Read ewe Yesaya 23 Bible Online

Yesaya 23 - ewe bible

Yesaya 23

¹Nya ɖe Tiro ŋu: Mi Tarsis-ʋukulawo, mifa avi, elabena etsrɔ̃, aƒea ɖeke megali o, eye tɔtrɔgbɔ megali o! Wosee le Kititɔwo ƒe anyigba dzi.

²Mi ƒutatɔwo, Zidon-sitsalawo, amesiwo toa atsiaƒu dzi, eye woyɔa dua me taŋ la, miaƒe nu netsi te!

³Wotso Sixor ƒe nukuwo kple Nil ƒe agblemenuwo va me, eye wòzu dukɔwo ƒe asiɖiƒe.

⁴Zidon, ŋu nekpe wò, elabena atsiaƒu, atsiaƒu ƒe mɔ̃ sesẽ gblɔ be: Fu meɖum o, nyemedzi vi o, eye nyemenyi ɖekakpuiwo kple ɖetugbiwo wotsi o.

⁵Ne nya la de Egipte la, woadzo nyanyanya le Tiro ƒe nya la ta.

⁶Miyi Tarsis, mifa avi, mi ƒutatɔwo!

⁷Miaƒe dzidzɔdu, si dzɔ tso blema ke la, nye esia? Woƒe afɔwo kɔe yi didiƒe, ne wòadanye amedzro le afima.

⁸Amekae ɖo esia ɖe Tiro, si ɖaa fiakuku na ame la ŋu? Eƒe asitsalawo nye amegãwo, eye eƒe nudzralawo nye ame ŋkutawo le anyigba dzi.

⁹Yehowa Zebaot ɖoe ɖe ta me be, yeaɖi gbɔ atsyɔ̃ɖoɖowo katã ƒe dàda, eye yeaklo bubu le ame ŋkutawo ŋu le anyigba dzi.

¹⁰Gbagba ɖe wò anyigba dzi abe Nil ene, wò Tarsis-nyɔnuvi, alidziblanua ɖeke megali o!

¹¹Edo eƒe alo ɖe atsiaƒu ŋu, eʋuʋu fiaɖuƒewo, Yehowa de se ɖe Kanaan ŋu, ne wòatsrɔ̃ eƒe mɔ̃ sesẽwo,

¹²eye wògblɔ bena: Màgatso aseye o, wò Zidon-ɖetugbi, si wogblẽ; tso, nayi Kititɔwo gbɔ, màkpɔ gbɔdzɔe le gama hã o.

¹³Kpo ɖa, Asur tso Kaldeatɔ, siwo meganye dukɔ o la ƒe anyigba na gbedzilãwo; wotu xɔ tsralawo, eye wogbã woƒe fiasãwo wozu glikpo.

¹⁴Mi Tarsis-ʋukulawo, mifa avi, elabena wogblẽ miaƒe mɔ̃ sesẽ la.

¹⁵Eye ava me le ɣemaɣi be, ŋku adzo le Tiro dzi ƒe blaadre sɔŋ abe fia ƒe ƒe ene. Le ƒe blaadre megbe la ava me na Tiro, abe alesi wodzia gbolohae ene be:

¹⁶Wò gbolo, si woŋlɔ be, tso kasaŋku natsa le dua me godoo; ƒo saŋku nyuie, dzi ha geɖe, ne woagaɖo ŋku dziwò!

¹⁷Le ƒe blaadre megbe la Yehowa agaɖo ŋku Tiro dzi, eye wòagatrɔ ɖe eƒe gboloho ŋu, eye woawo gbolo kple anyigba dzi fiaɖuƒe, siwo katã le xexea me.

¹⁸Ke eƒe viɖe kple gboloho ŋu akɔ na Yehowa; womali koe o, eye womafi ɖo gleglegle o, ke boŋ eƒe adzododo anye amesiwo le Yehowa ŋku me la tɔ, ne woaɖu nu aɖi ƒo, eye woata ava nyuiwo.