Read ewe Yeremya 52 Bible Online

Yeremya 52 - ewe bible

Yeremya 52

¹Zedekiya xɔ ƒe blave vo ɖekɛ, esime wòzu fia, eye woɖu fia ƒe wuiɖekɛ le Yerusalem. Dada ŋkɔ enye Xamital, Libnato Yeremya ƒe vinyɔnu.

²Ewɔ nusi nye vɔ̃ le Yehowa ŋku me, abe alesi Yoyakim wɔ pɛpɛpɛ ene.

³Elabena Yehowa do dɔmedzoe ɖe Yerusalem kple Yuda ŋu, vaseɖe esime wòtsɔ wo ƒu gbe le eƒe ŋku ta. Eye esi Zedekiya dze aglã ɖe Babel-fia ŋu la,

⁴Babel-fia Nebukadnezar kple eƒe aʋakɔ blibo la ho ɖe Yerusalem ŋu le eƒe fiaɖuɖu ƒe ƒe asiekelia me le dzinu ewolia ƒe ŋkeke ewolia dzi; woɖe to ɖee, eye woƒu kpo ɖe eŋu godoo va kpe.

⁵Woɖe to ɖe dua, vaseɖe Zedekiya ƒe ƒe wuiɖekɛlia me.

⁶Le dzinu enelia ƒe ŋkeke asiekelia dzi la dɔwuame nu sẽ le dua me, ale be aboloa ɖeke megali na dukɔ hahoo la o.

⁷Woŋɔ mɔ ɖe dua ŋu, eye aʋawɔlawo ka tã si to fia ƒe abɔ me mɔ, to agbo, si le gli ŋukplaba eve dome la nu hegblẽ du la ɖi le zã me, eye wòto gbegbemɔ; ke Kaldeatɔwo le glia ŋu godoo.

⁸Tete Kaldeatɔwo ƒe aʋakɔ yɔ fia la ɖe nu heva tu Zedekiya le Yerixo-tagba, eye eƒe aʋawɔlawo katã kaka le eŋu.

⁹Tete wòlé fia la hekplɔe yina Babel-fia le Ribla le Xamat-nyigba dzi, eye wòbu fɔe.

¹⁰Eye Babel-fia wu Zedekiya viwo le eya ŋutɔ ŋku me, eye wowu Yuda-amegãwo katã hã le Ribla.

¹¹Egbã ŋku na Zedekiya, eye wòde kɔsɔkɔsɔe, eye Babel-fia kplɔe yi Babel hetsɔe ɖe gaxɔ me vaseɖe eƒe kugbe.

¹²Le dzinu atɔ̃lia ƒe ŋkeke ewolia dzi, si nye fia Nebukadnezar, Babel-fia ƒe ƒe wuiasiekelia dzi la, fia ŋu srafowo ƒe amegã Nebuzaradan, amesi nɔa tsitre ɖe Babel-fia ŋku me la, va Yerusalem,

¹³eye wòtɔ dzo Yehowa ƒe aƒe kple fia ƒe aƒe, Yerusalem-xɔwo katã kple bubumewo ƒe xɔwo katã.

¹⁴Eye Kaldeatɔwo ƒe aʋakɔ blibo, si le fia ŋu srafowo ƒe amegã ŋu la, gbã Yerusalem ƒe gliwo katã ƒu anyi.

¹⁵Fia ŋu srafowo ƒe amegã Nebuzaradan ɖe aboyo dukɔ la ƒe ame dahewo dometɔa ɖewo, dukɔ la ƒe ame mamlea, siwo kpɔtɔ ɖe dua me, kple amesiwo yi ɖe Babel-fia dzi, kpakple aɖaŋudɔwɔlawo ƒe susɔeawo dzoe.

¹⁶Eye fia ŋu srafowo ƒe amegã Nebuzaradan gblẽ anyigba dzi ame dahea ɖewo ɖi, be woanye weingbledelawo kple agbledelawo.

¹⁷Kaldeatɔwo gbã akɔblisɔti, siwo le Yehowa ƒe xɔ ŋu, kple anyinɔwo kpakple akɔbligazɔ, si le Yehowa ƒe me la, eye wotsɔ woƒe akɔbliwo katã yi Babel.

