Read ewe Yeremya 48 Bible Online

Yeremya 48 - ewe bible

Yeremya 48

¹Ɖe Moab ŋu Ale Yehowa Zebaot, Israel ƒe Mawu la, gblɔ esi: Baba na Neho, elabena wogblẽe! Wòxɔ Kiryatayim, eye ŋukpe lée, wogbã mɔ̃ sesẽ la wòzu ŋukpe!

²Moab ƒe adegbeƒoƒo nu tso, wodo tame vɔ̃ ɖe eŋu le Xesbon be: Mina míatsrɔ̃e, ne womaganye dukɔ azɔ o! Woatsrɔ̃ wò Madmen hã, eye yi anɔ yowóme.

³Ɣli ɖi le Xoronayim be Gbegblẽ kple mumũ gã!

⁴Moab mũ dze anyi, eye wo viwo le ɣlikpɛ dom.

⁵Wole avi fam lia Luxit ƒe to dzi mɔ la, eye konyifaɣli le ɖiɖim le wo nu le Xoronayim ƒe abu nu le gbegblẽ la ta.

⁶Misi, miɖe miaƒe agbe, eye minɔ abe ame ɖeƒeƒle le gbegbe ene.

⁷Esi nèle dzi ɖom ɖe wò dɔwɔwɔwo kple wò kesinɔnuwo ŋu la, eyata woaxɔ wò hã, eye Kamos ayi aboyo me hekpe ɖe eƒe trɔ̃nuawo kple amegãwo ŋu.

⁸Nugblẽla ava du sia du me, eye dua ɖeke masi o, bali me nu ayi, eye tagba atsrɔ̃, abe alesi Yehowa gblɔ ene.

⁹Mina aʋala Moab, ne wòadzò adzo; eƒe duwo le aƒedo zu ge, amea ɖeke manɔ wo me o.

¹⁰Aɖi amesi le alɔgblɔlɔ wɔm le Yehowa ƒe dɔ ŋu la ŋuti, eye aɖi amesi he eƒe yi ɖe megbe tso ʋukɔkɔɖi me la ŋu kpekpekpe.

¹¹Moab li bɔkɔɔ tso eƒe ɖevime ke, eɖo ƒã ɖi kpoo, eye wometrɔe tso goe me ko ɖe goe bubu me o, eye meyi aboyo me o, eyata eƒe vivi gale eŋu, eye eƒe ʋeʋẽ metrɔ o.

¹²Yehowa be: Eyata kpɔ ɖa, ŋkeke li gbɔna, eye madɔ goeviãlawo ɖa, ne woaviãe, woaɖi ƒuƒlu eƒe goewo, eye woagbã eƒe zewo.

¹³Ŋu akpe Moab ɖe Kamos ŋu, abe alesi ŋu kpe Israel ƒe aƒe la ɖe Betel, si ŋu woɖo dzi ɖo la ŋu ene.

¹⁴Aleke mianɔ gbɔgblɔm be: Kalẽtɔwo míenye, eye ŋutsu aʋamewo míenye?

¹⁵Fia, si ŋkɔ nye Yehowa Zebaot la be: Moab kple eƒe duwo gblẽla gbɔna xoxo, eye eƒe ɖekakpui tiatiawo yina ɖe amewuƒe.

¹⁶Moab ƒe gbegblẽ tu aƒe, ne woava eme, eye eƒe dzɔgbevɔ̃e le du dzi ŋutɔ.

¹⁷Mi eƒe aƒelikawo katã kple amesiwo katã nya eƒe ŋkɔ la, mifa nɛ! Migblɔ be: Aleke ati tɔɖeŋu sesẽ la, atikplɔ nyo la ŋe?

¹⁸Dibon-nyɔnuvi, ɖi tso wò ŋutikɔkɔe me, nabɔbɔ nɔ ke me; elabena Moab-gblẽla le ƒoƒo ge ɖe dziwò, eye wòagblẽ wò mɔ sesẽwo.

¹⁹Aroer-nyɔnu, va tsi tre ɖe mɔ to nanɔ ŋu tsam, bia amesiwo si, eye wokplɔ la bena: Nya kae dzɔ?

²⁰Ŋukpe lé Moab, elabena wogbãe. Mifa avi, eye mido ɣli, mido boblo le Arnon nu be: Wogblẽ Moab!

²¹Ʋɔnudɔdrɔ̃ va gbadzaƒe nyigba, Xolon, Yaza kple Mefaat dzi,

²²Dibon, Neho kple Bet-Diblatayim dzi.

²³Kiryatayim, Bet-Gamul kple Bet-Meon dzi,

²⁴Keriyot kple Bozra kpakple Moab-nyigba ƒe du, siwo katã le didiƒe kple kpuiƒe la dzi.

²⁵Yehowa be: Wòŋe Moab ƒe dzo, eye wolã eƒe alɔ.

