Read ewe Yeremya 2 Bible Online

Yeremya 2 - ewe bible

Yeremya 2

¹Eye Yehowa ƒe gbe va gbɔnye bena:

²Yi ɖaɖe gbe ƒã ɖe Yerusalem ƒe to me bena: Ale Yehowa gblɔ esi: Meɖo ŋu wò ɖetugbime dɔmenyo kple wò ŋugbetɔnyenye ƒe lɔlɔ̃ na wò, esime nekplɔm ɖo to gbedadaƒo, to anyigba, si dzi womeƒãa nu ɖo o.

³Yehowa be: Israel le kɔkɔe na Yehowa, eƒe agblemenu gbãtɔwo wonye; amesiwo katã ɖui la, kpɔe ɖe enu; dzɔgbevɔ̃e va wo dzi!

⁴Mi Yakob ƒe aƒe kple Israel ƒe aƒe ƒe ƒomeawo katã, mise Yehowa ƒe nya!

⁵Ale Yehowa gblɔ esi: Nu manyo ka mia fofowo kpɔ le ŋunye, be wode megbe le ŋunye, eye wodze ya nuwo yome hezu tofloko?

⁶Eye womegblɔ be: Afika Yehowa, amesi kplɔ mí tso Egipte-nyigba dzi la le hã o; eya amesi kplɔ mí to gbe dzi, to kuɖiɖinyigba kple blukɔ tsiɖitsiɖi ƒe anyigba dzi, to anyigba, si dzi amea ɖeke metona o, afisi amegbetɔa ɖeke mele o la dzi.

⁷Eye mekplɔ mi va anyigba wɔnu dzi, be miaɖu eƒe kutsetsewo kple eƒe nu nyuiwo; ke miawo mieva hedo gu nye anyigba la, eye mietsɔ nye domenyinu la wɔ ŋunyɔnui.

⁸Nunɔlawo megblɔ be. Afika Yehowa le hã o. Amesiwo si me se la le la, menyam o, eye lãkplɔviwo dze aglã ɖe ŋunye, nyagblɔɖilawo gblɔ nya ɖi le Baal ƒe ŋkɔ me, eye wodze nusiwo mele ɖeke me o la yome.

⁹Yehowa be: Eyata magawɔ dzre kpli mi, eye mawɔ dzre kple mia viwo ƒe viwo.

¹⁰Miyi Kititɔwo ƒe ƒukpowo dzi, eye mikpɔ nu; miɖo ame ɖe Kedar, eye mido ŋku anyi nyuie, ne miakpɔ be, esia tɔgbe dzɔ kpɔ mahã?

¹¹Ɖe dukɔa ɖe ɖɔ ti eƒe mawuwoa? Evɔ wònye menye Mawu wonye o hafi. Ke nye dukɔ ya tsɔ eƒe ŋutikɔkɔe ɖɔ li nusi mele ɖeke me o lae.

¹²Yehowa be: Dziƒowo, miaƒe nu neku le esia la, miaƒe lãme neble fu, eye miaƒe mo newɔ yaa.

¹³Elabena nye dukɔ wɔ vɔ̃ ƒomevi eve: wogblẽ nye, amesi nye tsi gbagbe vudo la ɖi, be woaɖe tsido na woawo ŋutɔ ɖokui, tsido, siwo gɔme ŋɔ, tsi mate ŋu anɔ wo me o.

¹⁴Kluvie nye Israel loo alo aƒeviea? Nukaŋuti wòtrɔ zu aboyome?

¹⁵Dzatawo xlɔ̃ ɖe eŋu, eye woɖe gbe; wowɔ eƒe anyigba wòzu gbegbe, wogbã eƒe du wòzu aƒedo.

¹⁶Nof-viwo kple Taxpanes-viwo hã woaɖu gbe le wò dzodome.

¹⁷Ɖe esia medza de dziwò, le esi nègblẽ Yehowa, wò Mawu ɖi le ɣeyiɣi, si me wònye kplɔwòla le mɔta la ŋuti oa?

¹⁸Azɔ nya ka le mia kple Egipte-mɔ dome, be naɖano Nil me tsi? Eye nya ka le mia kple Asur-mɔ dome, be naɖano Frat me tsi?

¹⁹Wò vɔɖinyenye aka mo na wo, eye wò godzedze ahe to na wò, ne nadze sii, eye nakpɔ, alesi wòvɔ̃ɖii, eye wòvenae be, nègblẽ Yehowa, wò Mawu la ɖi, eye vɔvɔ̃a ɖeke mele ŋunye na wò o, Aƒetɔ Yehowa Zebaot ye gblɔe!

