Read ewe Yeremya 44 Bible Online

Yeremya 44 - ewe bible

Yeremya 44

¹Yehowa ƒe gbe, si va na Yeremya hena Yudatɔ, siwo katã le Egipte-nyigba dzi, amesiwo le Migdol, Taxpanxes, Nof kple Patros-nyigba dzi la, enye si:

²Ale Yehowa Zebaot, Israel ƒe Mawu la, gblɔ esi. Miekpɔ dzɔgbevɔ̃e, siwo katã mehe va Yerusalem kple Yuda-duwo katã dzi, eye kpɔ ɖa, wòzu aƒedowo egbe siawo, eye amea ɖeke mele wo me o,

³le woƒe vɔ̃, siwo wowɔ hetsɔ do dziku nam, eye woyi ɖasubɔ mawu tutu, siwo woawo loo alo miawo kple mia fofowo mienyã o, eye wodo dzudzɔ na wo la la.

⁴Eye meɖo nye dɔla nyagblɔɖilawo katã de mi ɖaa atraɖii gblɔ bena: Migawɔ ŋunyɔnu sia, si melé fui la o.

⁵Ke wogbe toɖoɖom, eye womeƒu to anyi, be woatrɔ tso woƒe nu vɔ̃ɖi wɔwɔwo me, eye womagaɖo dzudzɔ na mawu tutɔwo azɔ o.

⁶Eyata nye dziku trɔ ƒo ɖe anyi, eye nye dɔmedzoe fiã Yuda-duwo kple Yerusalem-kpɔdomeewo, ale be wòzu aƒedo kple gbegbe, abe alesi wòle egbe siawo ene.

⁷Azɔ ale Yehowa, Mawu Zebaot, Israel ƒe Mawu la, gblɔ esi: Nukaŋuti miahe vɔ̃ gã sia ava mia ɖokui dzi, be ŋutsu kple nyɔnu, ɖevi kple vidzie natsrɔ̃ le Yuda, ale be miana be, amea ɖeke makpɔtɔ na mi o,

⁸mietsɔ miaƒe asinudɔwɔwɔwo ɖo dziku nam, eye miedo dzudzɔ na mawu tutɔwo le Egipte-nyigba dzi, afisi mieyi, be miaɖanye amedzro le, ne miatsrɔ̃ mia ɖokui, eye miazu ɖiŋudonu kple alɔmeɖenu le anyigba dzi dukɔwo katã domea?

⁹Ɖe mieŋlɔ mia fofowo ƒe nu vɔ̃ɖi wɔwɔwo, Yuda-fiawo kple woƒe amegãwo ƒe nu vɔ̃ɖi wɔwɔwo, miawo kple mia srɔ̃wo ƒe nu vɔ̃ɖi wɔwɔwo, siwo wowɔ le Yuda-nyigba kple Yerusalem-kpɔdomeewo la bea?

¹⁰Womebɔbɔ wo ɖokui ɖe anyi vaseɖe egbe o, vɔvɔ̃ meɖo wo o, eye womezɔ ɖe nye sewo kple nye ɖoɖowo, siwo mede asi na woawo kple wo fofowo la nu o.

¹¹Eyata ale Yehowa Zebaot, Israel ƒe Mawu la, gblɔ esi: Kpɔ ɖa, matsɔ nye ŋku aɖo mia ŋu hena vɔ̃wɔwɔ mi, eye matsrɔ̃ Yuda blibo la.

¹²Makplɔ Yuda ƒe ame susɔea, siwo tsɔ ŋku ɖo Egipte-nyigba dzi yiyi ŋu, be woaɖanye amedzro le afima la, eye wo katã woatsrɔ̃; woatsi Egipte-nyigba dzi, eye woatsrɔ̃ ɖe yi kple dɔwuame si me: ɖeviwo kple tsitsiawo siaa aku ɖe yi kple dɔwuame si me, eye woazu atamkanu, ŋɔdzinu, ɖiŋudonu kple alɔmeɖenu.

¹³Mahe to na amesiwo le Egipte-nyigba dzi ta, abe alesi metsɔ yi, dɔwuame kple dɔvɔ̃ he to na Yerusalem ene.

¹⁴Amea ɖeke masi alo asusɔ le Yuda ƒe ame mamlea, siwo yi, be woaɖanye amedzro le Egipte-nyigba dzi la dome agbugbɔ ayi Yuda-nyigba, si le wo dzrom be, yewoagbugbɔ aɖanɔ afima la dzi o; elabena womelé gbugbɔ ge ayi o, negbe ame sisia ɖewo ko.

