Read ewe Yeremya 50 Bible Online

Yeremya 50 - ewe bible

Yeremya 50

¹Yehowa ƒe nya, si wògblɔ fe Babel kple Kaldea-nyigba ŋu to nyagblɔɖila Yeremya dzi la, enye si.

²Mido kpo le dukɔwo dome, miɖe gbe ƒã, eye mido aflaga ɖe dzi! Miɖe gbe ƒã, migaɣlae o! Migblɔ be: Woxɔ Babel, ŋukpe lé Bel, eye wogbã Merodax ƒu anyi! Ŋukpe lé woƒe legbawo, eye wogbã woƒe mawuwo!

³Elabena dukɔa ɖe ho ɖe wo ŋu tso anyiehe, ne wòado aƒedo woƒe anyigba, be amea ɖeke naganɔ edzi o; amegbetɔwo kple lãwo siaa si, eye wobu dzo.

⁴Yehowa be: Le ŋkeke mawo me, le ɣemaɣi la Israel-viwo kple Yuda-viwo siaa atrɔ agbɔ, eye woano avi dzi ava ɖi Yehowa, woƒe Mawu la.

⁵Woabia Zion ta ase, eye afima ma anɔ ŋku dzi na wo be: „Mina míaku ɖe Yehowa ŋu, eye míabla nu mava, si womaŋlɔ be akpɔ o!“

⁶Alẽ tatrawoe nye nye dukɔ; wo kplɔviwo flu wo, eye wokplɔ wo tra yi towo dzii, wole tsatsam tso to dzi yi togbɛ dzi, eye woŋlɔ wo miaƒe be.

⁷Amesiwo katã kpɔ wo la, ɖu wo, eye woƒe futɔwo gblɔ bena; Míeɖi to o, elabena ɖe wowɔ nuvɔ̃ ɖe Yehowa, woƒe dzɔdzɔenyenye ƒe lãnyiƒe, kple Yehowa, wo fofowo ƒe mɔkpɔkpɔ la ŋu.

⁸Misi tso Babel, miʋu tso Kaldea-nyigba dzi, eye minɔ abe agbowo le alẽhawo ŋgɔ ene!

⁹Elabena manyɔ dukɔ gãa ɖe tso anyiehe-nyigba dzi, eye makplɔ wo avɛ ɖe Babel ŋu, ne wòadze aʋa ɖe eŋu ahaxɔe; woƒe aŋukawo le abe kalẽtɔ dzeaɖaŋu tɔ ene, womedaa dadagbo o.

¹⁰Ale Kaldea azu nuhaha; amesiwo katã hãe la, aɖi ƒo, Yehowa ye gblɔe.

¹¹Nye domenyinu halawo, minɔ dzidzɔ kpɔm, eye minɔ aseye tsom ko, miɖi adzrɔ abe nyinɔvi, si le lu tugum la ene, eye mixlɔ̃ abe sɔtsu ene.

¹²Ŋu akpe mia dada, mia no ƒe mo atsi dã; kpo ɖa, dukɔwo ƒe nuwuwu anye gbegbe, kuɖiɖi kple tagba!

¹³Le Yehowa ƒe dɔmedzoe ta azu aƒedo kple gbegbe ɖikaa, ale be amesiame, si to Babel ŋu yina la ƒe nu aku, eye wòado tsiã le woƒe abixɔxɔwo katã ta.

¹⁴Mi aŋutrɔdalawo katã, midze aʋa ɖe Babel ŋu godoo va kpe; mitee, eye migave nu le aŋutrɔ gbɔ o, elabena Yehowa ŋu wòwɔ nuvɔ̃ ɖo.

¹⁵Mitso ayiboopɛɛ ɖe eŋu godoo; ena ta, eƒe sɔtiwo ŋe dze eme, eye eƒe gliwo mũ, elabena Yehowa ƒe hlɔ̃biabia nye esia; mibia hlɔ̃e, eye miwɔ nɛ, abe alesi wòwɔ ene!

