Read ewe Yeremya 10 Bible Online

Yeremya 10 - ewe bible

Yeremya 10

¹Mi Israel ƒe aƒe, mise nya, si Yehowa gblɔ ɖe mia ŋu!

²Ale Yehowa gblɔ esi: Dukɔwo ƒe mɔ megamã mi o, eye dziƒo ŋu dzesiwo megadzi ŋɔ na mi o, nenye be, wonɔa ŋɔ dzim na dukɔwo hã.

³Elabena dukɔwo ƒe ɖoɖowo la, nu dzodzroe. Ati wònye wotso le ave me, eye aɖaŋua tsɔ fiavi wɔ eŋu dɔe.

⁴Wotso klosalo kple sika ɖo atsyɔ̃ ne, eye wotso zu ƒo gatagbadzɛ ɖee, be magamũ o.

⁵Woɖi xenyãnu le adzamatregble me, eye womate ŋu aƒo nu o; ele be, woatso wo, elabena womezɔa azɔli o. Migavɔ̃ wo o, elabena womewɔa vɔ̃a ɖeke o, eye nyuiwɔwɔ hã mele wo ŋu o.

⁶Yehowa, amea ɖeke mede nuwo o, èlolo, eye wò ŋusẽ na wò ŋkɔ lolo.

⁷Dukɔwo ƒe fia, amekae mavɔ̃ wò o ma? Elabena wòe wòdze; elabena amea ɖeke mele dukɔwo ƒe nunyalawo katã kple woƒe fiaɖuƒewo katã dome, si le abe wò ene o.

⁸Wo katã wodzɔ lã, eye wòzu bometsilawo; wohe to na legbawo, ati wonye.

⁹Wotsɔ klosalo, si woƒo gbabɛ la, tso Tarsis vɛ, kple sika tso Ofir; aɖaŋua ƒe dɔwɔwɔ wònye kple sikanutula ƒe asinudɔwɔwɔ, woƒe avɔtata nye aɖabɛ blɔtɔ kple dzĩtɔ; aɖaŋua ƒe dɔwɔwɔ wo katã wonye!

¹⁰Ke Yehowa enye Mawu vava; eyae nye Mawu gbagbe kple fia mavɔ; anyigba ʋuʋu le eƒe dɔmedzoe nu, eye eƒe dziku menya le tsɔtsɔm na dukɔwo o.

¹¹Ale miagblɔ na wo enye si: Mawu, siwo mewo dziƒoa kple anyigba o la, wo nu ayi tso anyigba dzi kple dziƒo te.

¹²Eyae nye amesi tsɔ eƒe ŋusẽ wɔ anyigba, etsɔ eƒe nunya ɖo xexeame te, eye wotsɔ eƒe sidzedze keke dziƒo me.

¹³Eƒe gbeɖeɖe nana tsiwo ɖina hoo le dziƒo, eye wònana alũ hona yia dzi le anyigba ƒe mlɔenu: ewɔa dzikedzo kpena ɖe tsidzadza ŋu, eye wòɖea ya donae tsoa eƒe nudzraɖoƒe.

¹⁴Amegbetɔwo katã dzɔa lã le woƒe nunyanya me, eye ŋukpe léa legbakɔlawo katã, elabena alakpa enye nusi wokɔna, eye gbɔgbɔa ɖeke menɔa eme o.

¹⁵Nu dzodzroawo wonye, dɔwɔwɔ, si ŋu woaɖe alɔme le la, wonye, woatsrɔ̃ le woƒe tohegbe.

¹⁶Ke Yakob ƒe gome mele abe woamawo ene o, elabena eya nye nuwo katã wɔla, eye Israel enye eya ŋutɔ ƒe ƒome; Yehowa Zebaot enye eƒe ŋkɔ.

¹⁷Wò amesi woɖe to ɖo, kɔ wò agba dzoe le anyigba dzi.

¹⁸Elabena ale Yehowa gblɔ esi: Kpɔ ɖa, matsɔ anyigba dzinɔlawo aƒu gbe, eye mana woaɖe to ɖe wo, be asi natu wo.

¹⁹Baba nam le nye gbegblẽ la ta, nye abi le veyem! Ke mebe; Fukpekpe la tɔnyee, mado dzi atsɔe.

²⁰Wogblẽ nye agbadɔ, eye wotso nye atagbiwo katã. Vinyewo dzo le gbɔnye, eye womegali o. Amea ɖeke meli, si agatu nye agbadɔ nam, eye woatsi nye agbadɔvɔwo o.

²¹Lãkplɔviwo katã dzɔ lã, eye womedi Yehowa yome mɔ o; eyata medze edzi na wo o, eye woƒe lãhawo katã ka hlẽ.

²²Fu to anyi, nane le ɖiɖim gbɔna, eye howɔwɔ gã tso anyiehe-nyigba dzi, ne wòado gbegbe Yuda-duwo, ne woazu amegãxiwo nɔƒe!

²³Yehowa, menyae be, amegbetɔ ƒe mo kple ŋutsu ƒe zɔzɔme la menye eya ŋuta si me wòle, ne eƒe azɔlime nato ma ɖeka o.

²⁴Yehowa, he to nam, ke megagbɔ me o, eye menye le wò dɔmedzoe me, be natsrɔ̃m ɖa o.“

²⁵Trɔ wò dɔmedzoe kɔ ɖe dukɔ, siwo medze si wò o, kple ƒome, siwo meyɔ wò ŋkɔ o la dzi, elabena woɖu Yakob, ẽ, woɖui petepete, eye wogblẽ eƒe nɔƒewo.