Read ewe Xezekiel 16 Bible Online

Xezekiel 16 - ewe bible

Xezekiel 16

²Amevi, ɖe Yerusalem ƒe ŋunyɔnuwo katã fiae.

³Eye gblɔ bena: Ale Aƒetɔ Yehowa gblɔ na Yerusalem enye si: Wò dzɔƒe kple dziwòƒe enye Kanaan-nyigba; Amoritɔe nye fofowò, eye Xititɔe nye dawo.

⁴Gbesigbe wodzi wò la, wometso ƒoƒolika na wò o, eye womele tsi na wò, be ŋuwò nadza o, womesi dze na wò o, eye wometsɔ wò mlɔ tsihe dzi o.

⁵Ŋkua ɖeke mekpɔ nublanui na wò, ne woawɔ nusiawo dometɔa ɖeke na wò ahakpɔ tawò o, ke boŋ wotsɔ wò ƒu gbe ɖe gbe me, eye wonyɔ ŋu wò agbe le gbesigbe wodzi wò.

⁶Tete meva to ŋuwò yi, eye mekpɔ wò nèle afɔti dam le wò ʋu me. Eye megblɔ na wò le wò ʋu me be: Atsi agbe! Wò ʋu mee nèle megblɔ na wò be: Atsi agbe!

⁷Eye mana nasɔ gbɔ abe gbe le gbe me ene! Etsi heka ta, eye neɖo ɖetugbi atiati me; ète no, eye wò ɖa to; ke ènɔ amama heno ƒeƒle.

⁸Tete meva to ŋuwò yi, eye mekpɔ be, wò srɔ̃ɖeɣi ɖo; mekeke nye aʋala ɖe dziwò, eye metsyɔ nu wò ama, meka atam na wò, eye mebia nu kpli wò nèzu tɔnye; Aƒetɔ Yehowa ye gblɔe.

⁹Mele tsi na wò, meklɔ nu le ŋuwò, eye mesi ami na wò;

¹⁰meta avɔ ŋɔŋɔe na wò, eye meɖo lãgbalẽ nyuitɔ ƒe atokota na wò, metsɔ aklala bla ta na wò, eye metsɔ seda wɔ taɖedzi na wò;

¹¹meɖo atsyɔ̃ na wò, meɖe abɔgɛ abɔ na wò, eye mede kɔgɛ kɔ na wò;

¹²mede ŋɔtigɛ ŋɔti na wò, kple togɛ to na wò, eye metsɔ sikatsyɔnu nyui ɖɔ ɖe ta na wò.

¹³Edo sika kple klosalo, wò avɔtata nye aklala, seda kple avɔ ŋɔŋɔe, eye wò nuɖuɖu nye wɔ memee, anyitsi kple ami; ale nèdze tugbe eteƒe mekɔ o, eye fiaɖuƒe su asiwò.

¹⁴Eye wò ŋkɔ nyɔ le dukɔwo dome le wò tugbedzedze ta, elabena nye atsyɔ̃, si meɖo na wò la, gbɔgblɔ mele eŋu o, Aƒetɔ Yehowa ye gblɔe.

¹⁵Ke eɖo dzi ɖe wò tugbedzedze ŋu, eye esi wò ŋkɔ nya ŋuti la, ètsɔ wò gbolowɔwɔ do dzodzoe ɖe amesiame, si va tso me yi la ŋu wòzu etɔ.

¹⁶Etsɔ wò avɔwo dometɔa ɖewo wɔ nuxeƒe ŋɔŋɔewoe, eye nèwɔ gbolo le afima, nusi tɔgbe meva eme kpɔ o, eye mele eme va ge akpɔ o.

¹⁷Etsɔ nye sika kple nye klosalo ƒe atsyɔ̃nu, siwo metsɔ na wò la, wɔ ŋutsu ƒe nɔnɔmewo, eye nèwɔ gbolo kple wo.

¹⁸Etsɔ nye avɔ ŋɔŋɔewo tsyɔ na wo, eye nètsɔ nye ami kple nye dzudzɔʋeʋẽedonu ɖo wo kɔme.

¹⁹Eye nusi metsɔ na wò, be naɖu, wɔ memee, ami kple anyitsi la, woawo netsɔ ɖo wo kɔme, ne wòaʋẽ ɖe wo lilili; alea nèwɔ, Aƒetɔ Yehowa ye gblɔe!

²⁰Elé wò ŋutsuvi kple wò nyɔnuvi, siwo nèdzi nam la, hewu na wo, be woaɖu. De wò gbolowɔwɔ mesɔ gbɔ o,

²¹hafi nègawu vinyeŋutsuwo hetɔ dzoea?

²²Le wò ŋunyɔnuwo katã kple wò gbolowɔwɔwo me la mèɖo ŋu wò ɖevimenɔɣi, esime nèɖe ama le ƒeƒle hele afɔti dam le wò ʋu me la o.

