Read ewe Yeremya 43 Bible Online

Yeremya 43 - ewe bible

Yeremya 43

¹Esi Yeremya wu Yehowa, woƒe Mawu la ƒe nya, siwo katã Yehowa, woƒe Mawu, de asi nɛ ɖo ɖe wo la gbɔgblɔ na dukɔ blibo la nu vo la,

²Azarya, Hosaya vi, kple Yoxanan, Kareax vi kpakple ŋutsu vlowo katã gblɔ na Yeremya bena: Alakpa dam nèle; menye Yehowa, mía Mawu, ye ɖo wò ɖa gblɔ bena: Migayi Egipte ɖanye amedzro le afima o;

³ke boŋ Barux, Neriya vi la le ʋu yɔm ɖe tewò ɖe mía ŋu, ne woatso mí ade asi na Kaldeatɔwo, ne woawu mí, eye woaɖe aboyo mí ayi Babel.

⁴Eye Yoxanan, Kareax vi, kple aʋafiawo katã kpakple dukɔ blibo la meɖo to Yehowa ƒe gbe, be woatsi Yuda-nyigba dzi o.

⁵Tete Yoxanan, Kareax vi, kple aʋafiawo katã kplɔ Yuda ƒe ame susɔea, siwo katã trɔ gbã tso dukɔwo katã dome, afisi wokaka hlẽ ɖo, be yewoava ana Yuda-nyigba dzi,

⁶ŋutsuwo, nyɔnuwo kple ɖeviwo, fia vinyɔnuwo kple amesiwo katã fia ŋu srafowo ƒe amegã Nebuzaradan gblẽ ɖi ɖe Gedalya, Safan vi Axikam ƒe vi si me la, hekpe ɖe nyagblɔɖila Yeremya kple Barux, Neriya vi la ŋu,

⁷eye wodzo yi Egipte-nyigba dzi, elabena wogbe toɖoɖo Yehowa ƒe gbe, eye wova Taxpanxes.

⁸Eye Yehowa ƒe gbe va na Yeremya le Taxpanxes bena:

⁹Tso kpe gãwo naɖi ɖe Farao ƒe aƒe, si le Taxpanxes la ƒe mo nu le anyikpe, siwo woɖo anyigba la te le Yuda-ŋutsuwo ŋku me,

¹⁰eye nagblɔ na wo bena: Ale Yehowa Zebaot, Israel ƒe Mawu la, gblɔ esi: Mado woaɖakplɔ nye dɔla Babel-fia Nebukadnezar vɛ, ali eƒe fiazikpui ɖe kpe, siwo meɖi la dzi, eye wòakeke eƒe fiakuntruwo ɖe wo dzi.

¹¹Ava si Egipte-nyigba, eye wòatsɔ nusi nye ku tɔ la, ade asi na ku, nusi nye aboyo tɔ la, ade asi na aboyo, eye nusi nye yi tɔ la, ade asi na yi.

¹²Mado dzo ɖe Egipte-mawuwo ƒe me, eye wòatɔ dzo wo ahaɖe aboyo wo, ado Egipte-nyigba, abe alesi lãkplɔvi ɖoa awu ʋlayae ene, eye wòadzo le ŋutifafa me.

¹³Agbã sɔti, siwo le Bet-Semes le Egipte-nyigba dzi, eye wòala dzo Egipte-mawuwo ƒe xɔwo.