Read ewe Yesaya 21 Bible Online

Yesaya 21 - ewe bible

Yesaya 21

¹Nya ɖe atsiaƒutagba ŋu: Egbɔna tso anyigba dziŋɔ dzi abe ahom le dziehe, si le tutum tso gbe dzi ene.

²Ŋutega sesẽa ɖe woɖe fiãm be: Amegɔmezɔla, zɔ ame gɔme; adzoblasu, ha nu! Elam, ho va; Media, ɖe to ɖe ŋu! Matsi eƒe hũɖeɖewo katã nu.

³Eyata nye ali tsom, eye veve ƒo ɖe dzinye abe nyɔnu dzivi ƒe vevesese ene. Nye ta me tɔtɔ, ale be nyemele nu sem o, eye dzi-dzi ƒom, ale be nyemele nu kpɔm o.

⁴Nye dzi le ya mum sagãsagã, dzidziƒoame ble fu lã me nam, wona fiẽ, si ŋu mele ŋu ɖom ɖo la, zu ŋɔdzi nam.

⁵Miɖo kplɔ̃, eye mikeke kuntruwo, miɖu nu, mino nu! Mi amegãwo, mitso, ne miasi ami na akpoxɔnu!

⁶Elabena ale Aƒetɔ la gblɔ nam enye si: Yi naɖo gbetakpɔ la, ne wòato nusi wòkpɔ.

⁷Eye ne ekpɔ sɔɖolawo ƒe ha le eveve, tedzi-dolawo kple kposɔdolawo la, wòaƒu to anyi vevie,

⁸ahade gbe abe dzata ene be: Aƒetɔ, metsi tre ɖe nye dzɔƒe la ɖaa le ŋkeke me, eye metsi dzɔƒe la le zã blibo la me,

⁹tete ŋutsu sɔdolawo gbɔna hele gbɔgblɔm be: Babel mũ, emũ, eye wogbã eƒe legbawo katã ƒu anyi.

¹⁰Nye amesiwo wogbã gudugudu, nye lugboƒeviwo, nya, si mese tso Yehowa Zebaot, Israel ƒe Mawu la gbɔ la, meto na mi.

¹¹Nya ɖe Duma ŋu: Woyom tso Seir be. Dzola, zã gbɔ tsɔa? Dzola, zã gbɔ tsoa?

¹²Dzola be: Ŋkeke kple zã sia gbɔna ne miehe, yewoabia la, migava ne miabia!

¹³Nya ɖe Arabia ŋu: Mi Dedantɔwo ƒe asihawo, mitsi ave me da le Arabia!

¹⁴Mi Tema-nyigbadzitɔwo, mitso tsi yi ɖakpe ame tsikɔwuwo, mitso nuɖuɖu ɖakpe ame sisiwoe!

¹⁵Elabena yi nu wòsi le; yi, si wodi, kple ɖa, si me wovu, kpakple aʋa ƒe nyanyrã nu wòsi le.

¹⁶Elabena ale Aƒetɔ la gblɔ nam enye si; Le ƒe ɖeka me tututu abe agbatedɔwɔla ƒe ƒe ene la Kedar ƒe ŋusẽwo katã nu ayi,

¹⁷eye Kedar-viwo ƒe aʋawolawo ƒe dati susɔeawo ƒe xexlẽme azu ʋee; elabena Yehowa. Israel ƒe Mawu la, ye gblɔe!