²³Aƒetɔ Yehowa be: Baba na wò, baba na wò! Le wò nu vɔ̃ɖiwo katã wɔwɔ megbe la

²⁴ètu trɔ̃xɔwo na ɖokuiwò, eye nèwɔ nuxeƒewo ɖe kpɔdomeewo katã;

²⁵èwɔ nuxeƒewo ɖe kpɔdomeewo ƒe dzogoewo katã dzi, eye nedo ŋunyɔ wò tugbedzedze; èke ata na amesiwo katã va yina, eye nena wò gbolowɔwɔ sɔ gbɔ ɖe edzi.

²⁶Ewo gbolo kple wò aƒelika Egipte-viwo, amesiwo ŋutsu lekpẽ li na, eye nena wò gbolowɔwɔ sɔ gbɔ ɖe edzi, ne natsɔ ado dziku nam.

²⁷Kpɔ ɖa, mado nye asi ɖa ɖe ŋuwò, eye maka ɖe le wò gome ŋu, eye matso wò ade asi na wò futɔwo, Filistitɔwo ƒe nyɔnuviwo ƒe nyanyrã, amesiwo wò ŋukpenanuwɔwɔwo le ŋu kpem na.

²⁸Ewo gbolo kple Asur-viwo, le esi nu metia ko na wò o ta; ewo gbolo kpli wo, ke nu meti ko na wò o.

²⁹Eye nègawɔ gbolo ɖe dzi kple Kaldea, si nye asitsalawo ƒe anyigba; ke eya hã meli ko na wò o.

³⁰Aƒetɔ Yehowa be: Nu te wò dzi ŋu, esi nèwɔ nusiawo katã, abe alesi gbolo ŋukpenanuwɔla wona ene;

³¹esi nètu trɔ̃xɔwo ɖe kpɔdomeewo ƒe dzogoewo katã dzi, eye nèwɔ nuxeƒewo ɖe ablowo katã me. Ke wòa mèle abe gbolo bubuwo ene, ne nahayi vlo ɖo ge gbolohoa ɖeke o.

³²Nyɔnu ahasitɔ, si ɖe ŋutsu bubu ɖe srɔ̃a te, nènye!

³³Gbolo bubuwo katã la, ɖe wonaa nu wo, ke wòa èna nu wò ahiãviwo katã; ɖe nèna nu wo, be woatso goawo katã me avawo amatre kpli wò.

³⁴Towo to vovo le wò gbolowɔwɔ me tso nyɔnu bubuwo tɔ gbɔ, womedi ahiã wò o, eye wòa nèxe fe ɖe eta, evɔ wònye wòe woaxe fe na hafi; ale tɔwò to vovo sã.

³⁵Eyata, wò gbolo, se Yehowa ƒe nya!

³⁶Ale Aƒetɔ Yehowa gblɔ esi: Esi nètso wò gbolowɔwɔ kple wò ahiãviwo kpakple wò legba nyɔŋuawo katã, siwo nètso viwòwo ƒe ʋu na la, hewɔ be, wò ŋukpe gbagba ƒo ɖi, eye wò ama dze la,

³⁷eyata maƒo wò ahiãviwo katã nu ƒu, esiwo ƒe nu dze ŋuwò kple esiwo katã nèlɔ̃na kpakple esiwo katã nèlé fui, maƒo wo nu ƒu ɖe ŋuwò tso goawo katã me, eye maɖe ama wò, ne woakpɔ wò ama blibo la.

³⁸Madrɔ̃ ʋɔnu wò ɖe gbolowo kple nyɔnu hlɔ̃dolawo ƒe se nu, eye mahe dziku kple ŋuʋaʋã ƒe ʋu ava dziwò.

³⁹Matso wò ade asi na wo, eye woagbã wò trɔ̃xɔwo ahamũ wò nuxeƒewo aƒu anyi, woaɖe ava le ŋuwò, eye woaxɔ wò atsyɔ̃nuawo ahagblẽ wò ɖi natsi ama anɔ ƒeƒle.

⁴⁰Woayɔ amehawo ɖe ŋuwò, eye woaxlã kpe ɖe wò ahadza wò kple woƒe yiwo.

⁴¹Woata dzo wò xɔwo, eye woahe to na wò le nyɔnu geɖewo ŋku me; matsi wò gbolowɔwɔ nu, eye magaxe gboloho azɔ o.

⁴²Mana nye dziku nu nafa ɖe ŋuwò, be nye ŋuʋaʋã nadzo le ŋuwò, eye magbɔ ɖe eme, nyemagado dɔmedzoe azɔ o.

⁴³Esi meɖo ŋu wò ɖevimenɔɣi o, ke boŋ nètsɔ nusiawo katã do dziku nam ŋuti la, eyata kpɔ ɖa, mahe wò zɔzɔme ava wò ta dzi, Aƒetɔ Yehowa ye gblɔe: Ɖe mèhewɔ ŋukpenanu sia kpe ɖe wò ŋunyɔnuwo katã ŋu o ɖe!

