Read ewe Xezekiel 44 Bible Online

Xezekiel 44 - ewe bible

Xezekiel 44

¹Tete wògbugbɔm va kɔkɔeƒe ƒe agbo kɔtoetɔ, si dze ŋgɔ ɣedzeƒe gome la nu; ke ele dodo.

²Eye Yehowa gblɔ nam bena: Agbo sia netsi dodo, womaʋui o, eye amea ɖeke mato enu age ɖe eme o; esi wònye Yehowa, Israel ƒe Mawu la, to enu ge ɖe eme la, eyata netsi dodo.

³Ke amegã la nebɔbɔ nɔ anyi ɖe eme, ne wòaɖu nu le Yehowa ŋku me. Agbo la ƒe akpata ƒe axa dzi wòato ava eme, eye afima ke wòato ado go.

⁴Emegbe wòkplɔm to anyiehegbo la nu yi gbedoxɔ la nu, eye mekpɔ be, Yehowa ƒe ŋutikɔkɔe ya Yehowa ƒe xɔ la taŋ; tete metsyɔ mo anyi.

⁵Eye Yehowa gblɔ nam bena: Amevi, ɖo ŋku anyi nakpɔ nu kple ŋku, eye nase nya, siwo katã gblɔ ge mala na wò le Yehowa ƒe aƒe ƒe ɖoɖowo katã kple sewo katã ŋu la, kple wò to; lé ŋku ɖe afisi woato age ɖe aƒe la me kple kɔkɔeƒe la ƒe afisiwo katã woato ado la ŋu.

⁶Eye gblɔ na Israel ƒe aƒe sẽto la bena: Ale Aƒetɔ Yehowa gblɔ esi: Israel ƒe aƒe, míaƒe ŋunyɔnuwo katã do ɖoɖo,

⁷elabena miekplɔ amedzro, siwo nye bolotɔwo, eye wometso dziʋa hã na wo o la vɛ, be woanɔ nye kɔkɔeƒe la, eye woagblẽ kɔ ɖo na nye aƒe la; eye mietu nye nubabla la hekpe ɖe miaƒe ŋunyɔnuwo katã ŋu, le esime mietsɔ nye nuɖuɖu, ami kple ʋu sa vɔe,

⁸eye miewɔ nye kɔkɔeƒe la ƒe dowo o, ke boŋ mieɖo woawo, be woasubɔ le nye kɔkɔeƒe la.

⁹Eyata ale Aƒetɔ Yehowa gblɔ esi: Amedzro, siwo nye bolotɔwo, wometso dziʋa hã na wo o, amedzro, siwo katã le Israel-viwo dome la dometɔa ɖeke megava nye kɔkɔeƒe la o;

¹⁰ke boŋ Lewi-vi, siwo trɔ le yonyeme, esime Israel tra mɔ, eye wòdzo le gbɔnye hedze legbawo yome la ƒe vodadawo anɔ wo dzi;

¹¹eye woanye aƒe la ƒe agbonudzɔlawo le nye kɔkɔeƒe la, eye woasubɔ le aƒe la me; Woawu numevɔsalã kple akpedavɔsalã na dukɔ la, eye woatsi tre ɖe wo gbɔ asubɔ wo.

¹²Esi wosubɔ wo le woƒe legbawo ŋku me, eye wokplɔ Israel ƒe aƒe la de vodada me la, eyata mekɔ nye asi dzi ɖe wo ŋu, ka atam bena: Ne womatsɔ woƒe vodadawo o fi! Aƒetɔ Yehowa ye gblɔe.

¹³Womate ɖe ŋunye anye nunɔlawo asubɔm o, eye womate ɖe nye nu kɔkɔewo katã, siwo nye nu kɔkɔetɔwo la ŋu o, ke boŋ woatso woƒe ŋukpe kple ŋunyɔnu, siwo wowɔ la.

¹⁴Eye matsɔ wo aɖo aƒe la ƒe subɔlawo hena eƒe subɔsubɔdɔwo katã kple dɔ, siwo katã wowɔna le eme.

