Read ewe Yeremya 15 Bible Online

Yeremya 15 - ewe bible

Yeremya 15

¹Tete Yehowa gblɔ nam bena: Ne Mose kple Samuel wotsi tre ɖe ŋkunye me hã la, nye dzi matrɔ ɖe dukɔ sia ŋu o. Nyã wo ɖa le ŋkunye me, ne woadzo.

²Eye ne wogblɔ na wò be, afika yi ge yewoala hã la, ekema ɖo ŋu na wo be: Ale Yehowa gblɔ esi: Amesi woɖo ɖi na ku la, neyi ku gbɔ, amesi woɖo ɖi na yi la, neyi yi gbɔ, amesi woɖo ɖi na dɔwuame la, neyi dɔwuame gbɔ, eye amesi woɖo ɖi na aboyo la, neyi aboyome.

³Ale Yehowa gblɔ esi: Maɖo nu ene ƒomevi ɖe wo ŋu: Yi, ne wòawu wo, avũ wo, ne woahe wo dranyidranyi, dziƒoxewo kple gbemelãwo, ne woaɖu wo, eye woatsrɔ̃ wo.

⁴Eye mana woanye bibi na anyigba dzi fiaɖuƒewo katã le Yuda-fia Xizkiya vi Manase ta, le nusi wòwɔ le Yerusalem la ŋuti.

⁵Elabena Yerusalem, ameka akpɔ nublanui na wò, ameka ado baba na wò, eye ameka ava gbɔwò abia wò lãme ta ase?

⁶Yehowa be: Egbem, eye nède megbe, eyata mado nye asi ɖa ɖe ŋuwò, eye matsrɔ̃ wò, nublanuikpɔkpɔ tim.

⁷Eyata matsɔ lugbɔnu agbɔ wò le anyigba la ƒe agbowo nu, maɖe vi lé nye dukɔ, si gbe tɔtrɔ tso eƒe mɔwo dzi la ŋu, eye matsrɔ̃e.

⁸Woƒe ahosiwo asɔ gbɔ wu ƒutake; makplɔ nugblẽla aƒu ɖekakpuiwo dada le ŋdɔkutsu dzatsɛ, mana vɔvɔ̃ kple ŋɔdzi nava wo dzi kpoyi.

⁹Nu te vi adre nɔ ŋu, eye eƒe luʋɔ dzo le eme; eƒe ɣe ɖo to le keli me, ŋukpe lée, eye eƒe mo tsi dã; matsɔ eƒe ame susɔeawo ade asi na yi le eƒe futɔwo nu, Yehowa ye gblɔe.

¹⁰Danye, baba nam be, nèdzi nye, amesi ŋu xexeame blibo la le avu kple dzre wɔm ɖo! Nyemedo nugbana o, eye amea ɖeke medo agbana nam o tso, hafi wo katã wole ɖiŋu dom nam.

¹¹Yehowa be: Vava, mali ke wò hena nyuie, vava, mana ketɔ la naƒo koko na wò le dzɔgbevɔ̃eɣi kple hiãɣi.

¹²Ɖe gayibɔ aŋe gayibɔ kple akɔbli, siwo tso anyiehea?

¹³Matsɔ wò kesinɔnuwo kple wò nu xɔasiwo ana woaha, eye womaxe fe ɖe wo ta o, le wò nuvɔ̃, siwo katã nèwɔ le wò anyigbawo katã dzi la ta,

¹⁴eye mana nasubɔ wò futɔwo le anyigba, si mènya o la dzi. Elabena dzo le bibim le nye dɔmedzoe me, miawo ŋue wòle bibim ɖo.

¹⁵Yehowa, ènyae, ɖo ŋku dzinye, eye naɖe ŋku ɖe ŋunye, netsɔ nabia hlɔ̃ yonyemetilawo nam; megawɔ nu ɖewo dzigbɔgbɔ blewu la nu o; tso nam, eye nanyae be, tawòe ŋukpe le dzinye ɖo.

¹⁶Esi wò nyawo ɖo gbɔnye la, memi wo, eye wò nyawo nye vivisese kple dzidzɔ na nye dzi, elabena wo ŋkɔe woyɔ ɖe ŋunye, Yehowa, Mawu Zebaot.

¹⁷Nyemebɔbɔ nɔ nukolawo dome le dzidzɔ kpɔm o, ke boŋ nye ɖeka mebɔbɔ no aga le wò alɔ ta, elabena ètsɔ dziku yɔ menye fũ.

¹⁸Nukaŋuti nye vevesesewo anɔ anyi ɖaa, eye nye abiwo anye abi vɔ̃e agbe kuku? Ezu nam abe tɔʋu, si blea ame, kple tsi, si metɔna ɖi o la ene.

¹⁹Eyata ale Yehowa gblɔ esi: Ne ètrɔ ɖe ŋunye la, matrɔ ɖe ŋuwò, eye atsi tre ɖe ŋkunye me. Eye ne eɖe nu nyuiwo ɖe go, menye gbegblẽawo o la, ekema anye nye nu; woawo atrɔ ɖe ŋuwò, ke wòa matrɔ ɖe wo ŋu o.

²⁰Yehowa be: Matsɔ wò awɔ, akɔbligli sesẽ na dukɔ sia, eye ne wowɔ aʋa kpli wò la, womakpe dziwò o, elabena meli kpli wò, ne maxɔ na wò, eye maɖe wò;

²¹maɖe wò le ame vɔ̃ɖiwo si me, eye maxɔ wò le ŋutasẽlawo ƒe fego me.