Read ewe Yesaya 63 Bible Online

Yesaya 63 - ewe bible

Yesaya 63

¹Amekae nye esi tso Edom gbɔna, eye wole awu dziwo me tso Bozra, amesi tsɔ eƒe awuwo ɖo atsyɔ̃e, eye wòle yiyim le eƒe ŋusẽ geɖe la me? Nyee nye amesi ƒoa nu ɖe eteƒe, eye xɔname bɔ ɖe asinye.

²Nukaŋuti wò awuwo biã, eye wò avɔwo le abe weinfiãla tɔ ene?

³Nye ɖeɖee fanya wein kple afɔ, eye dukɔwo dometɔa ɖeke mekpe ɖe ŋunye o. Ale menyã avuzi le wo dzi le nye dɔmedzoe me, eye mefanya wo le nye dziku me, eye woƒe ʋu hlẽ ɖe nye awuwo ŋu, eye nye avɔwo katã me gblẽ.

⁴Elabena meɖo nye hlɔ̃biagbe ɖe ta me, eye nye xɔname ƒe ƒe la ɖo?

⁵Eye metsa ŋku, ke amea ɖeke mexɔ nam o, eye nye mo wɔ yaa be, xɔnametɔa ɖeke meli o; tete nye abɔ xɔ nam, eye nye dziku kpe ɖe ŋunye.

⁶Mefanya dukɔwo le nye dɔmedzoe me, meto wo nyanyanya le nye dziku me, eye mena woƒe ʋu ɖuɖu de anyigba.

⁷Makafu Yehowa ƒe amenuveve kple Yehowa ƒe ŋkɔxɔxɔ le nusiwo katã Yehowa wɔ na mí la nu kpakple eƒe dɔmenyo gbogbo, siwo wòwɔ na Israel ƒe aƒe la le eƒe nublanuikpɔkpɔ kple eƒe amenuveve geɖe la nu.

⁸Egblɔ be: Vavã, nye dukɔ wonye, vi, siwo madaa alakpa o la wonye, eye wòzu xɔnametɔ na wo.

⁹Esi woxaxa woɖo hã la, hiãa ɖeke menɔ anyi o, elabena dɔla, si me woɖea eɖokui fiana lena la, xɔ na wo; eɖe wo le eƒe lɔlɔ̃ kple eƒe tufafa ta, eye wòkɔ wo hetsɔ wo le blema ŋkekewo katã me.

¹⁰Ke woawo dze aglã ɖe eŋu, eye wodo dziku na eƒe gbɔgbɔ kɔkɔe la, tete wòtrɔ zu futɔ na wo, eye eya ŋutɔ wɔ avu kpli wo.

¹¹Tete eƒe dukɔ la ɖo ŋku Mose dzi le blema ŋkekewo me be: Afika amesi kplɔ wo tso atsiaƒu hekpe ɖe eƒe lãha ƒe kplɔla ŋu la le? Afika amesi na eƒe gbɔgbɔ kɔkɔe nɔ wo dome la le?

¹²Amesi na eƒe atsyɔ̃dabɔ to Mose ƒe nuɖusi dzi, eye wòmã tsi la me ɖe eve le wo ŋgɔ, be wòaɖe ŋkɔ mava eɖokui ŋu?

¹³Eya amesi na wòto tɔ gɔme womekli nu o, abe alesi sɔa toa gbegbee ene?

¹⁴Yehowa ƒe gbɔgbɔ kplɔ wo yi gbɔɖemeƒe, abe alesi lã yia bali me ene. Ale nèkplɔ wò dukɔ la, be nade ŋkɔ gã ɖokuiwò ŋu.

¹⁵Do ŋku ɖa tso dziƒo, eye nakpɔ nu tso wò nɔƒe kɔkɔe nyo la me! Afika wò ŋuʋaʋã kple wò nutsuwɔwɔwo le? Wò dɔmetɔtrɔ kple nublanuikpɔkpɔ de megbe le ŋunye.

¹⁶Wòe nye mía fofo, elabena Abraham menya mí o, eye Israel medze si mí o. Wò Yehowa enye mía fofo, eye ŋkɔwòe nye „mía ɖela“ tso gbaɖegbe ke.

¹⁷Yehowa, nukaŋuti nena míele tatram tso wò mowo dzi, eye nèse miaƒe ta me, be mievɔ̃ wò o? Gatrɔ va le wò dɔla kple wò domenyinyi ƒe toawo ta!

¹⁸Ɣeyiɣi ʋeea ɖe ko wò to kɔkɔe la nɔ si me, tete miaƒe futɔwo nyã avuzi le wò kɔkɔeƒe la dzi.

¹⁹Míezu abe amesiwo dzi mèɖu fia ɖo kpɔ o, kple amesiwo ŋu womeyɔ wò ŋkɔ ɖo kpɔ o la ene. Oo, esi nahadze dziŋgɔli aɖi ɖe anyi, eye towo nadzo kpekpekpe le ŋkuwò me.