⁴⁴Kpɔ ɖa, ne amesiame be, yeado hamelo la, adoe ɖe ŋuwò bena: „Alesi dada le la, nenema vianyɔnu nɔna.“

⁴⁵Dawò vinyɔnu kpamkpam nenye, eya amesi gbe srɔ̃a kple viawo; eye nɔvinyɔnu kpamkpam nènye na nɔviwònyɔnuwo, amesiwo gbe wo srɔ̃wo kple wo viwo; Xititɔe nye mia dada, eye Amoritɔe nye mia fofo.

⁴⁶Dawòe nye Samaria hekpe ɖe vianyɔnu, siwo le wò mia me la ŋu, eye wò tsɛ nye Sodom hekpe ɖe vianyɔnu, siwo le wò ɖusi me la ŋu.

⁴⁷Ɣeyiɣi kpuia ɖe ko mèzɔ woƒe mowo dzi o, eye mewɔ nu ɖe woƒe ŋunyɔnuwo nu o; tete nèwɔ nu le wò mowo katã dzi wòvloe wu wo to.

⁴⁸Ale Aƒetɔ Yehowa gblɔ esi: Meta ɖokuinye ƒe agbe: Ne nɔviwònyɔnu Sodom kple vianyɔnuwo hewɔ, abe alesi mia kple viwònyɔnuwo miewɔ ene fi!

⁴⁹Kpɔ ɖa, nɔviwònyɔnu Sodom ƒe vodada enye: Dàda kple nuɖuɖu fũ, eye eya kple nɔvianyɔnuwo nɔ agbe vivi bɔkɔɔ; ke mekpe ɖe ame dahewo kple hiãtɔwo ŋu o.

⁵⁰Woda, eye wowɔ ŋunyɔnu le ŋkunye me, eye esi mekpɔe ko la, meɖe wo ɖa.

⁵¹Samaria mewɔ wò nuvɔ̃wo ƒe afã o, eye ewo ŋunyɔnu wui; ale nètsɔ wò ŋunyɔnu, siwo katã nèwɔ la, tso afia na nɔviwònyɔnuwo.

⁵²Eyata wò hã ŋukpe nenɔ dziwò, le esi nexɔ nya ɖe nɔviwònyɔnuwo ta ŋuti, etso wò nuvɔ̃ nyɔŋu, siwo newɔ wu wo la, na be, wo to dzo wu towo. Eyata ŋu nekpe wò, eye wò ŋukpe nenɔ dziwò, le esi nètso afia na nɔviwònyɔnuwo ta.

⁵³Magaɖo wo te, maɖo Sodom kple vianyɔnuwo te kple Samaria kpakple vianyɔnuwo te, eye maɖo wò hã te le wo dome,

⁵⁴ne wò ŋukpe nanɔ dziwò, eye ŋu nakpe wò le nusiwo katã nèwɔ hetsɔ fa akɔ na wo la ta.

⁵⁵Nɔviwònyɔnu Sodom kple vianyɔnuwo agaɖo woƒe nɔnɔme tsãtɔ me, Samaria kple vianyɔnuwo agaɖo woƒe nɔnɔme tsãtɔ me, eye mia kple viwònyɔnuwo miagaɖo miaƒe nɔnɔme tsãtɔ me.

⁵⁶Ɖe nɔviwònyɔnu Sodom ƒe ŋɔdzinya menɔ nuwò me le wò dadaɣi,

⁵⁷hafi ne woava klo nu le wò vɔ̃ɖiwɔwɔ dzi, abe alesi nezu vlodonu na Aram-nyɔnuviwo kple Filistitowo ƒe nyɔnuviwo, amesiwo ƒo xlã wò godoo, eye wole alɔme ɖem le ŋuwò le goawo katã me la ene oa?

⁵⁸Wò ŋukpenanuwɔwɔwo kple wò ŋunyɔnuwo anɔ dziwò, Yehowa ye gblɔe!

⁵⁹Elabena ale Aƒetɔ Yehowa gblɔ esi: Esi nèdo vlo atam la, eye netu nubabla la, eye mewɔ na wò, abe alesi nèwɔ ene hã la,

⁶⁰maɖo ŋu nye nu, si mebia kpli wò le wò ɖevimenɔɣi, eye mabia nu mavɔ kpli wò.

⁶¹Nenye be, ekplɔ nɔviwònyɔnuwo, esiwo nye xoxo na wò kple esiwo nye ɖevi na wò, eye metsɔ wo wɔ viwònyɔnuwoe, ke menye le wò nubabla la ta o la, ekema àɖo ŋu wò zɔzɔme, eye ŋu akpe wò.

⁶²Mabia nu kpli wò, ne nadze sii be, nyee nye Yehowa;

⁶³ne naɖo ŋui, ŋukpe nalé wò, eye wò nu nade ga le ŋukpe ta, nenye be, metsɔ nusiwo katã nèwɔ la, ke wò, Aƒetɔ Yehowa ye gblɔe!