¹⁶Mitsrɔ̃ nuƒãla kple nuŋela le nuŋeɣi ɖa le Babel! Amesiame trɔ yi eƒe dukɔ gbɔ, eye amesiame si yi eƒe anyigba dzi le yi wuame la ta.

¹⁷Israel la, alẽ, si wonyã de gbe, eye dzatawo yɔ ɖe nu la wònye; gbã la Asur-fia ɖui, emegbe Babel-fia Nebukadnezar kuko eƒe ƒuwo.

¹⁸Eyata ale Yehowa Zebaot, Israel ƒe Mawu la, gblɔ esi: Kpɔ ɖa, mahe to na Babel-fia kple eƒe anyigba, abe alesi mehe to na Asur-fia ene.

¹⁹Magakplɔ Israel agbɔ va eƒe gbeɖuƒe, ne woaɖu gbe le Karmel dzi kple Basan, eye woaɖu nu aɖi ƒo le Efrayim-towo dzi kple Gilead.

²⁰Yehowa be: Le ŋkeke mawo me, le ɣemaɣi la woadi Israel ƒe vodada, ke manɔ anyi o, eye womagakpɔ Yuda ƒe nuvɔ̃wo o, elabena matsɔe ake amesiwo makpɔtɔ ɖi.

²¹Yehowa be: Ho ɖe aglãdzela vivivowo ƒe anyigba kple toheheviwo ŋu, wu ame, eye natsrɔ̃ woƒe susɔeawo gbidigbidi, eye nawɔ nusiwo katã ŋu mede se na wò le la.

²²Aʋaɣli kple gbegblẽ gã le anyigba dzi!

²³Aleke anyigba blibo la ƒe zũ gbã, eye wòkaka ale? Aleke Babel zu ŋɔdzinu le dukɔwo dome ale?

²⁴Babel, meɖo mɔ̃ na wò, ke mèdze sii o, eye wòɖe wò; asi tu wò, eye wòlé; wò, elabena Yehowa ye nèwɔ avu kple.

²⁵Yehowa ʋu eƒe nudzraɖoƒe, eye wòɖe eƒe dziku ƒe aʋawɔnuwo do goe; elabena dɔ le; Aƒetɔ, Yehowa Zebaot ŋu le Kaldea-nyigba dzi.

²⁶Mitso goawo katã me va ƒo ɖe edzi, miʋu nu le eƒe avawo nu, mihe trɔ ɖe anyi abe lubabla ene, eye mitsrɔ̃e gbidigbidi; migakpɔtɔ naneke ɖi nɛ o.

²⁷Miwu woƒe nyitsuwo katã, mikplɔ wo yi wuƒee. Baba na wo, elabena woƒe toheɣi ɖo.

²⁸Miƒu to anyi! Sisilawo kple amesiwo kpɔtɔ tso Babel-nyigba dzi va, be woaɖe gbe ƒã Yehowa, mía Mawu ƒe hlɔ̃biabia, eƒe hlɔ̃biabia ɖe eƒe gbedoxɔ nu le Zion!

²⁹Miyɔ aŋutrɔdalawo ɖe Babel ŋu! Mi amesiwo katã hea da me, miɖe to ɖee godoo va kpe, amea ɖeke megakpɔtɔ o! Miɖo eƒe nuwɔna teƒe nɛ, miwɔ nɛ pɛpɛpɛ, abe alesi wòwɔ ene, elabena Yehowa, Israel ƒe kɔkɔetɔ la ŋu wòwɔ nu tovo ɖo.

³⁰Yehowa be: Eyata woƒe ɖekakpuiwo atsi woƒe kpɔdomeewo, eye woƒe aʋawɔlawo katã atsrɔ̃ gbemagbe.

