Read ewe Yesaya 19 Bible Online

Yesaya 19 - ewe bible

Yesaya 19

¹Nya ɖe Egipte ŋu. Kpɔ ɖa, Yehowa do alilikpo ɖidu gbɔna ɖe Egipte: Egipte legbawo dzo nyanyanya le eŋku me, eye dzi lolo ɖe dɔ me na Egipte

²Eye mado avu na Egipte kple Egipte, nɔvi kple nɔvi, havi kple havi, du kple du, fiaɖuƒe kple fiaɖuƒe, ne woawo ana kple wo nɔewo.

³Maɖe gbɔgbɔ le Egipte me keŋkeŋ, eye magblẽ eƒe tameɖoɖo me, eye woabia nu legbawo, dzotɔwo, ŋɔliyɔlawo kple afakalawo.

⁴Matsɔ Egipte ade asi na amegã sesẽa ɖe, eye fia sẽŋuta aɖu wo dzi, Aƒetɔ, Yehowa Zebaot, ye gblɔe!

⁵Tsi ano le atsiaƒu me, eye tɔsisi la amie aƒu kplakplakpla.

⁶Tɔsisiwo aʋẽ kũ, Egipte tɔʋuwo nu atso ahamĩe, eye aƒla kple ava ayrɔ.

⁷Gbeteƒe, siwo le Nil to, le Nil ƒe azizã nu kple nudodowo katã aƒu kplakplakpla, woaɖo ƒuƒu ɖe wo, eye wòmaganɔ anyi o.

⁸Tɔƒodelawo le nu xam, amesiwo katã ɖoa ƒu le Nil me la, wole konyi fam, eye nu te amesiwo kplɔa ɖɔ le towo me la ŋu.

⁹Ŋukpe lé amesiwo trea anazi kple amesiwo lɔ̃a aklala.

¹⁰Wogbã eƒe agunusɔtiwo, eye agbatedɔwɔlawo katã le nu xam.

¹¹Bometsilawo ɖeɖe sɔŋ nye Zoan-amegãwo, Farao ƒe adaŋudela nyanuwo; wodo lã woƒe adaŋudede. Aleke miagblɔ na Farao be: Nunyalawo ƒe vi menye, blemafiawo ƒe vi menye?

¹²Afika wò nunyalawo le, ne woatoe na wò, eye wòadze si nusi Yehowa Zebaot ɖo ɖe Egipte ŋu?

¹³Zoan-amegãwo zu bometsilawo, Nof-amegãwo flu wo ɖokui, amesiwo nye woƒe ƒomeawo ƒe dzogoekpewo na Egipte le nagbanagba kum.

¹⁴Yehowa de ŋuzitsɔame ƒe gbɔgbɔ wo me, ne woaflu Egipte le eƒe nuwɔwowo katã me, abe alesi ahamula nɔa ya mum le eƒe xeɖeɖe me ene.

¹⁵Ale nuwɔwɔa ɖeke mele Egipte, si ta kple asike, deʋaya kple keti nayi wɔwɔ ge o.

¹⁶Ɣemaɣi la Egiptetɔwo anɔ abe nyɔnuwo ene, ŋɔ adzi wo, eye woadzo nyanyanya le Yehowa Zebaot ƒe asi, si wònyẽ ɖe wo ŋu la ŋuti.

¹⁷Yuda-nyigba azu ŋɔdzi na Egipte, eye ne woyɔ eŋkɔ le egbɔ la, adzo nyanyanya le Yehowa ƒe ta me, si wòɖo ɖe eŋu la ta.

¹⁸Le ɣemaɣi la du atɔ̃ anɔ Egipte-nyigba dzi, siwo agblɔ Kanaan-gbe, woaka atam na Yehowa Zebaot, eye woayɔ wo dometɔ ɖeka be dzɔdzɔenyenyedu.

¹⁹Ɣemaɣi la vɔsamlekpui anɔ Egipte-nyigba titina na Yehowa, eye dzesikpe anɔ eƒe liƒo dzi na Yehowa,

²⁰si anye dzesi kple ɖaseɖiɖi na Yehowa Zebaot le Egipte-nyigba dzi, eye ne wodo ɣli na Yehowa le woƒe ketɔ, wo ta la, aɖo xɔnametɔ ɖe wo, amesi awɔ aʋa aɖe wo.

²¹Yehowa aɖe eɖokui afia Egiptetɔwo, eye Egiptetɔwo adze si Yehowa ɣemaɣi, woatsɔ akpedavɔsa kple nuɖuvɔsa asubɔe, woaɖe adzɔgbe na Yehowa, eye woawɔ edzi.

²²Yehowa aƒo Egiptetɔwo, eye wòagahaya wo; elabena ne wòtrɔ ɖe eŋu la, ase woƒe kukuɖeɖe, eye wòahaya wo.

²³Ɣemaɣi la mɔ tata atso Egipte ayi Asur; Asur ava Egipte, eye Egipte ayi Asur, eye Egipte kple Asur siaa woasubɔe.

²⁴Ɣemaɣi la Israel anye etɔ̃lia akpe ɖe Egipte kple Asur ŋu ahanye yayra anɔ anyigba titina,

²⁵eye Yehowa Zebaot ayrae agblɔ bena: Woayra wò, nye dukɔ Egipte kple nye asinudɔwɔwɔ Asur kpakple nye do menyinu Israel!