Read ewe Yesaya 49 Bible Online

Yesaya 49 - ewe bible

Yesaya 49

¹Mi ƒukpowo, miɖo tom, mi adzɔge dukɔwo, miƒu to anyi! Yehowa yɔm tso dɔ me ke, eye wòyɔ ŋkɔnye tso danye ƒe do me ke.

²Ewo nye nu abe yi ɖaɖɛ ene, eɣlam ɖe eƒe asi ƒe vɔvɔli te, eye wòtsɔm wo aŋutrɔ biɖoe hetsɔm ƒo ɖe eƒe daku me.

³Eye wògblɔ nam be: Israel, nye dɔla nènye, amesi ŋu mawo ɖokuinye kɔkɔe ɖo.

⁴Ke megblɔ be: Medze agbagba yakatsyɔ, eye megblẽ nye ŋusẽ ɖe ya me dzodzro; ke Yehowa si me nye nya le, eye nye fetu le nye Mawu gbɔ.

⁵Azɔ ale Yehowa, amesi mèm tso dɔ me ke hewɔ eƒe dɔlae, ne wòakplɔ Yakob agbɔe, eye wòaƒo Israel nu ƒu la gblɔ nam esi; elabena bubu le ŋunye le Yehowa ŋku me, eye nye Mawu enye nye ŋusẽ.

⁶Egblɔ bena: Nu tsɛ wònye be, nènye nye dɔla, ne nafɔ Yakob ƒe toawo ɖe tsitrenu, eye nakplɔ Israel ƒe amesiwo woɖe la agbɔe; metsɔ wò ɖo kekeli na dukɔwo hã, ne nanye nye xɔname vaseɖe anyigba ƒe mlɔenu ke.

⁷Ale Yehowa, Israel ƒe xɔnametɔ kple eƒe kɔkɔetɔ la gblɔ na amesi wodo vloe, amesi dukɔ la nyɔ ŋui, amesi nye dziɖulawo ƒe kluvi la, enye si; Fiawo akpɔe ahatso ɖe tsitrenu, eye amegãwo aɖe ta agu le Yehowa, amesi metrɔa ta me o la ta, le Israel ƒe kɔkɔetɔ, amesi tia wò la ta.

⁸Ale Yehowa gblɔ esi: Mase wò gbe le amenuveɣi, eye maxɔ na wò te xɔnamegbe, makpɔ tawo, eye matsɔ wò aɖo nubabla na dukɔ la, ne naɖo anyigba la te, eye namã domenyinu, si zu gbegbe la;

⁹ne nagblɔ na gatɔwo be: Mido! eye na amesiwo le viviti me la be: Miva kekeli nu! Woaɖu gbe le mɔ to, eye woƒe gbeɖuƒe anɔ togbɛ ƒeƒlewo katã ta me.

¹⁰Dɔ kple tsikɔ mawu wo o, eye ŋdɔ kple ɣe maɖu wo o, elabena wo nuvela le wo kplɔm, eye woakplɔ wo ato tsidzidziwo ŋu.

¹¹Matsɔ nye towo katã awɔ mɔe, eye wòado nye mɔ tatawo.

¹²Kpɔ ɖa, amesiwo atso adzɔge ava, ame kemewo atso anyiehe kple ɣetoɖoƒe, eye ame bubuwo atso Sinitɔwo ƒe anyigba dzi.

¹³Mi dziƒowo, mitso aseye, anyigba, kpo dzidzɔ, eye mi towo, mido aƒa; elabena Yehowa fa akɔ na eƒe dukɔ, eye wòkpɔ nublanui na eƒe hiãtɔwo.

¹⁴Ke Zion be: Yehowa gblẽm ɖi, Aƒetɔ la ŋlɔm be.

¹⁵Ɖe nyɔnu aŋlɔ eƒe vidzie be, eye eƒe dɔme agbe tɔtrɔ ɖe eƒe dɔmevi ŋua? Ne woawo ŋlɔe be hã, nyea nyemaŋlɔ wò be o!

¹⁶Kpɔ ɖa, meŋlɔ wò ɖe nye asi ŋu, wò gliwo le ŋkunye me ɖaa.

¹⁷Viwòwo gbɔna afa tsɔtsɔe, tsrɔ̃wòlawo kple gblẽwòlawo atu le mewo adzo.

¹⁸Fɔ ka dzi nakpɔ nu godoo: Wo katã woƒo takpli gbɔna va gbɔwò! Yehowa be: Meta ɖokuinye ƒe agbe: Ado wo katã abe lekewɔnu ene, eye atso wo abla ali dzi abe ŋugbetɔ ene.

¹⁹Azɔ wò aƒedo, wò gbegbe kple wò anyigba, si wogblẽ la, axaxa ŋuta na edzinɔlawo, eye gblẽwòlawo anɔ adzɔgedzɔgee na wò.

²⁰Azɔ vi, siwo woɖe le ŋuwò la, agblɔ ɖe to me na wò be: Nɔƒe la xaxa nam, te ɖa tso gbɔnye, ne manɔ anyi!

²¹Eye àgblɔ le wò dzi me be: Woɖe vi le ŋunye, eye metsi ko, wode aboyom, eye wonyãm de gbe tso, ameka dzi esiawo nam? Ameka nyi wo wotsi? Kpɔ ɖa, nye ɖeka ko wogblẽ ɖi, afika woawo ya no?

²²Ale Aƒetɔ Yehowa gblɔ esi: Kpo ɖa, mamiã asi dukɔwo, eye mado aflaga ɖe dzi na anyigba dzi dukɔwo, ne woatsɔ wò ŋutsuviwo ɖe akɔnu vɛ, eye woakɔ wò nyɔnuviwo ɖe abɔta ve.

²³Fiawo anye vinyilawo na wò, eye wo srɔ̃wo anye nonala na wò; woade ta agu atsyɔ mo anyi ɖe ŋkuwò me, eye wòaɖuɖɔ wò afɔ ŋu ke, eye adze si be, nyee nye Yehowa, eye nyemenana ŋu kpea amesiwo ɖoa ŋu ɖe ŋunye la o.

²⁴Ɖe woaxɔ nuhaha le kalẽtɔ sia? eye ɖe aboyomewo age le ŋutasẽla sia?

²⁵Yehowa be: Woxɔa aboyomewo le kalẽtɔ si, eye nuhaha gena le ŋutasẽla si; mawo avu kple amesiwo le avu wɔm kpli wò, eye maɖe viwòwo;

²⁶mana amesiwo te wò ɖe anyi la, naɖu woawo ŋuta ƒe lã, eye woamu woƒe ʋu abe wein ene. Eye ŋutilãwo katã nadze sii be, nye Yehowa enye wò xɔnametɔ, eye Yakob ƒe ŋusẽtɔ enye wò ɖela.