Read ewe Yeremya 25 Bible Online

Yeremya 25 - ewe bible

Yeremya 25

¹Esia nye gbe, si va na Yeremya ɖe Yuda-dukɔ blibo la ŋu le Yuda-fia Yoyakim, Yosiya vi ƒe ƒe enelia, si nye Babel-fia Nebukadnezar ƒe ƒe gbãtɔ me,

²gbe, si nyagblɔɖila Yeremya to na Yuda-dukɔ blibo la kple Yerusalemtɔwo katã;

³Yehowa ƒe gbe va nam tso Yuda-fia Yosiya, Amon vi ƒe ƒe wuietɔ̃lia dzi vaseɖe egbe, ƒe blave vo etɔ̃ sɔŋ nye esi, eye meƒo nu kpli mi ɖaa atraɖi; ke mieɖo to o.

⁴Eye Yehowa ɖo eƒe dɔlawo katã, siwo nye nyagblɔɖilawo ɖe mi, eɖo wo ɖe mi ɖaa atraɖi: ke mieɖo to o, eye mieƒu to anyi, be miase nu o.

⁵Egblɔ bena. Amesiame netrɔ tso eƒe mɔ vɔ̃wo dzi kple eƒe nuwɔna vɔ̃ɖiwo me, ne miano anyigba, si Yehowa tsa na mia kple mia fofowo tso mavɔ me yi mavɔ me la dzi.

⁶Migadze mawu fufuwo yome, ne miasubɔ wo ahade ta agu na wo o, eye migatsɔ miaƒe asinudɔwɔwɔwo do dziku nam o, ekema nyemawɔ vɔ̃a ɖeke mi o.

⁷Yehowa be: Ke miegbe toɖoɖom, ne miatsɔ miaƒe asinudɔwɔwɔwo ado dziku nam hena miaƒe gbegblẽ.

⁸Eyata ale Yehowa Zebaot gblɔ esi: Esi miegbe toɖoɖo nye nyawo la,

⁹eyata, kpɔ ɖa, makplɔ anyiehe ƒomeawo katã kple nye dɔla Babel-fia Nebukaɖnezar vɛ, eye mana woava ƒo ɖe anyigba sia kple edzinɔlawo kple dukɔ sia katã dzi godoo, matsrɔ̃ wo gbidigbidi, eye matsɔ wo awɔ bibi, alɔmeɖenu kple aƒedoe tegbee; Yehowa ye gblɔe!

¹⁰Eye matsi aseyetsotso ƒe ɖiɖi kple dzidzɔ ƒe ɖiɖi, ŋugbetɔsrɔ̃ ƒe gbe kple ŋugbetɔ ƒe gbe, tetutu ƒe ɖiɖi kple akaɖi ƒe keklẽ nu le wo dome.

¹¹Anyigba sia azu aƒedo kple gbegbe, eye dukɔ sia asubɔ Babel-fia ƒe blaadre sɔŋ.

¹²Yehowa be: Ne ƒe blaadre la de vɔ la, ekema mahe to na Babel-fia kple dukɔ ma kpakple Kaldea-nyigba le woƒe vodada ta, eye matsɔe awɔ gbegbee ɖikaa.

¹³Eye mana nye nya, siwo katã megblɔ ɖe anyigba ma ŋu la, nava edzi; nya, siwo katã Yeremya gblɔ ɖi ɖe dukɔwo katã ŋu woŋlɔ ɖe agbalẽ sia me la.

¹⁴Elabena woawo hã asubɔ dukɔ geɖewo kple fia gãwo, eye maɖo eteƒe na wo le woƒe nu wona kple woƒe asinudɔwɔwɔwo nu.

¹⁵Elabena ale Yehowa, Israel ƒe Mawu la, gblɔ nam enye si: Xɔ dɔmedzoe ƒe weinkplu sia le asinye, eye natsɔe na dukɔ, siwo katã gbɔ maɖo wò ɖo la, woano.

¹⁶Eye ne wonoe la, woanɔ mumũm sagãsagã, eye wòadze aɖaʋa le yi, si maɖo ɖe wo dome la ta.

