Read ewe Yeremya 22 Bible Online

Yeremya 22 - ewe bible

Yeremya 22

¹Ale Yehowa gblɔ esi: Yi Yuda-fia ƒe me, eye nagblɔ nya siawo le afima be:

²Wò Yuda-fia, amesi bɔbɔ nɔ Dawid ƒe zikpui dzi, mia kple wò dɔlawo kple wò dukɔ, si gena ɖe agba siawo me, mise Yehowa ƒe nya!

³Ale Yehowa gblɔ esi: Midrɔ̃ ʋɔnu ɖe eteƒe, eye miwɔ nu dzɔdzɔe, mixɔ amesi woda adzoe la, tso ŋutasẽla si me; migate amedzrowo, tsyɔ̃eviwo kple ahosiwo ɖe anyi o, migawɔ funyafunyawo o, eye migakɔ ʋu maɖifɔ ɖe teƒe sia o.

⁴Elabena ne miewɔ nu ɖe nya siawo nu la, ekema fia, siwo abɔbɔ nɔ Dawid ƒe zikpui dzi la, aɖo tasiaɖam, eye woaɖo sɔ age ɖe aƒe sia ƒe agbowo me, woawo kple woƒe dɔlawo kple woƒe dukɔ siaa.

⁵Yehowa be: Ke ne mieɖo to nya siawo o la, ekema metà ɖokuinye ƒe agbe: Ne aƒe sia mazu aƒedo o fĩ!

⁶Elabena ale Yehowa gblɔ ɖe Yuda-fia ƒe aƒe ŋu enye si: Gilead kple Libanon-ta me nènye nam, ke mawɔ wò nazu gbegbe kple du ɖiaƒedo.

⁷Eye maɖo nugblẽlawo ɖe ŋuwò, eye wo dometɔ ɖesiaɖe atsɔ eƒe lãnu alã Libanon ƒe sederti nyuitɔwo ahatsɔ de dzo me.

⁸Eye dukɔ geɖewo ava to du sia ŋu ayi, eye woagblɔ na wo nɔewo bena: Nukata Yehowa wɔ du gã sia alea ɖo?

⁹Eye woaɖo ŋu bena: Elabena wogblẽ Yehowa, woƒe Mawu ƒe nubabla ɖi, eye wode ta agu na mawu tutɔwo hesubɔ wo.

¹⁰Megafa avi ɖe ame kuku ŋu o, eye megafa nɛ o, ke boŋ fa avi ɖe amesi ʋu dzo la ŋu, elabena megale tɔtrɔ ge agbɔ o, eye megale wo denyigba kpɔ ge o.

¹¹Elabena ale Yehowa gblɔ ɖe Yuda-fia Salum, Yosiya vi, amesi ɖu fia ɖe fofoa Yosiya teƒe, eye wòʋu dzo tso teƒe sia la ŋu enye si: Magatrɔ gbɔ va afisia o,

¹²ke boŋ afisi woɖe aboyoe yi la, afima wòaku ɖo, eye magakpɔ anyigba sia o.

¹³Baba na amesi le eƒe xɔ tum le madzɔmadzɔnyenye me, eye eƒe dziƒoxɔ le vɔ̃ɖinyenye me, amesi nana ehavi wɔa dɔ ne yaka, eye mexea eƒe dɔwɔfe nɛ o;

¹⁴eya amesi gblɔna be: Matu xɔ gãwo kple dziƒoxɔ kekewo, made fesrewo wo nu, maklã sederʋuƒowo ɖe wo me, eve masi aŋɔ dze na wo!

¹⁵Ne ele aɖika dom le sedertiwo me la, ɖe nèbuna be, eyae nye fianyenyea? Fofowò hã ɖu nu, eye wono nu, ke edrɔ̃ ʋɔnu ɖe eteƒe, eye wòwɔ nu dzɔdzɔe, eye eme nyo nɛ.

¹⁶Etso na hiãtɔwo kple ame dahewo, eyata eme nyo nɛ. Yehowa be: Ɖe menye esia woyɔna be sidzedzem oa?

¹⁷Elabena wò ŋku kple wò dzi le viɖe kple ame maɖifɔ ƒe ʋu kɔkɔɖeanyi kple ŋutasesẽ kpakple fuwɔame ko ŋu.

¹⁸Eyata ale Yehowa gblɔ ɖe Yuda-fia Yoyakim, Yosiya vi la ŋu enye si: Womafa nɛ be: „Ao, nɔvinyeŋutsu, ao, nɔvinyenyɔnu“ o! Eye womafa nɛ be: „Ao, nye aƒetɔ, ao, eƒe atsyɔ̃“ o!

¹⁹Woaɖii abe tedzi ene, woatee le anyigba atsɔ aƒu gbe ɖe adzɔge tso Yerusalem ƒe agbowo gbɔ.

²⁰De Libanon dzi nado ɣli, eye na wò gbe naɖi le Basan; do ɣli tso Abarim dzi, elabena wogbã wò ahiãviwo katã nyanyanya!

²¹Esi nèli bɔkɔɔ la, meƒo nu kpli wò, ke ègblɔ be, yemasee o; esia nye wò nɔnɔme tso wò ɖevime ke, be nègbe toɖoɖo nye gbe.

²²Ya akplɔ wò lãkplɔviwo katã, eye wò ahiãviwo ayi aboyo me; ŋu akpe wò, eye wò mo atsi dã le wò nu vɔ̃ɖi wɔwɔ ta.

²³Wò amesi tso aƒe ɖe Libanon dzi, eye nèwɔ ato ɖe sedertiwo me, ne vevesese ƒo ɖe dziwo, eye nèlé ku abe nyɔnu, si le vi dzim ene la, aleke màhaɖe hũi o!

²⁴Yehowa be: Mefa ɖokuinye ƒe agbe: Ɖe wònye ŋkosigɛ nye Yuda-fia Xonya, Yoyakim vi la, le nye ɖusi la, anye ne maɖee aƒu gbe tso gama,

²⁵ahatsɔ wò ade asi na amesiwo le wò ku dim, kple amesiwo le ŋɔ dzim na wò, eye matsɔ wò ade asi na Babel-fia Nebukadnezar kple Kaldeatɔwo.

²⁶Matsɔ mia kple dawo, si dzi wò la, aƒu gbe ɖe anyigba tutɔ dzi, afisi womedzi mi ɖo o, eye miaku ɖe gama;

²⁷eye womagbugbɔ ayi anyigba, si dzi yiyi le wo dzrom la dzi o.

²⁸Ɖe ze gbagbã, si ɖi gbɔ, enye Xonya sia loo, alo ze, si ƒe nu menyoa amea ɖeke ŋu o la, wònyea? Nukata wonyã eya kple viawo de gbe, eye wotsɔ wo ƒu gbe ɖe anyigba, si womenya o la dzi?

²⁹Anyigba, anyigba, anyigba, se Yehowa ƒe nya!

³⁰Ale Yehowa gblɔ esi: Miŋlɔ ŋutsu sia ɖi be, medzi vi o, enye ŋutsu, si naneke medze dzi na le eƒe agbe me o; elabena madze dzi na viawo dometɔa ɖeke, be wòabɔbɔ nɔ Dawid ƒe fiazikpui dzi ahaɖu le Yuda akpa o.