²⁰Elabena tso gbaɖegbe ke nèŋe wò kɔkuti, eye nètso wò kawo gblɔ bena, yemasubɔ o. Elabena ènye ahasitɔ mlɔ togbɛ kɔkɔwo katã dzi kple ati damawo katã gɔme.

²¹Weinka nyuitɔ tso ka vavãtɔwo dome nenye metsɔ do, ke aleke wɔ nètrɔ zu nuka ƒe abɔwo nam?

²²Aƒetɔ Yehowa be: Ne èle aɖitsi lem, eye nèle adzalẽ geɖe ŋu dɔ wɔm hã, wò vodadawo nye ɖiƒoƒo le ŋkunye me

²³Aleke nagblɔ be, yemegblẽ ye ɖokui ŋu o, yemedze Baal yome o? Lé ŋku ɖe wò azɔlime ŋu le bali la me, eye nadze si nusi nèwɔ la, kposɔnɔ ɖidu, si le tsa glãla tsam le eƒe mɔ dzi la, nènye.

²⁴Gbetedzinɔ, si gbegbe ma, eye wòle gbɔgbɔm fuxefuxe ɖe eƒe luʋɔ ƒe nudzodzro ŋuti la, ameka ate ŋu axe mɔ na eƒe asiyɔyɔ? Amesiwo katã be, yewoadii la, womadze agbagbaa ɖeke o, ne eƒe dzinu nya ɖo dzi ko la, woakpɔe.

²⁵Kpɔ wò afɔ dzi, be magatsi ƒeƒle o, kple wò ve me dzi, be tsikɔ magawui o! Ke wò la, ele gbɔgblɔm be: Dzodzroe, kpao! Elabena melɔ̃ amedzrowo, eye woawo yome madze.

²⁶Alesi ne asi lu fiafi ŋu kpenɛ la, nenema ŋu akpe Israel ƒe aƒe la hekpe ɖe woƒe fiawo, amegãwo, nunɔlawo kple nyagblɔɖilawo ŋu,

²⁷amesiwo le gbɔgblɔm na ati be: Wòe nye mía fofo, eye na kpe be: Wòe dzi mí. Elabena wòtrɔ ʋume dem, eye menye ŋku me o; ke wole gbɔgblɔm le woƒe hiãɣi be: Tso naɖe mí!

²⁸Ke afika wò mawu, siwo nèwɔna ɖokuiwò la le? Woawo nètso kpɔ, be woate ŋu aɖe wò le wò hiãɣi la hã? Yuda, elabena alesi wò duwo sɔ gbɔe la, nenema wò mawuwo sɔ gbɔe!

²⁹Yehowa be: Nukaŋuti miele dzre wɔm kplim? Mi katã mieto vo ɖe ŋunye.

³⁰Yakatsyɔ meƒo mia viwo, wodo toku tohehe la. Miaƒe yi ɖu miaƒe nyagblɔɖilawo abe dzata vuvunu ene.

³¹Oo, dzidzime ka miehenye! Milé ŋku ɖe Yehowa ƒe nya ŋu. Gbegbe menye na Israel loo, alo anyigba doblukɔ tsiɖitsiɖia? Nukaŋuti nye dukɔ le gbɔgblɔm be: Miele tsa glãla tsam, eye míagava gbɔwò o?

³²Ɖe ɖetugbi aŋlɔ eƒe atsyɔ̃ɖoɖo be, eye ŋugbetɔ aŋlɔ eƒe alidziblanu bea? Ke nye dukɔ ŋlɔm be, ŋkekeawo mele xexlẽ me o.

³³Aleke nèle ami ɖem ɖe wò zɔzɔme ŋu, be nati ahasiwɔwɔ yome? Eyata wò zɔzɔme ma wò ɖe vɔ̃ɖiwɔwɔ ŋu.

³⁴Ame maɖifɔ dahewo ƒe ʋu hã le wò avɔ toga. Menye fifiƒe mekpɔ wò le o, ke boŋ le teƒe siawo katã.

³⁵Ke wò la egblɔ be, yemeɖi tɔ o, eƒe dɔmedzoe fa ɖe ye ŋu vava! Kpɔ ɖa, mía kpli wò miaɖi ʋɔnu, le esi negblɔ be, yemewɔ nuvɔ̃ o la ta.

³⁶Nukaŋuti nèwɔ kaba, be natrɔ wò azɔlime? Ŋu akpe wò ɖe Egipte hã ŋu, abe alesi ŋu kpe wò ɖe Asur ŋui ene.

³⁷Adzo tso alima, eye nakpla asi ta. Elabena Yehowa gbe amesiwo ŋu nele dzi ɖom ɖo la, eye madze edzi na mia kpli wo o.