Read ewe Yeremya 32 Bible Online

Yeremya 32 - ewe bible

Yeremya 32

¹Yehowa ƒe gbe, si va na Yeremya le Yuda-fia Zedekiya ƒe ƒe ewolia, si nye Nebukadnezar ƒe ƒe wuienyilia me la, enye si:

²Ɣemaɣi Babel-fia ƒe aʋakɔ ɖe to ɖe Yerusalem, eye wode nyagblɔɖila Yeremya gaxɔ ɖe dzɔlawo ƒe xɔxɔnu, si le Yuda-fia ƒe me.

³Elabena Yuda-fia Zedekiya ye dee gaxɔ me gblɔ bena: Nukaŋuti nègblɔ nya ɖi be: „Ale Yehowa gblɔ esi: Kpɔ ɖa, matsɔ du sia ade asi na Babel-fia, eye wòaxɔe;

⁴Yuda-fia Zedekiya mage le Kaldeatɔwo si me o, ke boŋ woatsɔe ade asi na Babel-fia kokoko, eye wo kpakplii woaƒo nu kple wo nɔewo, eye woakpɔ wo nɔewo ŋku me;

⁵akplɔ Zedekiya ayi Babel, eye wòatsi afima, vaseɖe esime maɖo ŋku edzi, Yehowa ye gblɔe; ne miewɔ aʋa kple Kaldeatɔwo la, madze edzi na mi o.“

⁶Eye Yeremya gblɔ be: Yehowa ƒe gbe va gbɔnye bena:

⁷Kpɔ ɖa, tɔwòɖia Salum vi Xanameel le gbɔwò va ge agblɔ na wò bena: Xɔ nye agble, si le Anatot la ƒle, elabena wò nya wònye, be naxɔe aƒle.

⁸Tete tɔnyeɖia vi Xanameel va gbɔnye le dzɔlawo ƒe xɔxɔnu, abe alesi Yehowa gblɔ ene, eye wògblɔ nam bena: Xɔ nye agble, si le Anatot le Benyamin-nyigba dzi la ƒle, elabena tɔwòe nye domenyinyi la, eye exɔxɔ la, wò nya wònye; xɔe ƒle. Eye medze sii bena, Yehowa ƒe nya wònye.

⁹Ale meƒle agble, si le Anatot la le tɔnyeɖia vi Xanameel si, eye meda klosalo sekel wuiadre nɛ.

¹⁰Meŋlɔe ɖe agbalẽ me, eye metre enu, meɖe ɖasefowo, eye meda ga la le nudanu me.

¹¹Eye metsɔ asinyigbalẽ, si nu wotre, kple esi le ʋuʋu, seawo kple ɖoɖoawo

¹²de asi na Maxseya vi Neriya ƒe vi Barux le nye tɔɖia-yɔvi Xanameel kple ɖasefoawo, amesiwo ŋlɔ ŋkɔ ɖe asinyigbalẽa te la ŋku me kpakple le Yudatɔ, siwo katã le dzɔlawo ƒe xɔxɔnua la ŋku me,

¹³eye mede se na Barux le wo ŋku me bena;

¹⁴Ale Yehowa Zebaot, Israel ƒe Mawu la, gblɔ esi: Tsɔ agbalẽ siawo, asinyigbalẽ, si nu wotre kple esi le ʋuʋu la siaa de ze me, ne woanɔ anyi eteƒe nadidi.

¹⁵Elabena ale Yehowa Zebaot, Israel ƒe Mawu la, gblɔ esi: Woagaƒle xɔwo, agblewo kple weingblewo le anyigbã sia dzi.

¹⁶Eye esi metsɔ asinyigbalẽ la na Barux, Neriya vi la megbe la, medo gbe ɖa na Yehowa gblɔ bena:

¹⁷Oo, Aƒetɔ Yehowa, ètsɔ wò ŋusẽ gã kple wò alɔ, si le dzi la, wo dziƒo kple anyigba, naneke mekpe na wò akpa o,

¹⁸wò amesi ve ame akpe nanewo nu, eye neɖo fofowo ƒe yodadawo teƒe ɖe akɔ me na wo viwo le wo megbe, wò Mawu gã ŋusẽtɔ, si ŋkɔ nye Yehowa Zebaot;

¹⁹amesi ƒe aɖaŋudede kpe, eye eƒe nuwɔwɔ sɔ gbɔ, wò amesi ƒe ŋkuwo le te ɖe amegbetɔviwo ƒe mɔwo katã ŋu, ne nawɔ na amesiame le eƒe mɔwo kple eƒe nuwɔnawo ƒe kutsetse nu;

²⁰wò amesi wɔ dzesiwo kple nukunuwo le Egipte-nyigba dzi ɖe Israel kple amegbetɔwo siaa nu vaseɖe egbe, eye nède ŋkɔ ɖokuiwò ŋu, abe alesi wòle egbe siawo ene,

²¹etso dzesiwo kple nukunuwo, asi sesẽ kple alɔ, si le dzi, kpakple ŋɔdzi gã kplɔ wò dukɔ tso Egipte-nyigba dzi,

²²eye nètsɔ anyigba sia na wo, si ŋu nèka atam ɖo na wo fofowo be, yeatsɔ anyigba, si dzi notsi kple anyitsi ba ɖo la, na wo.

²³Eye wova hexɔe wònye wo tɔ, ke wogbe toɖoɖo wò gbe, womezɔ ɖe wò seawo nu o, eye womewɔ nusiwo katã ŋu nèɖe se le na wo la o; eyata nèna dzɔgbevɔ̃e siawo katã va wo dzi ɖo.

