Read ewe Mose III 11 Bible Online

Mose III 11 - ewe bible

Mose III 11

¹Eye Yehowa ƒo nu kple Mose kple Aron gblɔ na wo bena:

²Migblɔ na Israel-viwo be: Lã, siwo miaɖu le lãfɔnewo dome le anyigba dzi la, wonye si.

³Miekpɔ mɔ aɖu lãtɔne, siwo katã ƒe afɔkli me fe, eye wodzɔa nu gaɖuna.

⁴Ke lã, siwo dzɔa nu gaɖuna kple esiwo ƒe afɔkli me fe dometɔ, siwo miaɖu o la, wonye, kposɔ, elabena edzɔa nu gaɖuna, ke eƒe aƒɔkli me mefe o, lã makɔmakɔ wòanye na mi;

⁵xɔfie, elabena edzɔa nu gaɖuna, ke eƒe afɔkli me mefe o, lã makɔmakɔ wòanye na mi;

⁶fɔmizi, elabena edzɔa nu gaɖuna, ke eƒe afɔkli me mefe o, lã makɔmakɔ wòanye na mi;

⁷kpakple ha, elabena eƒe afɔkli me fe keŋ, gake megadzɔa nu ɖuna o, lã makɔmakɔ wòanye na mi.

⁸Migaɖu woƒe lã o, eye migade asi woƒe kuku hã ŋu o, elabena nu makɔmakɔwo woanye na mi.

⁹Tɔmelã, siwo katã miekpɔ mɔ aɖu la wonye, esiwo ŋu adza kple tsrowo le, le ƒuwo kple tɔsisiwo me.

¹⁰Ke lã, siwo katã ŋu adza kple tsro mele o, le ƒuwo kple tɔsisiwo me, kple nusiwo katã ʋãna le towo me, kpakple tɔmenu gbagbewo katã la, ŋunyɔnu woanye na mi.

¹¹Ŋunyɔnu woanye na mi, migaɖu woƒe lã o, eye woƒe kukua nanyɔ ŋu na mi.

¹²

¹³Xe, siwo mianyɔ ŋui, eye miaɖu o la wonye, hɔ̃, akpo, gbagblaxetsu,

¹⁴aʋako kple ayisu ƒomeviwo katã,

¹⁵akpaviã ƒomeviwo,

¹⁶golo, sagbaɖre, tsalɛ kple xe ƒonu ƒomeviwo katã,

¹⁷ʋlukuku, tsimese kple aŋɔɣi,

¹⁸favieʋuto, aluge kple akagã,

¹⁹damixe, ako ƒomeviwo, agudzixe kple drui.

²⁰Nu dzodzoe, siwo katã zɔa afɔ enee dzi la, ŋunyɔnu woanye na mi.

²¹Ke miekpɔ mɔ aɖu nu dzodzoe, siwo zɔa afɔ ene dzi, eye wotsɔa megbetatiwo dzoa kpoe tso anyigba.

²²Esiwo miekpɔ mɔ aɖu le wo dome la wonye ʋetsuvi tɔgbewo keŋ, siwo nye: ʋetra ƒomeviwo, abɔ ƒomeviwo kple tukɔmitukɔmi ƒomeviwo.

²³Ke nu dzodzoe bubu, siwo katã gɔme afɔ ene le la, ŋunyɔnu woanye na mi.

²⁴Esiawo nye nusiwo miatsɔ agblẽ ka ɖo na mia ɖokui. Amesiame, si de asi woƒe kukua ŋu la, eŋu meka o vaseɖe fiẽ.

²⁵Amesiame, si atso wo dometɔa ɖe ƒe kukua la, nanyã eƒe avɔwo, eye eŋu mekɔ o vaseɖe fiẽ.

²⁶Lã, siwo katã ƒe afɔkli me fe, gake mete ʋu keŋ o, eye womegadzɔa nu ɖuna o la, lã makɔmakɔwo woanye na mi; amesiame, si aka asi wo ŋu la, eŋu meka o.

