Read ewe Xezekiel 22 Bible Online

Xezekiel 22 - ewe bible

Xezekiel 22

¹Eye Yehowa ƒe gbe va nam bena:

²Amevi, ɖe nebe, yeadrɔ̃ ʋɔnu, yeadrɔ̃ ʋɔnu hlɔ̃dodu laa? Ekema ɖe eƒe ŋunyɔnuwo katã fiae

³gblɔ bena; Ale Aƒetɔ Yehowa gblɔ esi: Wò du, si ko ʋu ɖe eɖokui me, ne wò ɣeyiɣi naɖe, eye nèwɔ legbawo, ne natsɔ agblẽ ko ɖo na ɖokuiwò.

⁴Eda vo to wò ʋu, si nèkɔ ɖe anyi la me, eye nètso wò legba, siwo newɔ la, gblẽ kɔ ɖo na ɖokuiwò, ehe wò ŋkeke va aƒegbɔe, eye nèɖo wo ƒewo ƒe nuwuwu; eyata matsɔ wò awɔ vlodonu na dukɔwo kple alɔmeɖenu na anyigbawo katã.

⁵Amesiwo le kpuiƒe kple didiƒe la, aɖu fewu le ŋuwò be, wò ŋkɔ gblẽ, eye ʋunyaʋunya bɔ ɖe mewò.

⁶Kpɔ ɖa, Israel ƒe amegãwo dometɔ ɖesiaɖe le adegbe ƒom ɖe eƒe alɔ ŋu le mewò, ne wòakɔ ʋu ɖi.

⁷Wodoa vlo fofo kple dada le mewo, wotea amedzro ɖe anyi le mewo, eye wosẽa ŋuta le tsyɔ̃evi kple ahosi ŋu le mewo.

⁸Eɖoa vlo nye kɔkɔeƒe la, eye negblẽa ko ɖo na nye dzudzɔgbewo.

⁹Ame gɔmezɔlawo le mewò, ne woakɔ ʋu ɖi, woɖua nu le towo dzi le mewo, eye wowɔa ŋukpenanu le mewo.

¹⁰Woɖea ama fofo le mewo, eye woɖea asi nyɔnu, si kpo dzinu la ŋu le mewò.

¹¹Amesiame wɔa ŋunyɔnu ɖe ehavi srɔ̃ ŋu, amesiame wɔa ŋukpenanu kple eƒe tɔyɔvinyɔnu hedoa gu eɖokui, eye amesiame dea asi nɔvianyɔnu, si nye fofoa ƒe vinyɔnu la ŋu.

¹²Woxɔa zãnu le mewo, ne wòakɔ ʋu ɖi, eɖia kasa, eye nexɔa deme, ẽɖua sesẽnu le nɔviwò si, eye wò ŋku dzona le dzinye. Aƒetɔ Yehowa ye gblɔe.

¹³Kpɔ ɖa, masi akpe ɖe viɖe, siwo nekpɔ, kple hlɔ̃, si wodo le mewo la ŋu.

¹⁴Ɖe dzi anɔ ƒowò, eye ŋusẽ anɔ wò asi ŋu le ŋkeke, siwo me mawɔ nu kpli wòa? Nye Yehowa ye ƒo nu, eye mawɔe hã.

¹⁵Makaka wò ɖe dukɔwo dome, mahlẽ wò ɖe anyigbawo dzi, eye mana wò ɖiƒoƒo nu natso le ŋuwò,

¹⁶eye azu busu me le dukɔwo ŋku me, ne nadze sii be, nyee nye Yehowa.

¹⁷Eye Yehowa ƒe gbe va nam bena:

¹⁸Amevi, Israel ƒe aƒe blibo la zu aŋuka nam; akɔbli, gaɣi, gayibɔ kple tsumi wonye le kpo me, klosaloŋuka wozu.

¹⁹Eyata ale Aƒetɔ Yehowa gblɔ esi: Esi mi katã miezu aŋuka la, eyata mala mi akɔ ɖe Yerusalem.

²⁰Alesi wolɔa klosalo, akɔbli, gayibɔ, tsumi kple gaɣi kɔna ɖe kpo me, ne woaƒlɔ dzo ɖe eŋu wòalólo la, nenema mala mi akɔ ɖi le nye dɔmedzoe kple nye dziku me, eye matsɔ mi ade eme mialólo.

²¹Maƒo mia nu ƒu, eye maƒlɔ nye dɔmedzoe ƒe dzo ɖe mia ŋu, ne mialólo le eme.

²²Alesi wolóloa klosalo le kpo mee la, nenema woalólo mi le emee, eye miadze sii be, nye Yehowa ye trɔ nye dziku ƒo ɖe mia dzi.

²³Eye Yehowa ƒe gbe va nam bena:

²⁴Amevi, gblɔ nɛ bena: Wòe nye anyigba, si dzi tsi madza ɖo o, eye tsi maƒoe le dzikudoɣi o.

²⁵Eƒe nyagblɔɖilawo ɖoa gbe ɖi le eme, wole abe dzata, si le gbe tem hele nu vuvum ene, woɖua amewo, wolɔa kesinɔnuwo kple nu veviwo dzonɛ, eye wonana ahosiwo sɔgbɔna le eme.

²⁶Eƒe nunɔlawo toa vo ɖe nye se la ŋu, eye wogblẽa kɔ ɖo na nye kɔkɔeƒe la; womedea vovo nu kɔkɔe kple nu makɔmakɔ dome o, eye womefiaa vovototo, si le nu dzadzɛ kple nu madzamadza dome o, wotsyɔa nu ŋku me ɖe nye dzudzɔgbewo, eye wogblẽa kɔ ɖo nam le wo dome.

²⁷Eƒe amegãwo le abe amegãxi lénuwo ene le eme, ne wòakɔ ʋu ɖe anyi, woatsrɔ̃ amewo, eye woakpɔ viɖe.

²⁸Woƒe nyagblɔɖilawo sia akalo ɖe nu ŋu na wo, wokpɔa aʋatso-ŋutega, eye wogblɔ alakpanya ɖi na wo bena: Ale Aƒetɔ Yehowa gblɔ esi; evɔ wònye Yehowa meƒo nu o hafi.

²⁹Dukɔ hahoo la ɖua sesẽnu, eye wodaa adzo, esẽa ŋuta le ame dahewo kple hiãtɔwo ŋu, eɖua sesẽnu le amedzrowo si hedaa se la dzi.

³⁰Medi ame le wo dome, si aɖo gli, eye wòatsi tre ɖe gbagbãƒe le ŋkunye me ɖe anyigba la nu, ne magagblẽe o, ke nyemekpɔ ɖeke o.

³¹Eyata metrɔ nye dɔmedzoe ƒo ɖe wo dzi, metso nye dzinu ƒe dzo tsrɔ̃ wòe, eye mehe woƒe zɔzɔme va woƒe ta dzi, Aƒetɔ Yehowa ye gblɔe!