Read ewe Mose III 23 Bible Online

Mose III 23 - ewe bible

Mose III 23

¹Eye Yehowa ƒo nu kple Mose bena: Ƒo nu kple Israel-viwo, eye nagblɔ na wo bena: Yehowa ƒe ŋkekenyuie, siwo miayɔ be takpegbe kɔkɔe la, wonye si:

³Ŋkeke ade miawo ɖo, ke ŋkeke adrelia enye dzudzɔgbe blibo kple takpegbe kɔkɔe; miawɔ dɔa ɖeke o, elabena dzudzɔgbe wònye na Yehowa le mia nɔƒewo katã.

⁴Esiawo nye Yehowa ƒe ŋkekenyuie, siwo miayɔ le woƒe azãgbewo dzi bena takpegbe kɔkɔe.

⁵Ɣleti gbãtɔ ƒe ŋkeke wuienelia ƒe fiẽ enye ŋutitotoŋkekenyuie na Yehowa,

⁶eye le ɣleti sia ƒe ŋkeke wuiatɔ̃lia dzi miaɖu abolo maʋamaʋã ƒe ŋkekenyuie na Yehowa; ŋkeke adre sɔŋ miaɖu abolo maʋamaʋã.

⁷Ŋkeke gbãtɔ enye takpegbe kokoe na mi, miekpɔ mɔ awɔ asinudɔa ɖeke o.

⁸Ŋkeke adre sɔŋ miasa dzovɔ na Yehowa, eye ŋkeke adreagbe enye takpegbe kokoe, miawɔ asinudɔa ɖeke o.

⁹Eye Yehowa ƒo nu kple Mose bena:

¹⁰Ƒo nu kple Israel-viwo, eye nagblɔ na wo bena: Ne mieva anyigba, si matso na mi dzi, eye mieŋe nu le edzi la, ekema miatsɔ lubabla gbãtɔwo avae na nunɔla.

¹¹Eye wòanyè lubablawo le Yehowa ŋku me, bena miaƒe nu nadze eŋu; nunɔla nanyè wo le ŋkeke, si dze dzudzɔgbe yome la dzi.

¹²Eye miatsɔ alẽvi, si sɔ blibo, eye wòxɔ ƒe ɖeka la, asa numevɔe na Yehowa le gbesigbe mienyè lubablawo.

¹³Miatsɔ wɔ memee eta ƒe mamã ewoliawo eve, si wodzaba kple ami awɔ nuɖuvɔsa, si woatɔ dzoe na Yehowa, be wòaʋẽ lilili, hekpe de nunovɔsa wein hin ƒe mamã eneliawo ɖeka ŋu.

¹⁴Ke miekpɔ mɔ aɖu abolo, bli tɔtɔe alo blitimu o, vaseɖe gbesigbe miasa vɔ na mia Mawu. Ɖoɖo mavɔ wòanye na mi kple miaƒe dzidzimeviwo le mia nɔƒewo katã.

¹⁵Emegbe miabu kwasiɖa dedie adre tso ŋkeke, si dze dzudzɔgbe yome la dzi, gbesigbe mienyã lubablawo;

¹⁶mixlẽ ŋkeke blaatɔ̃ vaseɖe ŋkeke, si dze kwasiɖa adrelia yome la dzi, emegbe hafi miatsɔ nu yeyewo asa nuɖuvɔ na Yehowa.

¹⁷Mitsɔ wɔ memee efa ƒe mamã ewoliawo eve ƒe abolo ʋaʋã eve atsɔ tso mia nɔƒewo katã vɛ, woanye nu gbãtɔwo na Yehowa, be woanyèe.

¹⁸Eye miatsɔ alẽvi adre, siwo naneke mewo afia ɖeke na o, eye woxɔ ƒe ɖekaɖeka, nyitsuvi ɖeka kple agbo eve asa numevɔe na Yehowa, eye miatsɔ nuɖuvɔsa kple nunovɔsa akpe ɖe wo ŋu awɔ dzovɔsa, si nena lilili ɖe Yehowa.

¹⁹Eyome miatsɔ gbɔ̃tsu ɖeka asa nuvɔ̃vɔe, eye miatsɔ alẽvi eve, siwo xɔ ƒe ɖekaɖeka, asa akpedavɔe.

²⁰Eye nunɔla nanyè nu gbãtɔwo ƒe aboloawo akpe ɖe alẽvi eveawo ŋu le Yehowa ŋku me; nu kɔkɔewo wonye na Yehowa hena nunɔla.

²¹Ŋkeke ma dzi miaɖe gbe ƒã bena, takpegbe kɔkɔe wònye na mi, miekpɔ mɔ awɔ asinudɔa ɖeke o. Ɖoɖo mavɔ wòanye na miaƒe dzidzimeviwo le mia nɔƒewo katã.