²⁷Lã, siwo katã fe li na, eye wozɔa afɔ enee dzi la, lã makɔmakɔwo woanye na mi, amesiame, si aka asi woƒe kukua ŋu la, eŋu mekɔ o vaseɖe fiẽ.

²⁸Eye amesi atsɔ woƒe kuku la, nanyã eƒe avɔwo, eye eŋu mekɔ o vaseɖe fiẽ; elabena lã makɔmakɔwo wonye na mi.

²⁹Anyigbadzilã sue, siwo ŋu meka na mi o wonye: adɔ, afi kple adoglo ƒomeviwo,

³⁰atɔ, ana, xɔmenyatri, ve kple agama.

³¹Esiawo nye lã makɔmakɔwo na mi le lã suewo katã dome; amesi ade asi woƒe kukua ŋu la, eŋu mekɔ o vaseɖe fiẽ.

³²Nusianu, si dzi woƒe kukua ge dze la, ŋu mekɔ o, eɖanye atinuwo, avɔ, lãgbalẽ, kotoku alo nusianu, si ŋu dɔ wowɔna o, ele be, woade wo tsi me, eye wo ŋu mekɔ o vaseɖe fiẽ; emegbe hafi wo ŋu agakɔ.

³³Ne woge dze anyinua ɖe me la, ekema nusianu, si le eme la, ŋu mekɔ o, eye ele be, miagbã nu la.

³⁴Nuɖuɖu sia nuɖuɖu, si dzi wokɔ tsi ma ɖo la, ŋu mekɔ o, eye nunono sia nunono, si le nu mawo ƒe ɖe me la, ŋu mekɔ o.

³⁵Nusianu, si dzi woƒe kukua dze la, ŋu mekɔ o, eɖanye abolokpo alo mlekpui o, ele be, woagbãe; nu makɔmakɔwo wonye, eye ŋunyɔnu woanye na mi.

³⁶Ke tsi dzidziwo, vudowo kple tawo ŋu kɔ, gake amesi ke de asi woƒe kukua ŋu la, eŋu mekɔ o.

³⁷Ne woƒe kukua dze nukua ɖe, si ƒã ge wòala dzi la, eŋu kɔ.

³⁸Ke ne wode nuku la tsi, eye woƒe kukua dze edzi la, ekema eŋu mekɔ na mi o.

³⁹Ne lã, siwo mieɖuna la, dometɔa ɖe ku, eye amea ɖe de asi kukua ŋu la, eŋu mekɔ o vaseɖe fiẽ.

⁴⁰Amesi ɖu kukua la, nanyã eƒe avɔwo, eye eŋu mekɔ o vaseɖe fiẽ; amesi tsɔ kukua la, nanyã eƒe avɔwo, eye eŋu mekɔ o vaseɖe fiẽ.

⁴¹Anyigbadzilã suewo katã la, ŋunyɔnuwo wonye, eye womaɖu wo o.

⁴²Lã sue, siwo katã zɔna le anyigba dzi, esiwo tana le ƒodo dzi kpakple esiwo gɔme afɔ ene alo afɔ geɖe le la, miaɖu wo o, elabena ŋunyɔnuwo wonye.

⁴³Migatsɔ lã suewo do ŋunyɔ mia ɖokui o, eye migatsɔ wo gblẽ kɔ ɖo ahaƒo ɖi mia ɖokui o.

⁴⁴Elabena nyee nye Yehowa, miaƒe Mawu. Eyata miwɔ mia ɖokui kɔkɔe, eye mianɔ kɔkɔe, elabena kɔkɔetɔ menye; migatsɔ anyigbadzilã suewo gblẽ kɔ ɖo na mia ɖokui o.

⁴⁵Nyee nye Yehowa, si kplɔ mi tso Egipte-nyigba dzi, bena manye miaƒe Mawu. Eyata minɔ kɔkɔe, elabena kɔkɔetɔ menye.

⁴⁶Esia nye se le lãfɔnewo, xewo kple tɔmenu gbegbewo kpakple anyigbadzilã suewo katã ŋuti,

⁴⁷bena woade vovo nu makɔmakɔ kple nu kokoe dome, eye woade vovo lã, si woaɖu kple esi womaɖu o la dome.