Read ewe Yesaya 24 Bible Online

Yesaya 24 - ewe bible

Yesaya 24

¹Kpɔ ɖa, Yehowa aɖi gbɔlo anyigba, eye wòagblẽe, atrɔ eƒe ŋku me abu anyi, eye woaka edzi nɔlawo ahlẽ.

²Eye woava me na dukɔ abe nunɔla ene, dɔlaŋutsu abe eƒe aƒetɔ ene, dɔlanyɔnu abe eƒe aƒenɔ ene, nuƒlela abe nudzrala ene, agbanatɔ abe agbanadola ene, eye fenyila abe fetɔ ene.

³Woaɖi gbɔlo anyigba ƒiaƒiaƒia, eye woahae keŋkeŋ, elabena Yehowa gblɔ nya sia.

⁴Anyigba le nu xam, eye wòyrɔ; nu te xexeame ŋu, eye wòlé akpɔ; nu te anyigba dzi dukɔwo ƒe bubumewo ŋu.

⁵Wogblẽ kɔ ɖo na anyigba to edzi nɔlawo dzi, elabena woda seawo dzi, wòto vo ɖe ɖoɖoawo ŋu, eye wotu nubabla mavɔ la.

⁶Eyata fiƒode le anyigba ɖum, eye edzi nɔlawo akpɔe ɖe enu. Eyata anyigbadzitɔwo afia kolikoli, eye amegbetɔ ʋeea ɖewo kɔe asusɔ.

⁷Wein yeye ano ƒiaƒiaƒia, weinka ayra, eye amesiwo katã ƒe dzi kpɔa dzidzɔ la, aɖu tse.

⁸Asíʋuiwo ƒe vivisese nu tso, dzidzɔkpɔlawo ƒe howɔwɔ se ɖo, eye kasaŋkuwo ƒe vivisese nu tso.

⁹Womaga-dzi ha ɖe wein-nono ŋu o, eye aha muame ave heliheli na enolawo.

¹⁰Wogbã du ɖiƒeƒle la, wotu xɔwo katã ƒe ʋɔwo, eye wo me yiyi meli o.

¹¹Wole konyi fam ɖe wein ŋu le ablɔwo me, dzidzɔwo katã nu yi, vivisesewo bu le anyigba dzi.

¹²Du la zu aƒedo, eye wogbã agbo la wòzu glikpo.

¹³Elabena alea wòanɔ le anyigba dzi le dukɔwo dome, abe alesi wogbea amititsetse kple alesi woxaa nu mlɔea, ne weinxaxa nu va yi ene.

¹⁴Ame kemeawo kɔ woƒe gbe dzi le aseye tsom le ƒu gome le Yehowa ƒe gãnyenye ta be:

¹⁵Eyata mikafu Yehowa le ɣedzeƒe kple Yehowa, Israel ƒe Mawu la ƒe ŋkɔ le ƒukpowo dzi!

¹⁶Míese hadzidzi tso anyigba ƒe mlɔenu be: Woakafu ame dzɔdzɔewo! Ke nyea megblɔ be: Nye nublanuitɔ, baba nam! Adzodalawo le nu ham, nuhaha dzi adzodalawo le!

¹⁷Mi anyigbadzitɔwo, ŋɔdzi, ʋe kple mɔ̃ka le mia dzi va ge!

¹⁸Eye amesi ase ŋɔdzi ŋkɔ asi la, age adze ʋe me, eye amesi ado le ʋe me la, mɔ̃ka aɖee. Elabena woʋu dzimefesrewo, eye anyigba ƒe agunu le dzodzom kpekpekpe.

¹⁹Anyigba fe kpla, anyigba wó kpla, anyigba le ʋuʋum keɖekeɖe;

²⁰anyigba le ya mum abe ahamula ene, eye wòle nyenyem ʋakaʋaka abe ahamaka ene, elabena eƒe dzidadawo do agba ɖe edzi; adze anyi, eye magafɔ o.

²¹Eye woava me le ɣemaɣi be, Yehowa ahe to na dziƒoʋakɔwo le dzi me kple anyigba dzi fiawo le anyigba dzi.

²²Woaƒo wo nu ƒu abe gatɔwo ene ɖe do me, eye woatu gaxɔ ɖe wo nu, eye le ɣeyiɣi geɖe megbe hafi woaɖo ŋku wo dzi.

²³Du akpe ɣleti, eye ɣe ƒe mo atsi dã, elabena Yehowa Zebaot ɖu fia le Zion-to la dzi kple Yerusalem, eye atsyɔ̃ɖoɖo le eƒe ame tsitsiwo ŋku me.