Read ewe Yesaya 32 Bible Online

Yesaya 32 - ewe bible

Yesaya 32

¹Kpɔ ɖa, fia aɖu fia ɖe dzɔdzɔenyenye nu, eye amegãwo aɖu dzi ɖe ʋɔnudɔdrɔ̃ nu.

²Amesiame anɔ abe sitsoƒe tso ya nu, bebeƒe tso tsidzadza nu, tɔʋu le gbegbe kple agakpe gã nyadri ƒe vɔvɔli le kuɖiɖinyigba dzi ene.

³Nukpɔlawo ƒe ŋku maganyẽ atre o, eye nuselawo aƒu to anyi.

⁴Ame mabutamewo ƒe dzi adze si nunya, eye kɔkɔlawo ƒe aɖe aƒo nu eme nakɔ.

⁵Womagayo bometsilawo be bubumewo azɔ o, eye womagayɔ ayetɔwo be ŋkutatɔwo o.

⁶Elabena bometsila gblɔa bometsinya, eƒe dzi hea dzɔgbevɔ̃e va aƒee, ne wòawɔ nu tovo ahagblɔ nya trama ɖe Yehowa ŋu, wòana dɔwuitɔwo natsi domeɣi, eye nunono nahiã tsikɔwuitɔwo.

⁷Ayetɔ ɖoa ta me vɔ̃ɖi, edea adaŋu vɔ̃ be, yeatsɔ alakpanya agblẽ hiãtɔwoe, nenye be, ame dahe la to nya dzɔdzɔe hã.

⁸Ke tamesusu vavãwo li na bubumewo, eye nu vavãwo dzi wolina ɖo.

⁹Mi nyɔnu, siwo li bɔkɔɔ, mitso, ne miase nye gbe! Mi nyɔnuvi, siwo le ablɔɖe me, miƒu to anyi ɖe nye nyawo ŋu.

¹⁰Ne ƒe kple edzi ŋkekewo va yi la, mi ablɔɖewo miadzo nyanyanya, elabena weintsetsexaɣi nu yi, eye kutsetsegbeɣi megbɔna o.

¹¹Mi amesiwo li bɔkɔɔ, dzidzi neƒo mi; mi ablɔɖewo, midzo nyanyanya! Miɖe ava ɖi, miɖe amama, eye misa akpanya ɖe ali!

¹²Woƒo akɔta le agble nyowo kple weinka tsekuwo ta.

¹³Aŋɔkawo kple ŋuwo mie ɖe nye dukɔ la ƒe anyigba dzi kple du sevivi la ƒe dzidzɔxɔwo katã me.

¹⁴Elabena fiasãwo zu xɔdo, eye du, si me zi na la, zu gbegbe, togbɛ kple gbetakpɔxɔ zu agado, wòzu gbetedziwo ƒe adzrɔɖiƒe kple gbeɖuƒe na lãhawo,

¹⁵vaseɖe esime woatrɔ gbɔgbɔ akɔ ɖe mia dzi tso dzi me, eye gbegbe nazu atibɔ, eye wòabu atibɔwo ɖe avewo dome.

¹⁶Nu dzɔdzɔe wɔwɔ anɔ gbegbe, eye dzɔdzɔenyenye anɔ atibɔwo me;

¹⁷dzɔdzɔenyenye ƒe dɔwɔwɔ anye ŋutifafa, eye dzɔdzɔenyenye ƒe viɖe anye gbɔdzɔe kple dziɖeɖi tegbee.

¹⁸Eye nye dukɔ anɔ ŋutifafa teƒe kple dziɖeɖi teƒewo kpakple ablɔɖe gbɔɖemeƒewo.

¹⁹Ke ne dzikpewo dza la, ave la amũ, eye du la aɖo agu.

²⁰Woayra mi, amesiwo ƒã nu ɖe tɔwo to sɔŋ, mi amesiwo ɖe ka nyiwo kple tedziwo wole yiyim.