²⁶Mina aha Moab, ne wòano amu, be wòadze anyi ɖe eƒe xeɖeɖe me, ne eya hã nazu alɔmeɖenu, elabena Yehowa ŋu wòtɔ asi akɔ ɖo.

²⁷Ɖe Israel mezu alɔmeɖenu na wò oa? Fiafiwo domee wolée le, hafi ne ènya ƒo nu le eŋu ko la, nènɔa ta ʋu ʋuma?

²⁸Mi Moabitɔwo, migblẽ miaƒe duwo ɖi, ne miaɖanɔ agatowo me, minɔ abe akpakpa, si wɔ atɔ ɖe agakpewo toga ene.

²⁹Míese Moab dadala ŋkɔ be, edoa eɖokui ɖe dzi ŋutɔ, eƒoa adegbe, edana, edzraa eɖokui, eye eƒe dzi doa eɖokui ɖe dzi.

³⁰Yehowa be: Menya eƒe dɔmedzoe dodo kple eƒe numeɖiɖi, eƒe nu wɔwɔ mele ɖeke me o.

³¹Eyata mafa avi ɖe Moab ŋu, mado ɣli ɖe Moab blibo la ŋu, eye maɖe hã ɖe Kir-Xeres-ŋutsuwo ŋu.

³²Sibna ƒe weinka, mafa avi na wò, wu alesi mefa avi na Yaezer, wò kawo to atsiaƒu dzi vaseɖe ƒu nu le Yaezer, nugblẽla va ƒo ɖi le wò kutsetsegbeɣi kple wò weinxaɣi.

³³Dzidzɔ kple aseyetsotso nu tso le agblewo me le Moab-nyigba dzi; metsi wein nu le weinfiãnu me, eye womagafiã wein kple aseyetsotso azɔ o; aseyetsotso maganye aseyetsotso o!

³⁴Le Xesbon ƒe aƒadodo, si ɖi vaseɖe Eleale kple Yahaz ta wodo ɣli tso Zoar va ke ɖe Xoronayim vaseɖe Eglat etɔ̃lia ke, elabena Nimrim ƒe tsiwo hã amie.

³⁵Yehowa be: Matsrɔ̃ amesiwo dea nuxeƒe, eye woɖoa dzudzɔ na woƒe mawuwo la ɖa le Moab.

³⁶Eyata nye dzi axa nu ɖe Moab ŋu abe dzekuku ene, eye nye dzi axa nu ɖe Kir-Xeres-ŋutsuwo ŋu abe dzekuku ene, elabena nusiwo wotu ɖo la ƒe mlɔea dɔ̃.

³⁷Elabena tawo katã nye ta kokoe, wolũ gewo katã, abi kuku teƒe le asiwò katã ŋu, eye akpanya le aliwo katã dzi.

³⁸Amewo katã le nu xam le Moab ƒe xɔtawo katã kple eƒe kpɔdomeewo katã, elabena megbã Moab abe ze manyomanyo ene.

³⁹Aleke wòhegbãe ale? Mifa avi! Aleke Moab trɔ megbe kple ŋukpee? Moab zu alɔmeɖenu kple bibi na eƒe aƒelikawo katã.

⁴⁰Elabena ale Yehowa gblɔ esi: Futɔ la adzo abe hɔ̃ ene, eye wòake aʋala ɖe Moab dzi!

⁴¹Wòxɔ duwo, eye wòxɔ mɔ̃ sesẽwo. Moab-kalẽtɔwo ƒe dzi le ɣemaɣi abe nyɔnu, si le ku lém ƒe dzi ene.

⁴²Wotsrɔ̃ Moab, eye meganye dukɔ azɔ o, elabena etɔ asi akɔ ɖe Yehowa ŋu.

⁴³Mi Moabitɔwo, Yehowa be: Ŋɔdzi, ʋe kple mɔ̃ka le mia ŋu.

⁴⁴Amesi si le ŋɔdzi nu la, age adze ʋe me, eye amesi do le ʋe me la, mɔ̃ka aɖee. Elabena Yehowa be: Mahe toheɣi avae na Moab.

⁴⁵Amesisiawo tsra wɔɔ ɖe vɔvɔli te le Xesbon; elabena dzo tso Xesbon, eye dzoƒaɖe tso Sixon, efiã Moab ƒe tonuƒui kple ʋunyaʋunyaviwo ƒe dzodzome.

⁴⁶Moab, baba na wò! Kamos-dukɔ tsrɔ̃, elabena wokplɔ wò ŋutsuviwo ɖade gaxɔ me, eye wokplɔ wò nyɔnuviwo yi aboyo mee.

⁴⁷Yehowa be: Ke magaɖo Moab te le ŋkeke mlɔeawo me. Moab ƒe ʋɔnudɔdrɔ̃ seƒe enye si.