²⁴Kpɔ ɖa, kpoƒuƒu va keke dua ŋu ke, ne woaxɔe, eye woatsɔ du la ade asi na Kaldeatɔ, siwo le aʋa wum kplii, le yi, dɔwuame kple dɔvɔ̃ ta; nya, si nègblɔ la, va me, eye nèle ekpɔm tso,

²⁵hafi wò, Aƒetɔ Yehowa, nègagblɔ nam be: Tsɔ klosalo naƒle agblee, eye naɖo ɖasefowo eŋu, evɔ wònye wole du la tsɔ ge ade asi na Keldeatɔwo hafi!

²⁶Tete Yehowa fe gbe va na Yeremya bena:

²⁷Kpɔ ɖa, nyee nye Yehowa, ŋutilãwo katã ƒe Mawu; ɖe mado kpo nanea?

²⁸Eyata ale Yehowa gblɔ esi: Kpɔ ɖa, matsɔ du sia ade asi na Kaldeatɔwo kple Babel-fia Nebukadnezar, ne wòaxɔe.

²⁹Eye Kaldeatɔ, siwo le aʋa wɔm kple du sia la, age ɖe eme, woatɔ dzo du sia, eye eya kple xɔ, siwo ta me wodo dzudzɔ na Baal, eye woƒo tsi ɖe anyi na mawu tutɔwo le, ne woatsɔ ado dzikui nam la, afiã.

³⁰Elabena Israel-viwo kple Yuda-viwo le nu vɔ̃ɖi ɖeɖe sɔŋ wɔwɔ dzi le ŋkunye me tso woƒe ɖevime ke, elabena Israel-viwo tso woƒe asinudɔwɔwɔwo do dziku nam, Yehowa ye gblɔe.

³¹Elabena du sia do dɔmedzoe kple dziku nam tso gbesigbe wotsoe vaseɖe egbe, ale be mele eɖe ge ɖa le ŋkunye me kokoko,

³²le Israel-viwo kple Yuda-viwo, woƒe fiawo kple woƒe amegãwo, woƒe nunɔlawo kple woƒe nyagblɔɖilawo, Yuda-ŋutsuwo kple Yerusalemtɔwo ƒe nu vɔ̃ɖi, siwo katã wowɔ, ne woatsɔ ado dzikui nam la ta.

³³Wotrɔ ʋume dem, eye menye ŋku me o, womeɖo to o, eye wodo toku ameɖeɖe, evɔ wònye wòfiã nu wo ɖaa atraɖi hafi.

³⁴Wotsɔ woƒe ŋunyɔnuwo ɖo aƒe, si ŋu woyɔ nye ŋkɔ ɖo la me, ne woagblẽ kɔ ɖo nɛ.

³⁵Wowɔ nuxeƒewo na Baal ɖe Ben-Hinom-bali la me, ne wòakɔ woƒe ŋutsuviwo kple woƒe nyɔnuviwo ŋu na Molox, nusi nyemeɖo na wo alo wòayi nye ta me va ge, be woawo ŋunyɔnu sia ahatsɔ ble Yuda ade nuvɔ̃ me o.

³⁶Eyata ale Yehowa, Israel ƒe Mawu la, gblɔ ɖe ɖu, si ŋu miawo miele gbɔgblɔm le be, woatsɔe ade asi na Babel-fia to yi dɔwuame kple dɔvɔ̃ dzi la ŋuti enye si:

³⁷Kpɔ ɖa, maƒo wo nu ƒu atso anyigbawo katã dzi, afisi menyã wo ɖo ɖo le nye dɔmedzoe kple nye dziku kpakple nye nyanyrã gã me, magakplɔ wo ava teƒe sia, eye woanɔ anyi bɔkɔɔ,

³⁸woanye dukɔ nam, eye manye Mawu na wo.

³⁹Mana dzi ɖeka kple mɔ ɖeka wo, ne woavɔ̃m ɣeawo katã ɣi hena woawo ŋutɔ kple wo megbeviwo ƒe nyuie.

⁴⁰Mabla nu mavɔ kpli wo, ale be nyemadzudzɔ nyuiwɔwɔ na wo o. Made ŋunye vɔvɔ̃ woƒe dzi me, be womagate ɖa le ŋunye o.

⁴¹Makpɔ dzidzɔ le nyuiwɔwɔ na wo ŋu, eye made woƒe agunu to ɖe anyigba sia dzi le nyateƒe me tso nye dzi blibo kple nye luʋɔ blibo me.

⁴²Elabena ale Yehowa gblɔ esi: Alesi mehe dzɔgbevɔ̃e gã siawo katã va dukɔ sia dzii la, nenema ke mahe nyui, siwo katã ŋu meƒo nu le la, ava wo dzii.

⁴³Eye woagaƒle agble le anyigba sia, si ŋu miawo miele gbɔgblɔm le be, ezu gbegbe, elabena amegbetɔ kple lãwo megali o, eye wotsɔe de asi na Kaldeatɔwo la dzi.

⁴⁴Woagatsɔ ga aƒle agblewoe le Benyamin-nyigba dzi kple Yerusalem-nutowo me le Yuda-duwo kple to dzi duwo me, le bali me duwo kple dzieheduwo me, woade wo agbalẽ me, eye woatre enu ahaɖo ɖasefowo wo ŋu; elabena magaɖo wo te, Yehowa ye gblɔe.