Read ewe Mose III 17 Bible Online

Mose III 17 - ewe bible

Mose III 17

¹Eye Yehowa ƒo nu kple Mose bena:

²Ƒo nu kple Aron kple viaŋutsuwo kpakple Israel-viwo katã, eye nagblɔ na wo bena: Ale Yehowa ɖe se be, woawɔ enye si:

³Ne Israel ƒe aƒemetɔa ɖe wu nyi, alẽ alo gbɔ̃ le asaɖa la me alo le asaɖa la godo,

⁴eye metsɔe va Mawu ƒe agbadɔ la nu, bena wòasa vɔ na Yehowa le Yehowa ƒe nɔƒe la nu o la, ekema ame la do hlɔ̃; ekɔ ʋu ɖi, eye woatsrɔ̃ ame la ɖa le eƒe dukɔ la dome.

⁵Eyata Israel-viwo natsɔ woƒe vɔsalã, siwo wonɔa wuwum le gbedzi la, avae na nunɔla le Yehowa ŋku me le Mawu ƒe agbadɔ la nu, eye woasa akpedavɔ na Yehowa.

⁶Eye nunɔla nawu ʋu la ɖe Yehowa ƒe vɔsamlekpui la ŋu le Mawu ƒe agbadɔ la nu, eye woatɔ dzo amiawo, bena woaʋẽ lilili ɖe Yehowa.

⁷Womegatsɔ woƒe lãwo sa vɔ na azizã, siwo wosubɔna la o. Ɖoɖo mavɔ wòanye na wo kple woƒe dzidzimeviwo.

⁸Gblɔ na wo bena: Ne Israel ƒe aƒemetɔa ɖe alo amedzrovi, si le wo dome la, wu numevɔsalã alo akpedavɔsalã,

⁹eye mietsɔe va Mawu ƒe agbadɔ la nu, bena wòasa vɔ na Yehowa o la, woatsrɔ̃ ame la ɖa le eƒe dukɔ me viwo dome.

¹⁰Ne Israel ƒe aƒemetɔa ɖe alo amedzrovi, si le wo dome, ɖu lãʋua ɖe la, maɖe ŋku atɔ amesi ɖu ʋua la, eye matsrɔ̃e ɖa le eƒe dukɔ la dome.

¹¹Elabena agbe le ʋu la me, eye metsɔe na mi, bena woatsɔ alé avui, elabena agbe le eme.

¹²Eyata megblɔ na Israel-viwo be: Mia dometɔa ɖeke megaɖu nu o, eye amedzrovi, si le mia dome, hã megaɖu ʋu o.

¹³Ne Israel-viwo dometɔa ɖe alo amedzrovi, si le wo dome, da ade wu gbemelã alo xevia ɖe, si woɖuna la, ekema wòaɖuɖu eƒe ʋu ɖe anyigba, eye wòaxe ke ɖe dzi.

¹⁴Lãwo katã ƒe agbe le woƒe ʋu me, eyata megblɔ na Israel-viwo be: Migaɖu lãa ɖeke ƒe nu o, elabena lãwo ƒe nu enye woƒe agbe. Amesiame, si aɖui la, woatsɔe ɖa.

¹⁵Ne duamevi alo amedzrovia ɖe ɖu lã kuku alo lã, si nu lé la, ekema wòanyã eƒe avɔwo, eye wòale tsi, eye eŋu mekɔ o vaseɖe fiẽ; emegbe eŋu kɔ.

¹⁶Ke ne menya wo o, eye mele tsi hã o la, ekema eya ŋutɔ ƒe fɔɖiɖi le edzi.