Read ewe Yeremya 41 Bible Online

Yeremya 41 - ewe bible

Yeremya 41

¹Eye wòva me le dzinu adrelia me be, Ismael, Elisama vi Netanya ƒe vi, amesi nye fia ƒe amegãwo dometɔ ɖeka tso fia ƒome la me la, va Gedalya, Axikam vi la gbɔ le Mizpa, eye ŋutsu ewo kpe ɖe eŋu, eye woɖu nu kple wo nɔewo le Mizpa.

²Tete Ismael, Netanya vi, kple ŋutsu ewo, siwo kpe ɖe eŋu la, wotso, heda yi Gedalya, Safan vi Axikam ƒe vi la, eye wowu eya, amesi Babel-fia tsɔ ɖo anyigba la nu.

³Eye Ismael wu Yudatɔ, siwo katã le Gedalya gbɔ le Mizpa la, hekpe ɖe Kaldeatɔ, siwo le afima, amesiwo nye aʋawɔlawo la ŋu.

⁴Ke le ŋkeke eve megbe, esi amea ɖeke mekpɔ see be, wowu; Gedalya o la,

⁵ŋutsu blanyi tso. Sixem, Silo kple Samaria, wolũ ge, wole awu vuvuwo me, eye wosi blini helé nuɖuvɔsa kple dzudzɔʋeʋẽedonu ɖe asi, be woatsɔ asa vɔe le Yehowa ƒe me.

⁶Tete Ismael, Netanya vi la, do tso Mizpa le avi dzi yi ɖakpe wo, eye esi wòdo go wo la, egblɔ na wo bena: Miva miyi Gedalya, Axikam vi la gbɔ.

⁷Ke esi woɖo dua titina la, Ismael, Netanya vi la, kple ŋutsu, siwo kpe ɖe eŋu la, wu wo ɖe vudo la me.

⁸Ke wo dome ŋutsu ewo gblɔ na Ismael bena: Megawu mí o, elabena míeɖi nuwo ɖe gbe me: lu, ƒo, ami kple anyitsi. Tete wòdzudzɔ, eye mewu wo kpe ɖe wo nɔviwo ŋu o.

⁹Vudo, si me Ismael tsɔ ŋutsu, siwo katã wòwu kpe ɖe Gedalya ŋu ƒe kukuawo ƒu gbe ɖo la, fia Asa ye ɖee le Israel-fia Baesa ta; vudo sia mee Ismael, Netanya vi la, tsɔ ame kukuawo ɖee fũ.

¹⁰Emegbe Ismael kplɔ dukɔ la ƒe ame susɔea, siwo katã le Mizpa, fia vinyɔnuwo kple dukɔ blibo, si kpɔtɔ ɖe Mizpa, amesiwo nu fia ŋu srafowo ƒe amegã Nebuzaradan tso Gedalya, Axikam vi la ɖo; woawo Ismael, Netanya vi la, ɖe aboyoe, eye wòdzo, be yeayi Amon-viwo gbɔ.

¹¹Ke esi Yoxanan, Kareax vi, kple aʋafia, siwo katã kpe ɖe eŋu la, se vɔ̃, siwo katã Ismael, Netanya vi, wɔ la,

¹²woɖe woƒe aʋawɔlawo katã, eye woho, be yewoaɖawɔ aʋa kple Ismael, Netanya vi la, eye woɖatui le tɔ gã, si le Gibeon la to.

¹³Esi dukɔ blibo, si le Ismael ŋu la, kpɔ Yoxanan, Kareax vi kpakple aʋafia, siwo katã kpe ɖe eŋu la, dzi dzɔ wo.

¹⁴Tete dukɔ blibo, si Ismael ɖe aboyo tso Mizpa la, trɔ le eyome heyi ɖe Yoxanan, Kareax vi dzi.

¹⁵Ke Ismael, Netanya vi la, kple ŋutsu enyi wosi le Yoxanan nu yi Amon-viwo gbɔ.

¹⁶Tete Yoxanan, Kareax vi la, kple aʋafia, siwo katã kpe ɖe eŋu la, kplɔ dukɔa ƒe ame susɔeawo katã, ŋutsu, siwo nye aʋamewo, nyɔnuwo kple ɖeviwo kpakple aƒedzikpɔlawo, amesiwo Ismael, Netanya vi la, ɖe aboyo tso Mizpa, esime wòwu Gedalya, Axikam vi la megbe; woawo wòkplɔ tso Gibeon,

¹⁷eye wova no Gerut-Kimham, si le Betlexem gbɔ, ne woayi Egipte

¹⁸le Kaldeatɔwo ta; elabena wole wo vɔ̃m, le esi Ismael, Netanya vi la, wu Gedalya, Axikam vi, amesi Babel-fia tso ɖo anyigba la nu la ŋuti.