²²Ne mieŋe nu le miaƒe anyigba dzi la, migaŋe nukuawo vaseɖe boto ke o, eye migafɔ nusiwo dudu de anyi o; ke boŋ migblẽ wo di na ame dahewo kple amedzrowo. Nyee nye Yehowa, mia Mawu!

²³Eye Yehowa ƒo nu kple Mose bena:

²⁴Gblɔ na Israel-viwo be: Ɣleti adrelia ƒe ŋkeke gbãtɔ nanye dzudzɔgbe, kpẽkugbe hena ŋkuɖoɖodzi kple takpegbe kɔkɔe na mi.

²⁵Miawɔ asinudɔa ɖeke o, eye miasa dzovɔ na Yehowa.

²⁶Eye Yehowa ƒo nu kple Mose bena:

²⁷Ɣleti adrelia sia ƒe ŋkeke ewolia enye avulégbe, takpegbe kɔkɔe wònye na mi, míatsi nu adɔ, eye miasa dzovɔ na Yehowa.

²⁸Miawɔ dɔa ɖeke le ŋkeke sia dzi o, elabena avulégbee, bena woalé avu na mi le Yehowa, mia Mawu ŋku me.

²⁹Ne amea ɖe metsi nu ɖɔ le ŋkeke sia dzi o la, woatsrɔ̃ ame la ɖa le eƒe dukɔ me viwo dome,

³⁰eye ne amea de wɔ dɔa ɖe le ŋkeke sia dzi la, matsrɔ̃ ame la ɖa le eƒe dukɔ la dome

³¹Miawɔ dɔa ɖeke o, ɖoɖo mavɔ wòanye na miaƒe dzidzimeviwo le mia nɔƒewo katã.

³²Dzudzɔgbe blibo wòanye na mi, eye míatsi nu adɔ. Tso fiẽ vaseɖe fiẽ miaɖu dzudzɔgbe sia, tso ɣleti la ƒe ŋkeke asiekelia ƒe fiẽ.

³³Eye Yehowa ƒo nu kple Mose bena:

³⁴Gblɔ na Israel-viwo be: Tso ɣleti adrelia sia ƒe ŋkeke wuiatɔ̃lia dzi miaɖu agbadɔŋkekenyuie ŋkeke adre sɔŋ na Yehowa.

³⁵Ŋkeke gbãtɔ enye takpegbe kɔkɔe, miawɔ asinudɔa ɖeke o.

³⁶Ŋkeke adre miasa dzovɔ na Yehowa. Ŋkeke enyilia nanye takpegbe kɔkɔe na mi, eye miasa dzovɔ na Yehowa; takpegbe wònye, miawɔ asinudɔa ɖeke o.

³⁷Esiawo nye Yehowa ƒe ŋkekenyuie, siwo miade gbe ƒãe be takpegbe kɔkɔewo, eye miasa dzovɔ na Yehowa, numevɔ, nuɖuvɔ, akpedavɔ kple nunovɔ; ŋkeke sia ŋkeke kple etɔ,

³⁸hekpe de Yehowa ƒe dzudzɔgbewo, miaƒe nunanawo, miaƒe adzɔgbeɖeɖewo katã kple nusiwo katã miana le mia dokui si hena Yehowa la ŋuti.

³⁹Ne mieƒo anyigba dzi nu ʋaʋãwo nu ƒu la, ekema miaɖu Yehowa ƒe ŋkekenyuie la, le ɣleti adrelia ƒe ŋkeke wuiatɔ̃lia dzi, ŋkeke adre sɔŋ; ŋkeke gbãtɔ nanye dzudzɔgbe, eye ŋkeke enyilia hã nanye dzudzɔgbe.

⁴⁰Le ŋkeke gbãtɔ dzi miatsɔ atikutsetse nyuitɔwo, eye mialã ɖeʋayawo, ati, siwo ƒe aŋgbawo ɖo, ƒe alɔwo kple amuti ƒe alɔwo, eye miakpɔ dzidzɔ le Yehowa, mia Mawu ŋku me ŋkeke adre sɔŋ.

⁴¹Eye miaɖui wòanye ŋkekenyuie na Yehowa ŋkeke adre sɔŋ le ƒe ɖeka me. Ɖoɖo mavɔ wòanye na miaƒe dzidzimeviwo, ɣleti adrelia me miaɖui.

⁴²Mianɔ agbadɔwo me ŋkeke adre sɔŋ, Israeltɔwo katã nana agbadɔwo me,

⁴³bena miaƒe dzidzimeviwo nanyae bena, esi mekplɔ Israel-viwo tso Egipte-nyigba dzi la, mena wono agbadɔwo me, nye Yehowa, mia Mawu.

⁴⁴Eye Mose gblɔ Yehowa ƒe ŋkekenyuieawo na Israel-viwo.