Read ewe Mose III 6 Bible Online

Mose III 6 - ewe bible

Mose III 6

¹Eye Yehowa ƒo nu kple Mose gblɔ bena:

²De se na Aron kple viaŋutsuawo be: Esia enye numevɔsa la ŋuti se: Dzo nanɔ bibim ɖe numevɔsa la ŋu zã blibo la katã, vaseɖe esime ŋu nake. Ale dzo la nanɔ bibi dzi ɖaa le vɔsamlekpui la dzi.

³Nunɔla nado eƒe awu ʋlaya viawo, eye wòado agbotɛ ɣiawo ɖe eƒe ama; emegbe wòala afi, siwo numevɔsa ƒe dzo nyẽ la le vɔsamlekpui la dzi akɔ ɖe vɔsamlekpui la xa.

⁴Eyome wòaɖe eƒe awuawo ɖi, ado awu bubuwo, eye wòatsɔ afi la aƒu gbe ɖe asaɖa godo le teƒe kɔkɔea ɖe.

⁵Dzo la nanɔ bibim le vɔsamlekpui la dzi ɖaa, eye womatsii o; ŋdi sia ŋdi nunɔla nade nake dzo la me, eye wòatsɔ numevɔsalã aɖo edzi, eye woatɔ dzo akpedavɔsa ƒe amiwo le edzi.

⁶Dzo nanɔ bibim le vɔsamlekpui la dzi ɖaa, eye womatsii o.

⁷Esia nye nuɖuvɔsa ŋu se: Aron viŋutsuwo natsɔe ava vɔsamlekpui la gbɔ, le Yehowa ƒe ŋku me.

⁸Eye woaku nuɖuvɔsa ƒe wɔ memee, si dzi ami le la, asiʋlo ɖeka akpe ɖe dzudzɔdonu la katã, si le nuɖuvɔsa dzi la ŋuti, eye woatɔ dzo wo le vɔsamlekpui la dzi, be wòaʋẽ lilili ɖe Yehowa hena ŋkuɖoɖo dzi.

⁹Ke Aron kple viaŋutsu wo naɖu mamlea, nu maʋamaʋã wòanye woaɖu le teƒe kɔkɔe la; Mawu ƒe agbadɔ la ƒe kpɔ me woaɖui le.

¹⁰Womatsɔ amɔwɔ ʋaʋã aƒoe o, elabena nye dzovɔsa me meɖee le na wo, nu kɔkɔewo ƒe nu kɔkɔe wònye abe nuvɔ̃ŋutivɔsa kple fɔɖiŋutivɔsa ene.

¹¹Aron viŋutsuwo katã kpɔ mɔ aɖui. Ɖoɖo mavɔ wònye le Yehowa ƒe dzovɔsa la ŋu hena miaƒe dzidzimeviwo. Amesiame, si aka asi eŋu la, azu kɔkɔe.

¹²Eye Yehowa ƒo nu kple Mose gblɔ bena:

¹³Esia enye vɔ, si Aron kple viaŋutsuwo asa na Yehowa le gbesigbe wòsi ami nɛ: Wɔ memee eta ƒe mamã ewoliawo ɖeka woatsɔ asa nuɖuvɔe gbesiagbe; woatsɔ wɔ la ƒe afã asa vɔe le ŋdi, eye afã le fiẽ.

¹⁴Tsɔ ami blui, eye natɔe le agba me, emegbe naflii, hafi atsɔ asa nuɖuvɔ lae, bena wòaʋẽ lilili ɖe Yehowa.

¹⁵Eye nunɔla, si teƒe wole ami sim na viaŋutsuwo dometɔ ɖeka ɖo la, nawɔ nusiawo; ɖoɖo mavɔ wòanye, eye woatɔ dzo wo bliboe na Yehowa.

¹⁶Woatɔ dzo nunɔlawo ƒe nuɖuvɔsawo katã bliboe, eye womaɖui o.

¹⁷Eye Yehowa ƒo nu kple Mose gblɔ bena:

¹⁸Gblɔ na Aron kple viaŋutsuwo be: Esia enye nuvɔ̃ŋutivɔsa ŋu se: Woawu nuvɔ̃ŋutivɔsalã ɖe afisi wowua numevɔsalã ɖo, le Yehowa ƒe ŋku me; elabena nu kɔkɔewo ƒe nu kɔkɔe wònye.

¹⁹Nunɔla, si sa nuvɔ̃ŋutivɔa la, kpɔ mɔ aɖui le teƒe kɔkɔe la, le Mawu ƒe agbadɔ la ƒe kpo me.

²⁰Amesiame, si aka asi eƒe lã ŋu la, azu kɔkɔe, eye ne eƒe ʋu hlẽ ɖe amea ɖe ƒe awu ŋu la, ekema wòanya afisi wòhlẽ ɖo la, le teƒe kɔkɔe la.

²¹Ne woɖae le ze me la, ekema woagbã ze la, ke nenye gaze me woɖae le la, ekema woaklɔe, eye woakpalae kple tsi.

²²Ŋutsu sia ŋutsu, si nye nunɔla la, kpɔ mɔ aɖui, elabena nu kɔkɔewo ƒe nu kɔkɔe wònye.

²³Gake womekpɔ mɔ aɖu nuvɔ̃ŋutivɔsalã, si ƒe ʋu wotsɔ yi Mawu ƒe agbadɔ me, be woatsɔ alé avui le kɔkɔeƒea me la, ƒe lã o, boŋ woatɔ dzoe.