Read ewe Yesaya 39 Bible Online

Yesaya 39 - ewe bible

Yesaya 39

¹Ɣemaɣi Babel-fia Merodax-Baladan, Baladan vi, ɖo agbalẽ kple nunanawo ɖe Xizkiya, esime wose be, elé dɔ wòvɔ nɛ.

²Eye Xizkiya kpɔ dzidzɔ le nusiawo ŋuti, eye wòfiã eƒe kesinɔnu dzraɖoƒe, klosalo kple sika, atike ʋeʋẽe kple ami xɔasi kple eƒe aʋawɔnuxɔ blibo la kpakple nusiwo katã le eƒe kesinɔnu dzraɖoƒe la wo; naneke meli, si Xizkiya metsɔ fia wo le eƒe me kple fiaɖuƒe blibo la me o.

³Tete nyagblɔɖila Yesaya va fia Xizkiya gbɔ gblɔ nɛ bena: Nya ka ŋutsu siawo gblɔ, eye afika wotso va gbɔwò? Xizkiya ɖo ŋu bena: Didiƒe wotso va gbɔnye, tso keke Babel ke.

⁴Eye wògblɔ bena: Nuka wokpɔ le aƒewò me? Xizkiya ɖo ŋu bena: Wokpɔ nusiwo katã le aƒenye me, naneke mele nye kesinɔnu dzraɖoƒe la, si nyemetsɔ fia wo o.

⁵Eye Yesaya gblɔ na Xizkiya bena: Se Yehowa Zebaot ƒe nya:

⁶Kpɔ ɖa, ŋkekewo li gbɔna, esiwo me woatɔ nusiwo katã le aƒewò me kple nusiwo katã fofowòwo tu ɖo vaseɖe egbe la, ayi Babel, naneke makpɔtɔ o, Yehowa ye gblɔe!

⁷Eye woakplɔ viwòŋutsu, siwo ado tso wò ali me, esiwo dzi ge nata la dometɔa ɖewo woaɖanye nudzikpɔlawo le Babel-fia ƒe me.

⁸Xizkiya do ŋu na Yesaya be: Yehowa ƒe gbe, si nèƒo la, enyo. Eye wògagblɔ bena: Ne ŋutifafa kple nyateƒe le nye ŋkekewo me ko!