¹⁵Ke nunɔla, siwo nye Lewi-viwo, amesiwo tso Zadok-viwo dome, eye wosubɔ le nye kɔkɔeƒe la me, esime Israel-viwo trɔ le yonyeme la, woawo nete ɖe ŋunye, ne woasubɔm, eye woatsi tre ɖe ŋkunye me, ne woatsɔ ami kple ʋu asa vɔ̃e nam, Aƒetɔ Yehowa ye gblɔe.

¹⁶Woawo neyi nye kɔkɔeƒe la, eye woate de nye kplɔ ŋu, ne woasubɔm, eye woawɔ nye subɔsubɔdɔwo.

¹⁷Ne wobe, yewoage ɖe xɔxɔnu metɔ ƒe agbo me la, woaɖo aklalawuwo; lãfuvɔa ɖeke megana wo ŋu, ne wole subɔsubɔm le xɔxɔnu metɔ ƒe agbowo me kple xɔ la me o.

¹⁸Aklalatablanu nenɔ la na wo, eye woaɖo aklalagbotɛ ɖe ali; womegatsɔ nusi woa fifia ame la, bia ali dzi o.

¹⁹Ne wole dodo ge ayi dukɔ la gbɔ le xɔxɔnu kɔtoetɔ la, woaɖe woƒe awu, siwo wodo subɔ la, ɖe xɔvi kɔkɔeawo me, eye woado awu bubuwo, ne womagatsɔ woƒe awuwo ana dukɔ la ŋu nakɔ o.

²⁰Womegalũ ta kokoe o, ke womegana woƒe taɖa nato ʋuya o, ke boŋ woako ta wòasɔ.

²¹Nunɔlaa ɖeke megano wein, ne ele xɔxɔnu metɔ yi ge o.

²²Womaɖe ahosi alo nyɔnu, si wogbe la o, ke boŋ woaɖe ɖetugbi tso Israel ƒe aƒe ƒe ƒome la me; ke wokpɔ mɔ aɖe nunɔlawo ƒe ahosi.

²³Woafia vovo, si le nu kɔkɔe kple nu makɔmakɔ dome, kpakple vovo, si le nu madzamadza kple nu dzadzɛ dome la, nye dukɔ.

²⁴Woabɔbɔ nɔ anyi ɖe dzrenyawo ŋu, eye woadrɔ̃ ʋɔnu ɖe nye ɖoɖowo nu; woalé ŋku ɖe nye sewo, nye ɖoɖowo kple nye ŋkekenyuiewo katã ŋu, eye woakɔ nye dzudzɔgbe la ŋuti.

²⁵Womegayi ame kuku gbɔ, ne woagblẽ kɔ ɖo na wo ɖokui o; negbe wo fofo kple wo dada, wo viŋutsu kple wo vinyɔnu, wo nɔviŋutsu kple wo nɔvinyɔnu, si meɖe srɔ̃ o la ŋu ko wokpɔ mo agblẽ kɔ ɖo le.

²⁶Ne eŋu kɔ la, woaxlẽ ŋkeke adre nɛ,

²⁷eye gbesigbe wòyi xɔxɔnu metɔ le kɔkɔeƒe la, be yeasubɔ le kɔkɔeƒea la, nesa nuvɔ̃vɔ, Aƒetɔ Yehowa ye gblɔe.

²⁸Woƒe domenyinu enye si. Nye ŋutɔe nye woƒe domenyinu; migana gomea ɖeke wo le Israel o, nye ŋutɔe nye woƒe gome.

²⁹Woaɖu nuɖuvɔsa, nuvɔ̃vɔsa kple fɔɖivɔsa, eye nusiwo katã wodo busui le Israel la, nanye wo tɔ.

³⁰Miaƒe agblemenu gbãtɔwo katã ƒe nyuitɔwo kple miaƒe adzɔwo katã ƒe adzɔ enye nunɔlawo to, mitso miaƒe amɔwɔ ŋgɔgbeawo na nunɔlawo, ne yayra nanɔ aƒewò me.

³¹Lã kukuwo katã kple lã, siwo nu lé, eɖanye xe alo lãfɔnee o la, nunɔlawo mekpɔ mo aɖui o.