Read ewe Xezekiel 15 Bible Online

Xezekiel 15 - ewe bible

Xezekiel 15

¹Eye Yehowa ƒe gbe va nam be:

²Amevi, nukae nye weinka ƒe nake le nake bubuwo katã dome, eye nukae nye weinka le avemetiwo dome?

³Ɖe woatsɔ eƒe ati awɔ naneea, eye ɖe woatsɔe awɔ tsyoti aku nu ɖe eŋua?

⁴Kpɔ ɖa, wotsɔe na dzo, be wòafiã. Ne dzo fiã eƒe goawo kple eve, eye dzo ƒo domedomee nɛ la, ɖe wògale nane wowɔ mea?

⁵Kpɔ ɖa, esi wògale blibo la, mele naneke wɔwɔ me o, azɔ esi dzo fiãe, eye wòƒo dzo la, ɖe wòayi nane wɔwɔ me nɔ gea?

⁶Eyata ale Aƒetɔ Yehowa gblɔ esi: Alesi metsɔ weinka ƒe nake de asi na dzo, be wòafiã le avemetiwo dome la, nenema ke mawɔ Yerusalemtɔwoe.

⁷Matrɔ nye mo ɖe wo ŋu: dzo nu wòsi le, dzo ke afiã wo, eye miadze sii be, nyee nye Yehowa, nenye be, metrɔ nye mo ɖe wo ŋu.

⁸Eye mado gbegbe woƒe anyigba, le esi wotrɔ ʋu le yonyeme ta, Aƒetɔ Yehowa ye gblɔe.