Read ewe Hosea 2 Bible Online

Hosea 2 - ewe bible

Hosea 2

¹Israel-viwo ƒe xexlẽme anɔ abe ƒulake, sĩ mele dzidze kple xexlẽ me o la ene. Eye woava me be, woayɔ wo be „Mawu gbagbe viwo“, ɖe esi wogblɔ na wo he, Manyenyedukɔe mienye la teƒe.

²Yuda-viwo kple Israel-viwo aƒo takpli, eye woaɖo tatɔ ɖeka na wo ɖokui aho aʋa atso anyigba la dzi; elabena Yezreel ƒe ŋkeke la teƒe mekɔ o.

³Miyɔ mia nɔviŋutsu be „Dukɔnye“, eye mia nɔvinyɔnu be „Ame lɔlɔ̃e“.

⁴Mihe nye kple mia dada, mihe nya kplii; elabena menye srɔ̃nye wonye o, eye menye srɔ̃aŋutsua menye o. Miɖe eƒe gbolowɔwɔ le mo nɛ, eye eƒe ahasiwɔwɔ nage le akɔta nɛ,

⁵ne magaɖe amae ana wòanɔ abe gbesigbe wòdzii ene, mana wòasɔ kple gbegbe, wòaɖi kuɖinyigba, eye mana tsikɔ nawui wòaku o.

⁶Nyemakpɔ nublanui na viawo o, elabena ahasiviwo wonye.

⁷Elabena wo dada wɔ ahasi, eye wo nɔ wɔ ŋukpenanu; elabena egblɔhe: Madze nye ahiãviwo yome, woawoe tsɔa abolo kple tsi, ɖetifu kple anazi, ami kple nunono nam.

⁸Eyata metso ŋu atɔ kpɔ ɖe eƒe mɔ dzi, eye maɖo gli ɖe edzi, ale be magakpɔ etoƒe o.

⁹Ati eƒe ahiãviwo yome, ke eƒe asi matu wo o; adi wo, ke makpɔ wo o; eye wòagblɔ be: Matso agbugbɔ yi srɔ̃nye tsãtɔ gbɔ, elabena eme nyo nam tsã wu fifia.

¹⁰Medze sii be, nyee na bli, wein kple ami, klosalo kple sika geɖe, siwo ŋu dɔ wòwɔ na Baal lae o.

¹¹Eyata ne azã ɖo edzi la, maɖe bli kple wein ɖa, eye maxɔ nye ɖeti kple nye anazi, si wòtsɔna xea eƒe amae la.

¹²Maklo nu le eƒe ŋukpeƒe dzi le eƒe ahiãviwo ŋku me, eye amea ɖeke maxɔe le asinye me o.

¹³Eye matsi eƒe dzidzɔkpɔkpɔwo katã, ŋkekenyuiewo, dzinu yeyewo, dzudzɔgbewo kple takpegbewo katã nu.

¹⁴Magblẽ eƒe weinkawo kple aƒe gbotiwo, siwo ŋu wògblɔ le be, nunana wonye na ye, yeƒe ahlãvlwoe na ye la, eye mana woazu ave, ne gbemelãwo naɖu wo!

¹⁵Yehowa be: Mahe to nɛ ɖe ŋkeke, siwo wòɖo dzudzɔ na Baalwo, wòɖe woƒe ga ŋɔti kple woƒe kɔsɔkɔsɔ kɔ, eye wodze eƒe ahiãviwo yome heŋlɔ nyea be la ta.

¹⁶Eyata, kpɔ ɖa, mable enu akplɔe ayi gbegbe, eye maƒo nu wòade dzi me nɛ.

¹⁷Matse eƒe weingble nɛ de afima, eye nuxaxabali me la atrɔ zu mɔkpɔkpɔ ƒe agbo! Adzi ha le afima abe le eƒe ɖetugbimenɔɣi kple ɣeyiɣi, si wòʋu tso Egipte-nyigba dzi la ene.

¹⁸Ale Yehowa gblɔ esi: Le ɣemaɣi la ãyɔm he „srɔ̃nye“, nye mãgayɔm be „nye Baal“ azɔ la.

¹⁹Made Baalwo ƒe ŋkɔ ɖa le eƒe nu me, eye woƒe ŋkɔ magava ame ƒe ta me azɔ o.

²⁰Ɣemaɣi la mabla nu kple gbemelãwo, dziƒoxewo kple nusiwo tana le anyigba dzi, maŋe dati kple yi, manyã aʋa ɖa le anyigba dzi, eye mana woanɔ anyi bɔkɔɔ.

²¹Ànye nye ŋugbetɔ tegbee, eye matsɔ dzɔdzɔenyenye kple ʋɔnudɔdrɔ̃ amenuveve kple nublanuikpɔkpɔ ana nenye nye ŋugbetɔ:

²²ànye nye ŋugbetɔ le nyateƒe me, ne nadze si Yehowa.

²³Ale Yehowa gblɔ esi: Le ɣemaɣi la mase dziƒo ƒe gbe, eye dziƒo ase anyigba ƒe gbe;

²⁴anyigba ase bli, wein kple ami ƒe gbe, eye woawo ase Yezreel ƒe gbe.

²⁵Maƒã wo de anyigba dzi na ɖokuinye, makpɔ nublanui na Amemalɔ̃e, eye magblɔ na Manyenyedukɔe be: Nye dukɔ nènye! eye eya agblɔ be: Nye Mawu nènye!