Read ewe Yeremya 49 Bible Online

Yeremya 49 - ewe bible

Yeremya 49

¹Ɖe Amon-viwo ŋu: Ale Yehowa gblɔ esi: ɖe ŋutsuvia ɖeke mele Israel si, alo domenyilaa ɖeke mele esi oa? Nukaŋuti Malkam xɔ Gad wɔ etɔe, eye eƒe dukɔ le eƒe duwo me?

²Eyata Yehowa be: Kpɔ ɖa, ŋkeke li gbɔna, eye mana aʋaɣli naɖi ɖe Amon-viwo ƒe Raba ŋu, be woazu anyiglãgo, woatɔ dzo eŋu duwo, eye Israel agaxɔ eƒe domenyinu, Yehowa ye gblɔe.

³Xesbon, fa avi, elabena wogblẽ Ai! Mi Raba-nyɔnuviwo mido ɣli, eye mita akpanya ɖe ali, mixa nu, eye mina tsa glãla tsam le lãkpɔwo me, elabena Malkam ayi aboyo me hekpe ɖe eƒe trɔ̃nuawo kple amegãwo ŋu.

⁴Wò nyɔnuvi dzeaglã, si le dzi ɖom ɖe wò kesinɔnuwo ŋu, nukaŋuti nètso wò balime le adegbe ƒomee be, balime wɔnu wònye hele gbɔgblɔm be: Amekae ava gbɔnye?

⁵Kpɔ ɖa, Aƒetɔ, Yehowa Zebaot, be: Mana miaƒe aƒelikawo katã nahe ŋɔdzi ava mia dzi, woaka mi ahlẽ, eye amesiame aɖo ta eŋgɔ tẽ, ale be womaƒo sisilawo nu ƒu o.

⁶Ke emegbe la magaɖo Amon-viwo te, Yehowa ye gblɔe.

⁷Ɖe Edom ŋu: Ale Yehowa Zebaot gblɔ esi: Ɖe nunyaa ɖeke megale Teman o, adaŋudede bu ɖe nunyalawo, eye wotrɔ nunya ƒo ɖe anyia?

⁸Mi Dedantɔwo, misi, mitrɔ dzo, eye miɣla mia ɖokui ɖe agu me; elabena mahe dzɔgbevɔ̃e ava Esau dzi le gbesigbe mahe to nɛ.

⁹Ne weintsetsexalawo ƒo ɖe dziwò la, womasusɔ mamlea ɖeke ɖi o; ne fiafitɔwo va le zã me la, woagblẽ nu, vaseɖe esime wòati kɔ na wo.

¹⁰Elabena maɖe ama Esau, maklo nu le eƒe bebeƒe dzi, be magatsi ɣaɣlaƒe o. Woatsrɔ̃ viawo, nɔviawo kple eƒe aƒelikawo, eye eya ŋutɔ nu ayi.

¹¹Gblẽ wò tsyɔ̃eviwo ɖi nam, maxɔ wo ɖe agbe, eye wò ahosiwo neɖo dzi ɖe ŋunye!

¹²Ale Yehowa gblɔ esi: Kpɔ ɖa, amesiwo kplu la nono medze o hã, wononɛ kokoko, eye ɖe woagbe tohehe na wò ya? Matsi tomahemahe o, ke boŋ ànoe kokoko!

¹³Elabena ale Yehowa gblɔ esi: Metà ɖokuinye ƒe agbe: Ne Bozra mazu ŋɔdzinu, alɔmeɖenu, aƒedo kple ɖiŋudonu, eye eƒe duwo katã nazu gbegbe mavɔ o fi!

¹⁴Mese nya tso Yehowa nu, eye woɖo ame ɖe dukɔwo dome be: Miƒo takpli miava ɖe wo ŋu, eye mitso miakpe aʋa!

¹⁵Elabena mewɔ wò sue le dukɔwo dome, eye medo vlo wò le amegbetɔwo dome.

¹⁶Ŋɔdzi lé wò; wò dzi ƒe dàda ble wò, wò amesi le agatowo me, eye nètso aƒe ɖe towo ƒe tsutsuẽƒe! Ne èwɔ atɔ ɖe kɔkɔƒe abe hɔ̃ ene hã la, matutu wò aƒu anyi tso afima, Yehowa ye gblɔe!

¹⁷Edom azu gbegbe, eye amesiame, si to eŋu yina la ƒe nu aku wòado tsia ɖe woƒe abixɔxɔwo katã ŋu.

¹⁸Yehowa be: Amea ɖeke magatso aƒe ɖe afima o, eye amegbetɔvia ɖeke manɔ afima o, abe alesi wotrɔ Sodom kple Gomora kple woƒe aƒelikawo bu anyii ene.

