Read ewe Yeremya 34 Bible Online

Yeremya 34 - ewe bible

Yeremya 34

¹Yehowa ƒe gbe, si va na Yeremya, esime Babel-fia Nebukadnezar kple eƒe aʋakɔ blibo la, anyigba dzi fiaɖuƒe, siwo katã nye eteviwo, kple dukɔwo katã lé aʋa wɔm kple Yerusalem kpakple eƒe duwo katã la, enye si:

²Ale Yehowa, Israel ƒe Mawu la, gblɔ esi: Yi ɖagblɔ na Yuda-fia Zedekiya bena: Yehowa be: Kpɔ da, matsɔ du sia ade asi na Babel-fia, ne wòatɔ dzoe.

³Màge le esi me o, ke boŋ woalé wò atsɔ ade asi nɛ kokoko, wò ŋkuwo akpa Babel-fia ƒe ŋkuwo, miaƒo nu kple mia nɔewo, eye ayi Babel.

⁴Ke Yuda-fia Zedekiya se Yehowa ƒe nya. Ale Yehowa gblɔ ɖe ŋuwò enye si: Yi mawu wò o;

⁵ke boŋ àku le ŋutifafa me, eye woaɖo dzo na wò abe fofowò, fia xoxoawo, amesiwo do ŋgɔ na wò la ƒe ame kuku dzo ene, eye wòafa na wò be „ao, aƒetɔ“; nyee gblɔ nya sia, Yehowa ye gblɔe.

⁶Eye nyagblɔɖila Yeremya gblɔ nya siawo katã na Yuda-fia Zedekiya le Yerusalem,

⁷esime Babel-fia ƒe aʋakɔ le aʋa wɔm kple Yerusalem kple Yuda-du, siwo katã kpɔtɔ ɖi, siwo nye Laxis kple Aseka; elabena woawo nye du sesẽwo kpɔtɔ le Yuda-duwo dome.

⁸Eye Yehowa ƒe gbe va na Yeremya, esime fia Zedekiya bia nu kple dukɔ, si le Yerusalem la, be wòaɖe gbe ƒã ablɔɖe na wo megbe,

⁹ne amesiame naɖe asi le kluvi kple kosivi, siwo nye Hebritɔwo la ŋu, be amea ɖeke magana nɔvia Yudatɔ nawɔ kluvidɔ nɛ o.

¹⁰Amegãwo katã kple dukɔ blibo la ɖo to, eye woɖo nubabla me be, yewo dome amesiame naɖe asi le eƒe kluvi kple kosivi ŋu, ne womagawɔ kluvidɔ na yewo azɔ o; eye woɖo to heɖe asi le wo ŋu.

¹¹Ke emegbe la wogakplɔ kluviawo kple kosiviawo, siwo ŋu woɖe asi le la vɛ, eye wozi wo dzi be, woanye kluviwo kple kosiviwo.

¹²Tete Yehowa ƒe gbe va na Yeremya bena:

¹³Ale Yehowa, Israel ƒe Mawu la, gblɔ esi: Mebia nu kple mia fofowo le gbesigbe mekplɔ wo tso Egipte-nyigba dzi tso kluvinyenye ƒe me la gblɔ bena:

¹⁴Le ƒe adre megbe la mia dome amesiame naɖe asi le nɔvia Hebritɔ, si tso eɖokui ƒle nɛ la ŋuti; nesubɔ wò ƒe ade, emegbe nade asi le eŋu wòadzo le gbɔwò. Ke mia fofowo meɖo tom o, eye womeƒu to anyi o.

¹⁵Miawo mietrɔ egbe siawo, eye miewɔ nusi nyo le ŋkunye me, be miede gbe ƒã ablɔɖe na mia haviwo, eye miebla nu le ŋkunye me le aƒe, si ŋu woyɔ nye ŋkɔ ɖo la me.

¹⁶Emegbe miegatrɔ, eye miegblẽ ko ɖo na nye ŋkɔ, mia dome amesiame gakplɔ eƒe kluvi kple kosivi, siwo ŋu miede asi le, abe alesi wodi ene la vɛ, eye miezi wo dzi, be woanye kluviwo kple kosiviwo na mi.

¹⁷Eyata ale Yehowa gblɔ esi: Mieɖo tom, be mia dome amesiame naɖe gbe ƒã ablɔɖe na nɔvia kple ehavi o, eyata ale Yehowa gblɔ esi: Maɖe gbe ƒã ablɔɖe na mi hena yi, dɔvɔ̃ kple dɔwuame, eye matsɔ mi awɔ ŋɔdzidonu na anyigba dzi fiaɖuƒewo katã.

¹⁸Eye mawo ŋutsu, siwo tu nye nubabla la, amesiwo mewo nusi wobla le ŋkunye me ƒe nyawo dzi o la, abe nyivi, si me wote ɖe eve, eye woto eƒe akpaawo dome yi la ene.

¹⁹Yuda-amegãwo kple Yerusalem-amegãwo, aƒedzikpɔlawo, nunɔlawo kple anyigba dzi dukɔ blibo la, ame siwo to nyivi la ƒe akpaawo do meyi la,

²⁰matso woamawo ade asi na woƒe futɔwo kple woƒe kudilawo, eye woƒe kukuawo anye nuɖuɖu na dziƒoxewo kple anyigba dzi lãwo.

²¹Matso Yuda-fia Zedekiya kple eƒe amegãwo ade asi na woƒe futɔwo kple woƒe kudilawo kpakple Babel-fia ƒe aʋakɔ, si dzo le mia ŋu la.

²²Yehowa be: Kpɔ ɖa, made se woatrɔ agbɔ va du sia ŋu, ne woawɔ aʋa kplii axɔe, ata dzoe, eye mana Yuda-duwo nazu gbegbe kple aƒedo.