Read ewe Yesaya 25 Bible Online

Yesaya 25 - ewe bible

Yesaya 25

¹Yehowa, nye Mawu nènye, mado wò ɖe dzi, eye makafu wò ŋkɔ! Elabena èwɔ nukunuwo, wò gbaɖegbe tameɖoɖowo nye nyateƒe, eye wometrɔna o!

²Elabena èna du la zu anyiglãgo, eye mɔ̃ sesẽ la zu glikpo, du bubu me towo ƒe fiasã maganye du o, eye womagatui akpɔ gbeɖegbeɖe o.

³Eyata dukɔ nyanyrãwo ade bubu ŋuwò, eye dukɔ sesẽwo ƒe duwo avɔ wò.

⁴Elabena mo sesẽ nènye na ame beliwo, mɔ̃ sesẽ nènye na ame dahewo le woƒe hiã me; sitsoƒe nènye tso dziya nu kple vɔvɔli tso ŋdɔkutsu nu; elabena ŋutasẽlawo ƒe gbɔgbɔ fuxefuxe le abe dziyae le ƒoƒom ɖe gli ŋu ene.

⁵Ete du bubu me towo ƒe nyanyrã ɖe to abe ŋdɔkutsu le kuɖiɖinyigba dzi ene; etsi ŋutasẽlawo ƒe aseyetsoha nu, abe alesi alilikpowo ƒe vɔvɔli tsia ŋdɔkutsu nu ene.

⁶Eye Yehowa Zebaot atsɔ nuɖuɖu damiwo kple wein, siwo ɖo ƒã la, atu aglo na dukɔwo katã ɖe to sia dzi; nuɖuɖuawo da ami, eye ƒuto me mi le wo me, weinawo ɖo ƒã, eye wo me dza.

⁷Eye woade avɔ, si tsyɔ dukɔwo katã dzi, kple nutsyɔnu, si tsyɔ anyigba dzi dukɔwo katã dzi la ɖa le to sia dzi.

⁸Ami ku saɖagatsi tegbee, eye Aƒetɔ Yehowa atutu aɖatsi ɖa le ŋkuwò katã me, eye woaɖe eƒe dɔlawo ƒe ŋukpe ɖa tso anyigba blibo la dzi. Elabena Yehowa ye gblɔe.

⁹Ɣemaɣi woagblɔ bena: Kpɔ ɖa, mía Mawu, amesi ŋu míedo ŋu ɖo be, aɖe mi la, enye si; Yehowa, amesi ŋu míeɖo ŋu ɖo la, enye si! Mina miatso aseye, eye míakpɔ dzidzɔ le eƒe xɔname ŋu!

¹⁰Elabena Yehowa ƒe asi aɖiɖi ɖe to sia dzi, eye wòafanya Moab ɖe enɔƒe, abe alesi wofanyaa gbe ɖe agboti me ene;

¹¹akeke abɔ me le eme, abe alesi tsiƒula kekea abɔ, be yeaƒu tsi ene; ke ate eƒe dàda kple eƒe ayedzesiwo ɖe to.

¹²Eye woagbã wò gli kɔkɔ sesẽwo aƒu anyi, abɔbɔ wò ɖe anyi, eye wòate wò ɖe ke me.