Read ewe Yeremya 46 Bible Online

Yeremya 46 - ewe bible

Yeremya 46

¹Yehowa ƒe gbe, si va na nyagblɔɖila Yeremya ɖe dukɔwo ŋu enye si:

²Hena Egipte, ɖe Egipte-fia Farao Nexo ƒe aʋakɔ, si le Frat-tɔsisi nu le Karkemis gbɔ, eye Babel-fia Nebukadnezar sii le Yuda-fia Yoyakim, Yosiya vi ƒe ƒe enelia me la ŋu:

³Mitsɔ akpoxɔnu gã kple via bia akpae, eye mido ɖe aʋa nu!

⁴Mitsi sɔtsuwo ɖe tasiaɖam ŋu, eye miɖe sɔwo dzi, miɖo gakukuwo miado, minyre akplɔwo, eye mido gawuwo!

⁵Nukaŋuti mele wo kpɔm dzidzi ƒo wo, eye wogbugbɔ ɖe megbe, wogbã woƒe kalẽtɔwo gudugudu, eye wòsi womegale megbe kpɔm o? Yehowa be: Ŋɔdzi li godoo.

⁶Ame ɖeablɛ masi o, eye kalẽtɔ maɖe eɖokui o! Wotsra ɖe anyiehe le Frat-tɔsisi la to hetsi afima.

⁷Ameka nye esi gbɔna abe Nil ene, eye eƒe tsiwo le tsotsom abe tɔsisiwo ene?

⁸Egipte ye gbɔna abe Nil ene, eye eƒe tsiwo le tsotsom abe tɔsisiwo ene, eye wògblɔ be: Mayi aɖaɖe anyigba la, eye matsrɔ̃ duwo kple wo me nɔlawo.

⁹Mi sɔwo, miɖe ta eme, mi tasiaɖamwo, minyẽ zi ɖe eme! Kalẽtɔwo neho, Kusi-viwo kple Put-viwo, amesiwo si me akpoxɔnu le, kpakple Libiatɔwo, amesiwo nye aŋutrɔdala, siwo hea da me!

¹⁰Gbemagbe enye hlɔ̃biagbe na Aƒetɔ, Yehowa Zebaot, ne wòabia hlɔ̃ eƒe futɔwo. Yi aɖu nu aɖi ƒo, eye wòamu woƒe ʋu; elabena Aƒetɔ, Yehowa Zebaot, le vɔsaŋkekenyuie ɖum le anyiehe-nyigba dzi, le Frat-tɔsisi la nu.

¹¹Egipte-ɖetugbi, yi naɖatsɔ atike tso Gilead; yakatsyɔe nèle atike geɖe wɔm, mahaya akpɔ o.

¹²Dukɔwo se wò ŋukpe ŋkɔ, eye wò ɣlikpɛdodo yɔ anyigba dzi fũ; elabena kalẽtɔ dze anyi ɖe kalẽtɔ dzi, eye wo kple eve la siaa wotsi.

¹³Yehowa ƒe nya, si wògblɔ na nyagblɔɖila Yeremya be, Babel-fia Nebukadnezar gbɔna Egipte-nyigba si ge la, enye si:

¹⁴Mido kpo le Egipte, miɖe gbe ƒã le Migdol, eye miɖe gbe ƒã le Nof kple Taxpanxes! Migblɔ bena: Tso nadzra ɖokuiwò ɖo, elabena yi le nu ɖum le ŋuwò godoo.

¹⁵Nukaŋuti wò ŋusẽtɔwo ɖo baba ɖe anyi? Womenɔ te o, elabena Yehowa ye tutu wo ƒu anyi.

¹⁶Ena ame geɖewo kli nu, eye wodze anyi ɖe wo nɔewo dzi hegblɔ bena: Mina míagbugbɔ ayi míaƒe dukɔ gbɔ kple anyigba, si dzi wodzi mí ɖo la dzi, tso yi wuame la nu!

¹⁷Miyɔ Egipte-fia Farao be „hohohodola, si ɖea ŋu ɖi le ɣeyiɣi nyuitɔ ŋu.“

¹⁸Ale fia, si ŋkɔ nye Yehowa Zebaot la, gblɔ esi: Metà ɖokuinye ƒe agbe: Ava abe alesi Tabor le towo dome, eye Karmel le atsiaƒu nu ene.

¹⁹Egipte-nyɔnuvi, do mɔzɔgba na ɖokuiwò; elabena Nof azu aƒedo, eye woagblẽe, ame navɔ le eme.

²⁰Nyinɔvi enye Egipte. Adzɔ̃e tso anyiehe gbɔna.

²¹Amedzro, siwo nye asrafowo le wo dome, hã le abe nyivi dami ene; wo katã trɔ megbe hesi, eye womenɔ te o; elabena woƒe dzɔgbevɔ̃egbe, woƒe toheɣi va wo dzi.

²²Woƒe zinyenyẽ le abe da, si le sisim la tɔ ene; elabena wogbɔna kple aʋakɔ, eye wole fiavi ɖe asi ƒo ɖe edzi abe atilãla ene.

²³Yehowa be: Woaƒo eƒe ave, si ɖo kpekpekpe, elabena wosɔ gbɔ wu ʋetsuviwo, eye womelé xexlẽ me o.

²⁴Ŋukpe lé Egipte-nyɔnuvi, elabena wotsɔe de asi na anyiehe dukɔ.

²⁵Yehowa Zebaot, Israel ƒe Mawu la be: Mahe to na Amon le No, na Farao, na Egipte kple eƒe mawuwo kple eƒe fiawo kpakple amesiwo le dzi ɖom ɖe Farao ŋu la.

²⁶Matsɔ ade asi na eƒe kudilawo kple Babel-fia Nebukadnezar kpakple eƒe dɔlawo; ke emegbe la ame aganɔ edzi abe tsã ene. Yehowa ye gblɔe.

²⁷Ke wò, nye dɔla Yakob, megavɔ̃ o, eye Israel, dzi megaɖe le ƒowò o; elabena maɖe wò atso didiƒe kple viwòwo atso woƒe aboyonyigba dzi; Yakob atrɔ agbɔ, ava no anyi aɖe dzi ɖi bɔkɔɔ, eye amea ɖeke mado voɖi nɛ o.

²⁸Yehowa be: Wò, nye dɔla Yakob, megavɔ̃ o; elabena meli kpli wò, eye matsrɔ̃ dukɔ, siwo katã dome menyã wò ɖo ɖo la gbidigbidi; ke wò la, nyematsrɔ̃ wò keŋ o; nyemagbe tohehe na wò o, ke boŋ mahe to na wò ɖe ɖoɖo la nu.