¹⁷Tete mexɔ kplu la le Yehowa si, eye mekpee na dukɔ, siwo katã gbɔ Yehowa ɖom ɖo;

¹⁸na Yerusalem kple Yuda-duwo, woƒe fiawo kple woƒe amegãwo, ne mawɔ wo woazu aƒedo, bibi, alɔmeɖenu kple ɖiŋudonu, abe alesi wòle egbe sia wo ene;

¹⁹na Egipte-fia Farao kple eƒe dɔlawo, eƒe amegãwo kple eƒe dukɔ blibo la;

²⁰na dukɔ tsakatsaka blibo la, Uz-nyigba dzi fiawo katã, Filistitɔwo ƒe anyigba dzi fiawo katã, Askalon, Gaza, Ekron kple Asdod ƒe ame mamleawo;

²¹na Edom, Moab kple Amon-viwo;

²²na Tiro-fiawo katã, Zidon-fiawo katã kple ƒukpowo dzi fia, siwo le atsiaƒu ƒe go keme;

²³na Dedan, Tema, Buz kple akotsolawo katã;

²⁴na Arabia-fiawo katã kple dukɔ tsakatsaka, siwo le gbegbe ƒe fiawo katã;

²⁵na Zimri-fiawo katã, Elam-fiawo katã kple Media-fiawo katã;

²⁶na anyiehe fiawo katã, esiwo le kpuiƒe kple adzɔge tso wo nɔewo gbɔ, kple xexeme fiaɖuƒe, siwo katã le anyigba dzi; eye Sesax-fia anoe ɖe wo yome.

²⁷Eye nagblɔ na wo bena: Ale Yehowa Zebaot, Israel ƒe Mawu la, gblɔ esi: Mino aha miamu, eye miɖe xe, midze anyi, eye migafɔ o, le yi, si maɖo ɖe mia dome la ta.

²⁸Eye ne wogbe be, yewomaxɔ kplu la le asiwò o la, ekema gblɔ na wo be: Ale Yehowa Zebaot gblɔ esi: Mianoe kokoko!

²⁹Elabena keke ɖu, si ŋu woyɔ nye ŋkɔ ɖo ke hã ŋue medze vɔ̃wɔwɔ gɔme ɖo, eye miawo miato le emea? Womagbe tohehe na mi o! Elabena meyɔ yi ɖe anyigbadzitɔwo katã ŋu, Yehowa Zebaot ye gblɔe.

³⁰Eye wò la nagblɔ nya siawo katã ɖi ɖe wo ŋu agblɔ na wo bena: Yehowa le gbe ɖem tso dzi me, eye wòna eƒe gbe ɖi tso eƒe nɔƒe kɔkɔe la me; ele gbe ɖem ɖe eƒe lãnyiƒe ŋu, eye wòtso ayiboopɛɛ abe weinfiãlawo ene ɖe anyigbadzitɔwo katã ŋu.

³¹Howɔwɔ de anyigba ƒe mlɔenu; elabena Yehowa le avu wɔm kple dukɔwo, ele ʋɔnu drɔ̃m ŋutilãwo katã, eye wòatsɔ ame vɔ̃ɖiwo ade asi na yi, Yehowa ye gblɔe.

³²Ale Yehowa Zebaot gblɔ esi: Kpɔ ɖa, dzɔgbevɔ̃e tso dukɔ gbɔ yi dukɔ gbɔ, eye wode zi ahom gã me le anyigba ƒe mlɔenu.

³³Yehowa ƒe amesiwo wowu le ŋkeke ma me la, woanɔ anyi tso anyigba ƒe mlɔenu ɖaseɖe anyigba ƒe mlɔenu; womafa na wo o, womaƒo wo nu ƒu o, eye womaɖi wo o, eye woazu aɖuɖɔ le agble me.

³⁴Mifa avi, mi lãkplɔviwo, mido aƒa, eye miƒo togotogoe, mi lãha ƒe bubumewo, elabena miaƒe azã de, ne woawu mi, eye makaka mi ahlẽ, ne mianɔ abe agba xɔasi, si ge dze anyi ene!

³⁵Sitsoƒe abu ɖe lãkplɔviwo, eye sisi abu ɖe lãha ƒe bubumewo.

³⁶Lãkplɔviwo ƒe ɣli kple lãha ƒe bubumewo ƒe avi le ɖiɖim; elabena Yehowa gblẽ woƒe lãnyiƒe,

³⁷eye gbeɖuƒe, si wovona ɖo la nu yi le Yehowa ƒe dɔmedzoe nu.

³⁸Egblẽ eƒe avegoe ɖi abe dzata ene; elabena woƒe anyigba zu gbegbe le yi gblẽnu kple eƒe dɔmedzoe heliheli nu.