¹⁹Kpɔ ɖa, ado tso Yordan ƒe aƒlawo me abe dzata ene ahayi lãnyiƒe, si de ama ɖaa la; elabena manyãe ɖa le eŋu le aɖabaƒoƒo ɖeka me, eye amesi metia la, eya matsɔ aɖo enu. Elabena ameka de nunye, ameka akplɔm ayi ʋɔnui, eye ameka nye lãkplɔvi anɔ te ɖe nunye?

²⁰Eyata mise Yehowa ƒe adaŋu, si wòde ɖe Edom ŋu kple eƒe tame, si wòɖo ɖe Temantɔwo ŋu la: Vavã woakplɔ lã kudɔewo adzoe, eye woƒe lãnyiƒe ƒe nu aku ɖe wo ŋu.

²¹Anyigba ʋuʋu le eƒe anyidzedze ƒe ɖiɖi ta, wose konyifaɣli le Avaƒu la nu ke.

²²Kpɔ ɖa, egbɔna abe hɔ̃ ene, eye wòadze akeke eƒe aʋala ɖe Bozra dzi, eye Edom-kalẽtɔwo ƒe dzi anɔ le ɣemaɣi abe nyɔnu, si le ku lém ƒe dzi ene.

²³Ɖe Damasko ŋu: Ŋu kpe Xamat kple Arpad; elabena wose nya vɔ̃, eye dzi ɖe le wo ƒo; ŋɔdzi le atsiaƒu nu, womate ŋu agbɔ ɖe eme o.

²⁴Damasko ƒe lãme tu, etrɔ hesi, eye dzidzi ƒoe; ŋɔdzi kple vevesese va edzi abe nyɔnu léku ene.

²⁵Aleke wogblẽ du nyɔnyɔ la, nye dzidzɔkpɔkpɔ ƒe mɔ̃ sesẽ la ɖi?

²⁶Eyata woƒe ɖekakpuiwo atsi woƒe kpɔdomeewo, eye woƒe aʋawɔlawo katã atsrɔ̃ gbemagbe, Yehowa ye gblɔe.

²⁷Eye matɔ dzo Damasko ƒe gliwo, ne wòafiã Ben-Hadad ƒe fiasãwo.

²⁸Ɖe Kedar kple Xazor-fiaɖuƒe, siwo Babel-fia Nebukadnezar si la ŋu: Ale Yehowa gblɔ esi: Mitso, ne miaho ɖe Kedar ŋu, eye mitsrɔ̃ ɣedzeƒeviwo.

²⁹Woaxɔ woƒe agbadɔwo kple alẽwo, woƒe agbadɔvɔwo kple woƒe nuwo katã, eye woakplɔ woƒe kposɔwo adzoe, woaɖo ɣli ɖe wo ŋu be: Ŋɔdzi li godoo!

³⁰Yehowa be: Mi Xazortɔwo, misi, afɔ nètsɔ na mi, eye miɣla mía ɖokui ɖe agu me; elabena Babel-fia de adaŋu ɖe mia ŋu, eye wòɖo ta me ɖe mia ŋu.

³¹Yehowa be: Mitso, míaho ɖe dukɔ, si ɖe dzi ɖi bɔkɔɔ la ŋu, agbo kple gameti mele wo si o, eye wole aga.

³²Woƒe kposɔwo kple woƒe lã gbogboawo azu nuhaha, eye makaka akotsolawo ahlẽ ɖe yawo katã me, eye mahe dzɔgbevɔ̃e tso goawo katã me ava wo dzi, Yehowa ye gblɔe.

³³Xazor azu amegãxiwo nɔƒe, eye woazu gbegbe ɖaa, amea ɖeke matso aƒe ɖe afima o, eye amegbetɔvia ɖeke mana eme o.

³⁴Yehowa ƒe gbe, si va na nyagblɔɖila Yeremya ɖe Elam ŋu le Yuda-fia Zedekiya ƒe fiaɖuɖu ƒe gɔmedzedzea me la, enye si:

³⁵Ale Yehowa Zebaot gblɔ esi: Maŋe Elam ƒe dati, si nye woƒe ŋusẽ vevietɔ la.

³⁶Makplɔ ya eneawo tso dziƒo ƒe go eneawo dzi ava ƒo ɖe Elam dzi, maka wo ahlẽ ɖe ya siawo katã me, eye dukɔa ɖeke manɔ anyi, si dome Elam ƒe amewo makaka ɖo o.

³⁷Mana dzi naɖe le Elam ƒo le eƒe futɔwo kple eƒe kudilawo nu, mahe dzɔgbevɔ̃e, nye dɔmedzoe heliheli, ava wo dzi, eye maɖo yi ɖe wo yome, vaseɖe esime woatsrɔ̃ avɔ, Yehowa ye gblɔe!

³⁸Yehowa be: Mali nye fiazikpui ɖe Elam, eye matsrɔ̃ fia kple amegãwo siaa.

³⁹Ke magaɖo Elam te le ŋkeke mlɔeawo me, Yehowa ye gblɔe.