¹⁸Eye wotsɔ zeawo, sofiawo, hɛawo, treawo, gatsiawo kple akɔblinuawo katã, siwo wotsɔna subɔnae la dzoe.

¹⁹Eye fia ŋu srafowo ƒe amegã tsɔ nusiwo nye sika kple klosalo sɔŋ la dzoe. Kpluwo, sonuwo, trewo, zewo, akaɖitiwo, gatsiwo kple agbawo.

²⁰Sɔti eveawo, gazɔ la kple akɔblinyi wuieveawo, siwo le ete, kpakple anyinɔawo, nusiwo fia Salomo wɔ hena Yehowa ƒe aƒe la; nusiawo katã ƒe akɔbli mele dada me o.

²¹Sɔti ɖeka kɔ abɔklugui wuienyi, eye ka abɔklugui wuieve atui akpe ɖo, to le eme, eye wòtri asibide ene ƒe kekeme.

²²Wotsɔ akɔbli wɔ kɔ ɖe eta me, eye kɔ la kɔ abɔklugui alɔ̃, ɖɔ lɔlɔ̃ kple yevuboɖawo ƒo xlã kɔ la godoo va kpe, akɔbli sɔŋ wonye. Nusiawo tɔgbe kple yevuboɖawo le sɔti evelia hã ŋu.

²³Yevuboɖa blaasieke vɔ ade le goawo katã me; yevuboɖa, siwo katã le ɖɔ la ŋu godoo va kpe la, le wo ame alafa ɖeka.

²⁴Eye fia ŋu srafowo ƒe amegã kplɔ nunɔlagã Seraya kple nunɔlagã yometɔ Zefanya kpakple kpuinudzɔla etɔ̃

²⁵kple aƒedzikpɔla ɖeka, si le aʋawɔlawo nu, fiaŋume adre, siwo wokpɔ le dua me, aʋafia ƒe agbalẽŋlɔla, amesi yɔa dukɔ hahoo la hena aʋawɔwɔ kpakple dukɔ hahoo la dome ŋutsu blaade, siwo wokpɔ le dua me;

²⁶amesiawo fia ŋu srafowo ƒe amegã Nebuzaradan kplɔ yi na Babel-fia le Ribla.

²⁷Eye Babel-fia da nu wo hewu wo le Ribla le Xamat-nyigba dzi. Ale woɖe aboyo Yuda tso edenyigba dzi.

²⁸Amesiwo Nebukadnezar ɖe aboyoe la, wonye si: Le ƒe adrelia me la woɖe aboyo Yudatɔ akpe etɔ kple blave vɔ etɔ̃;

²⁹woɖe aboyo ame alafa enyi kple blaetɔ̃ vɔ eve tso Yerusalem le Nebukadnezar ƒe ƒe wuienyilia me;

³⁰eye fia ŋu srafowo ƒe amegã Nebuzaradan ɖe aboyo ame alafa adre kple blane vɔ atɔ̃ dzoe le Nebukadnezar ƒe ƒe blave vɔ etɔ̃lia me; wo katã le ame akpe ene alafa ade.

³¹Esime woɖe aboyo Yuda-fia Yoyaxin le ƒe blaetɔ̃ vɔ adre megbe le dzinu wuievelia ƒe ŋkeke blave vɔ atɔ̃lia dzi la, Babel-fia Evil-Merodax ɖe ga Yuda-fia Yoyaxin le ƒe, si me wòzu fia, eye woɖee tso gaxɔ me;

³²eƒo nu fafɛ kplii, eye wòtsɔ eƒe zikpui ɖo fia, siwo kpe ɖe eŋu le Babel la ƒe zikpui ŋgɔ.

³³Eɖɔ li eƒe gaxɔmewuwo, eye woɖu nu le egbɔ ɖaa le eƒe agbenɔɣi katã.

³⁴Eye Babel-fia na eƒe nuɖuɖui ɖaa, alesi nu wòbiã gbesiagbe le eƒe agbenɔɣi katã, vaseɖe esime woku.