³¹Aƒetɔ, Yehowa Zebaot, be: Kpɔ ɖa, mado ɖe dziwò, wò ame tovo; elabena: wò ŋkeke ɖe, wò toheɣi ɖo.

³²Ame tovo la akli nu adze anyi, eye amea ɖeke mafɔe ɖe tsitrenu o, matɔ dzo eƒe duwo, ne wòabi eƒe nutowo katã me.

³³Ale Yehowa Zebaot gblɔ esi: Wote Israel-viwo kple Yuda-viwo siaa ɖe anyi, eye amesiwo katã ɖe aboyo wo la, va wo goŋgoŋ, gbe be, yewomaɖe asi le wo ŋu o.

³⁴Ke wo ɖela sesẽ, eŋkɔ nye Yehowa Zebaot. Adrɔ̃ woƒe nya ade goe, ne wòana gbɔdzɔe anyigba, eye wòaɖe zi Babeltɔwo me.

³⁵Yehowa be, yi neva Kaldeatɔwo, Babeltɔwo kple woƒe amegãwo kple woƒe nunyalawo dzi!

³⁶Yi neva woƒe afakalawo dzi, ne woazu bometsilawo! Yi neva woƒe kalẽtɔwo dzi, ne dzi naɖe le wo ƒo!

³⁷Yi neva woƒe sɔwo kple woƒe tasiaɖamwo kpakple amedzro, siwo katã le wo dome la dzi, ne woazu nyɔnugbɔmewo! Yi neva woƒe kesinɔnuwo dzi, ne woaha wo!

³⁸Kuɖiɖi neva na woƒe tsiwo, ne woamie! Elabena legbawo ƒe anyigba wònye, eye wotsɔ ŋɔdzinuwo le adegbe ƒomee.

³⁹Eyata gbedadiwo kple amegãxiwo atso aƒe ɖi, eye golowo anɔ afima; ame magatso aƒe ɖi akpɔ o, eye ame manɔ eme o, tso dzidzime yi dzidzime.

⁴⁰Yehowa be: Ame matso aƒe ɖe afima alo amegbetɔvia ɖe nanɔ eme o, abe alesi Mawu trɔ Sodom kple Gomora kpakple woƒe aƒelikawo bu anyii ene.

⁴¹Kpɔ ɖa, dukɔa ɖe tso anyiehe gbɔna, eye dukɔ gãa ɖe kple fia geɖewo ho tso anyigba ƒe mlɔenu.

⁴²Da kple akplɔ le wo si, ŋutasẽlawo wonye, eye womekpɔa nublanui o; woƒe ɣli le abe atsiaƒu ƒe gbeɖeɖe ene, wole sɔ dzi, eye wòbia akpa abe aʋawɔla ene ɖe wò Babel-nyɔnuvi ŋu.

⁴³Esi Babel-fia se nya le wo ŋu la, eƒe asiwò ɖo agblɔ, vɔvɔ̃ ɖoe, eye wose veve abe nyɔnu léku ene.

⁴⁴Kpɔ ɖa, ado tso Yordan ƒe aƒlawo me abe dzata ene ayi ɖe lãnyiƒe, si de ama ɖaa la; elabena manyãe ɖa le eŋu le aɖabaƒoƒo ɖeka me, eye amesi metia la, eya matsɔ ado enu. Elabena amekae so kplim, amekae akplɔm ayi ʋɔnui, eye amekae nye lãkplɔvi, si anɔ te ɖe nunye?

⁴⁵Eyata mise Yehowa ƒe adaŋu, si wòde ɖe Babel ŋu, kple eƒe tame, si wòɖo ɖe Kaldea-nyigba ŋu: Vavã woakplɔ lã kudɔewo adzoe, eye woƒe lãnyiƒe ƒe nu aku ɖe wo ŋu.

⁴⁶Anyigba ʋuʋu, eye wose konyifaɣli le dukɔwo dome le ɣli, si ɖi be, woxɔ Babel la ta.