Read ewe Mose III 19 Bible Online

Mose III 19 - ewe bible

Mose III 19

¹Eye Yehowa ƒo nu kple Mose bena:

²Ƒo nu kple Israel ƒe ha blibo la, eye nagblɔ na wo bena: Ame kɔkɔewo mianye, elabena nye Yehowa, mia Mawu la, mele kɔkɔe.

³Amesiame nayɔ dada kple fofoa, eye miaɖo ŋku nye dzudzɔgbewo dzi. Nyee nye Yehowa, mia Mawu!

⁴Migayi legbawo gbɔ o, eye migakɔ mawuwo na mia ɖokui o. Nyee nye Yehowa, mia Mawu!

⁵Ne miesa akpedavɔ na Yehowa la, miwɔe ale be, miadze eŋu.

⁶Miaɖui le gbesigbe miewui kple ŋkeke, si dze eyome dzi; ke woatɔ dzo esi tsi anyi vaseɖe ŋkeke etɔ̃agbe.

⁷Ke ne woɖui le ŋkeke etɔ̃agbe la, ezu ŋunyɔnu, eye womaxɔe o.

⁸Amesi ɖui la, eƒe vodada le edzi, elabena egblẽ kɔ ɖo na Yehowa ƒe nu kɔkɔe la, eye woatsrɔ̃ ame la ɖa le eƒe dukɔ me viwo dome.

⁹Ne mieŋe nukuwo le miaƒe agble me la, ekema megaŋe wo vaseɖe boto ke o, eye megafɔ nusiwo dudu la o.

¹⁰Megaxa wò weingblemenuwo ƒiaƒiaƒia o, eye megafɔ tsetse, siwo dudu ɖe anyi hã o: ke boŋ gblẽ wo ɖi na ame dahewo kple amedzrowo. Nyee nye Yehowa, mia Mawu!

¹¹Migafi fi o, migasẽ nu o, eye amea ɖeke megable nɔvia o.

¹²Migaka aʋatso yɔ nye ŋkɔ ta nui o, bena nagaƒo ɖi wò Mawu ƒe ŋkɔ o. Nyee nye Yehowa!

¹³Megate hawòvi ɖe anyi o, eye megada adzoe o. Megana agbatedɔwɔla ƒe fetu natsi gbɔwò ŋu nake ɖe edzi o.

¹⁴Megaɖe alɔme le mumuitɔ ŋu o, eye megada nu ɖe ŋkuagbãtɔ ŋgɔ, be wòakli o, ke boŋ vɔ̃ wò Mawu la. Nyee nye Yehowa!

¹⁵Migawɔ apasa le ʋɔnudɔdrɔ̃ me o. Mígade ame dahe dzi o, eye migakpɔ amegãwo ŋku me o; ke boŋ mídrɔ̃ ʋɔnu mia nɔewo ɖe teƒe.

¹⁶Meganye sakplitɔ nɔ yiyim le wò dukɔ me viwo dome o; eye megaka ɖe dzi, be woatso kufia na hawòvi o. Nyee nye Yehowa!

¹⁷Megalé nɔviwò ɖe do me o, ke boŋ gbe nya nɛ, ne magana nahe nuvɔ̃ ava ɖokuiwò dzi o.

¹⁸Megawɔ wɔɖenui o, eye megalé dɔmedzoe, si wò dukɔ me viwo do na wò la, ɖi o; ke boŋ nalɔ̃ hawòvi abe ɖokuiwò ene. Nyee nye Yehowa!

¹⁹Milé ŋku ɖe nye ɖoɖoawo ŋu. Megana wò lã ƒomevi vovovowo natsaka ayɔ asi wo nɔewo o; megaƒã nuku ƒomevi vovovowo ɖe wò agble me o, eye megata avɔ, si wotsɔ lãfu kple ɖeti tsaka lɔ̃e la o.

²⁰Ne ŋutsua ɖe mlɔ nyɔnua ɖe gbɔ, eye wòɖe asi eŋu, eye nyɔnu la nye kosi, si womexɔ kple ga o, eye womèna ablɔɖee hã o, gake wotsɔe na ŋutsua ɖe la, ekema tohehe dze nya la me; gake womawu wo o, elabena womèna ablɔɖee o.

²¹Ŋutsu la natsɔ agbo ɖeka ava Mawu ƒe agbadɔ la nu, woawɔ fɔɖivɔsae.

²²Eye nunɔla natsɔ fɔɖivɔsagbo lã alé avu nɛ le Yehowa ŋku me, le eƒe nuvɔ̃, si wòwɔ la ta; ekema woatsɔ eƒe nuvɔ̃, si wòwɔ la, akee.

²³Ne mieva anyigba la dzi, eye mieɖo ati vovovowo, siwo ƒe tsetse woɖuna la, ekema mibu woƒe tsetse abe bolobolotɔwo ene. Ƒe atɔ̃ sɔŋ miabu wo abe bolobolotɔwo ene, eye miaɖu wo o.

²⁴Le ƒe enelia me la woƒe tsetsewo katã ŋu ko, bena woatso akafu Yehowa.

²⁵Ke le ƒe atɔ̃lia me miekpɔ mɔ aɖu woƒe tsetsewo, bena woatse ɖe dzi na mi geɖe. Nyee nye Yehowa, mia Mawu!

²⁶Migaɖu nusi me ʋu le o. Migaka afã o, eye migasa dzo o.

²⁷Migatso ako o, eye megafɔ wò ge dzi o.

²⁸Ne ame ku la, migasi blini ɖe ŋuti o, eye migatá nu ɖe ŋuti hã o. Nyee nye Yehowa!

²⁹Megagblẽ viwònyɔnu, eye naɖoe ɖe ahasigbe o, bena anyigba la nagazu gbolonyigba, eye ŋukpenanuwo nanɔ edzi o.

³⁰Miɖo ŋku nye dzudzɔgbewo dzi, eye vɔvɔ̃ nanɔ nye kɔkɔeƒe la ŋu na mi. Nyee nye Yehowa!

³¹Migayi ŋɔliyɔlawo gbɔ o, eye migabia nu le bokɔnɔwo gbɔ o, bena miagaƒo ɖi o. Nyee nye Yehowa, mia Mawu!

³²Amegã ta ɣi ŋku me nanɔ tsitre ɖo, eye bu amegã ɖeɖi la, eye navɔ̃ wò Mawu la. Nyee nye Yehowa!

³³Ne amedzroa ɖe dze gbɔwò le wò anyigba dzi la, migatee ɖe anyi o.

³⁴Amedzro nanɔ mia gbɔ abe duamevi ene, eye nalɔ̃e abe ɖokuiwò ene; elabena miawo hã míenye amedzrowo kpɔ le Egipte-nyigba dzi. Nyee nye Yehowa, mia Mawu!

³⁵Migawɔ apasa le ʋɔnudɔdrɔ̃ me o, eye migaba ame le dzidzeka, nudanu kple nudonui me o.

³⁶Nudanu nyui kple nudakpe nyuiwo, efa blibo kple hin blibo nanɔ mia si. Nyee nye Yehowa, mia Mawu, si kplɔ mi tso Egipte-nyigba dzi.

³⁷Eyata milé ŋku ɖe nye ɖoɖoawo katã kple nye seawo katã ŋu, eye miawɔ wo dzi. Nyee nye Yehowa!