¹⁵Tete ŋutsu, siwo katã nyae be, yewo srɔ̃wo do dzudzɔ na mawu tutɔwo, kple nyɔnu, siwo katã le tsitre le ha gã me, kpakple dukɔ blibo, si le Egipte-nyigba dzi kple Patros la, ɖo ŋu na Yeremya bena:

¹⁶Nya, si negblɔ na mí le Yehowa ƒe ŋkɔ me la, miele to ɖo ge wò o;

¹⁷ke boŋ miawɔ ɖe nya sia nya, si do tso mía nu la nu, míado dzudzɔ na dziƒo fianyɔnu, eye miaƒo tsi ɖe anyi nɛ, abe alesi mia kple mía fofowo, míaƒe fiawo kple míaƒe amegãwo míenɔa wɔwɔm le Yuda-duwo kple Yerusalem-kpɔdomeewo, eye míekpɔa nu ɖuna ɖia ƒo, eme nyona na mí, eye míekpɔa dzɔgbevɔ̃ea ɖeke kple ŋku o la ene.

¹⁸Ke esi míedzudzɔ dzudzɔdodo na dziƒo fianyɔnu kple tsi ƒoƒoɖeanyi nɛ la, nusianu ƒe hiã tu mí, eye yi kple dɔwuame tsrɔ̃ mí.

¹⁹Eye ne míedo dzudzɔ na dziƒo fianyɔnu heƒo tsi ɖe anyi nɛ la, ɖe mía srɔ̃wo megbe míetona tɔa tatali ɖe eƒe nɔnɔme, eye míeƒoa tsi ɖe anyi nɛa?

²⁰Tete Yeremya gblɔ na dukɔ blibo la, ŋutsuwo kple nyɔnuwo kpakple amesiwo katã ɖo nyaa ŋu nɛ la bena:

²¹Ɖe menye miaƒe dzudzɔ, siwo mia kple mia fofowo, miaƒe fiawo kple miaƒe amegãwo kpakple dukɔ hahoo la miedo le Yuda-duwo me kple Yerusalem-kpɔdomeewo la dzi Yehowa ɖo ŋkui, eye wova ta me nɛ oa?

²²Eye esi etsɔtsɔ ti Yehowa, le miaƒe nuwɔna vɔ̃ɖiwo kple miaƒe ŋunyɔnu, siwo miewɔ ta la, eyata miaƒe anyigba zu aƒedo, gbegbe kple ɖiŋudonu, eye ame vɔ le edzi, abe alesi wòle egbe siawo ene!

²³Esi miedo dzudzɔ, eye miewɔ nuvɔ̃ ɖe Yehowa ŋu, miese Yehowa ƒe gbe o, eye miezɔ ɖe eƒe seawo, ɖoɖoawo kple ɖaseɖiɖiawo nu o la, eyata dzɔgbevɔ̃e sia va mia dzi ɖo, abe alesi wòle egbe siawo ene.

²⁴Eye Yeremya gblɔ na dukɔ blibo la kple nyɔnuawo katã bena: Mi Yuda blibo, si le Egipte-nyigba dzi, mise Yehowa ƒe nya!

²⁵Ale Yehowa Zebaot, Israel ƒe Mawu la, gblɔ esi: Mia kple mía srɔ̃wo mieƒo nu kple miaƒe nu, eye mietsɔ miaƒe asiwo wɔ edzi gblɔ bena: Mina míawɔ míaƒe adzɔgbe, si míeɖe la dzi, ne míado dzudzɔ na dziƒo fianyɔnu, eye miaƒo tsi ɖe anyi nɛ. Mili ɖe miaƒe adzɔgbeɖeɖewo dzi, eye nuwo miaƒe ŋugbedodowo dzi ko!

²⁶Eyata mi Yuda blibo, si le Egipte-nyigba dzi, mise Yehowa ƒe gbe! Yehowa be: Metà nye ŋkɔ gã la: Ne Yuda-ŋutsua ɖe ƒe nu ayɔ nye ŋkɔ le Egipte-nyigba blibo la dzi agblɔ be, yetà Aƒetɔ Yehowa ƒe agbe fĩ!

²⁷Kpɔ ɖa, mele ŋu te ɖe mia ŋu hena vɔ̃wɔwɔ, menye hena nyui o, eye yi kple dɔwuame atsrɔ̃ Yuda-ŋutsu, siwo katã le Egipte-nyigba dzi la, vaseɖe esime wo nu ayi.

²⁸Eye amesiwo si le yi nu la, agbugbɔ tso Egipte-nyigba dzi ayi Yuda-nyigba dzi, eye woanye ame xexlẽewo; eye Yuda ƒe ame susɔeawo katã, amesiwo yi Egipte, be woanye amedzro le afima la, adze si amesi ƒe nya le eme, tɔnye loo alo wo ta.

²⁹Yehowa be: Esia anye dzesi na mi be, mele to he ge na mi le teƒe sia, ne miadze sii be, nye nyawo ava me ɖe mia ŋu hena vɔ̃wɔwɔ:

³⁰Ale Yehowa gblɔ esi: Matso Egipte-fia Farao Xofra ade asi na eƒe futɔwo kple eƒe kudilawo, abe alesi metsɔ Yuda-fia Zedekiya de asi na eƒe futɔ kple eƒe kudila Babel-fia Nebukadnezar ene.