ɖe ya me.

⁷Eyata Moab afa avi ɖe Moab ŋu, eye wo katã woawu avi; miafa konyi ɖe Kir-Xareset ƒe weintsetse ŋu, eye nu ate mia ŋu.

⁸Elabena Xesbon-gblewo yrɔ, Sibma ƒe weinka, si ƒe tsetse nyuitɔwo ƒo dukɔwo ƒe amegãwo ƒu anyi, eye wode Yaezer ke heva bu ɖe gbegbe, eƒe alɔwo vu gbɔ atsiaƒu la!

⁹Eyata mala avi, abe alesi Yaezer le avi fam ɖe Sibma ƒe weinka ŋu ene, Xesbon kple Eleale, mafa nye adatsi ɖe mía dzi, le esi aʋaɣli dze miaƒe kutsetsegbeɣi kple nuŋeɣi me la ŋuti.

¹⁰Dzidzɔ kple vivisese nu tso le abɔwo me, eye womegale aseye tsom le dzidzɔ kpɔm le weingblewo me o; womegafiãa wein le weinfiãnu me o, eye metsi dzidzɔɣli nu.

¹¹Eyata nye dɔkavi le gbe ɖem ɖe Moab ŋu abe ka-saŋku ene kple nye dɔme ɖe Kir-Xeres ŋu.

¹²Eye wòava me, ne Moab do ɖe nuxeƒe hele dagbadagbam, eye wòva eƒe kɔkɔeƒe, ne wòado gbe ɖa la, mate ŋui o.

¹³Esia nye nya, si Yehowa gblɔ ɖe Moab ŋu tsã.

¹⁴Azɔ ta Yehowa gblɔ be: Le ƒe etɔ̃ me tu-tutu abe agbatedɔwɔla ƒe ƒe ene la, maɖi gbɔ Moab ƒe ŋusẽ hekpe ɖe eƒe ameha gbogboawo ŋu, eye susɔea anɔ ʋee, manɔ nemi me hã o.