Read ewe Mose IV 19 Bible Online

Mose IV 19 - ewe bible

Mose IV 19

¹Eye Yehowa ƒo nu kple Mose kpakple Aron bena:

²Ale Yehowa de se gblɔ enye si: Gblɔ na Israel-viwo be, wòalé nyinɔ dzẽ, si sɔ blibo, nu mewɔ afia ɖeke nɛ o, eye womede kɔkuti kɔ nɛ kpɔ o la, vɛ na wò.

³Miatsɔe na nunɔla Eleazar, eye wòana woakplɔe ayi asaɖa la godo, eye woawui le eŋku me.

⁴Eye nunɔla Eleazar nade eƒe asi nu la me ahlẽ zi adre ɖe go, si me Mawu ƒe agbadɔ la dze ŋgɔe.

⁵Eye woatɔ dzo nyinɔ la ƒe agbalẽ, eƒe lã, eƒe ʋu kple dɔmemiwo.

⁶Eye nunɔla natsɔ sederti, isop kple ka dze ade nyinɔ ƒe dzo la me.

⁷Nunɔla nanyã eƒe avɔwo, eye wòale tsi, emegbe hafi wòkpɔ mɔ ava asaɖa la me: gake nunɔla ŋu mekɔ o vaseɖe fiẽ.

⁸Amesi tɔ dzo nyinɔa la, nanyã eƒe avɔwo, eye wòale tsi, eye eŋu mekɔ o vaseɖe fiẽ.

⁹Eye ŋutsu, si gu ka la, nalɔ nyinɔ ƒe afi la ada ɖe teƒe kɔkɔea ɖe le asaɖa godo, eye wòadzrae ɖo na Israel-viwo ƒe ha la hena ameŋukɔtsi la, nuvɔ̃vɔsae wònye.

¹⁰Amesi la nyinɔ ƒe afia la, nanyã eƒe avɔwo, eye eŋu mekɔ o vaseɖe fiẽ. Ɖoɖo mavɔ wòanye na Israel-viwo kple amedzro, si le wo dome la.

¹¹Ne amea ɖe de asi ame kuku ŋu la, eŋu mekɔ o ŋkeke adre.

¹²Eye wòatsɔe aɖe nuvɔ̃ ɖa le eɖokui ŋu le ŋkeke etɔ̃lia kple ŋkeke adrelia dzi, ekema eŋu ko; gake ne meɖe nuvɔ̃ ɖa le eɖokui ŋu le ŋkeke etɔ̃lia kple ŋkeke adrelia dzi o la, ekema eŋu meka o.

¹³Ne amea ɖe ɖe asi ame kuku ŋu, eye meɖe nuvɔ̃ ɖa le eɖokui ŋu o la, ekema edo ŋunyɔ Yehowa ƒe nɔƒe la; ele be, woatsrɔ̃ ame sia ɖa le Israel, elabena womewu ameŋukɔtsi la ɖe eŋu o, eyata eŋu mekɔ o, eye eya ŋutɔ de busu eɖokui ŋu.

¹⁴Se la enye si: Ne ame ku le agbadɔa ɖe me la, ekema amesi va agbadɔa me kple nusiwo katã le agbadɔa me la, ŋu mekɔ o ŋkeke adre.

¹⁵Nusianu, si le nuvo, eye wometu nu enu o la, ŋu mekɔ o.

¹⁶Ne amea ɖe de asi amesi wowu kple yi alo ame kuku, ameƒu alo yɔdo ŋu le gbe me la, eŋu mekɔ o ŋkeke adre.

¹⁷Eye woaku nuvɔ̃vɔsalã, si wotɔ dzoe la, ƒe afi akɔ tɔsisi me tsi ɖe dzi le zea ɖe me hena amesi ŋu mekɔ o la.

¹⁸Eye ŋutsu, si ŋu kɔ la, natsɔ isop ade tsi la me awu ɖe agbadɔ la, eme nuwo katã kple amesiwo katã de afima la ŋu; alea woawui ɖe amesi de asi ameƒu alo amesi wowu, ame kuku alo yɔdo ŋu la hã ŋui.

¹⁹Amesi ŋu kɔ la, nawui ɖe amesi ŋu mekɔ o la ŋu le ŋkeke etɔ̃lia kple ŋkeke adrelia dzi, emegbe wòanyã eƒe avɔwo, eye wòalé tsi, ekema eŋu kɔ le fiẽ.

²⁰Ke ne amea ɖe ŋu mekɔ o, eye womeɖe nuvɔ̃ le eŋu o la, ekema woatsrɔ̃e ɖa le ha la dome, elabena edo ŋunye Yehowa ƒe kɔkɔeƒe la; womewu ameŋukɔtsi ɖe eŋu o, eyata eŋu mekɔ o.

²¹Ɖoɖo mavɔ wòanye na mi. Amesi wu ameŋukɔtsia la, nanyã eƒe avɔwo, eye ne amea ɖe de asi ameŋukɔtsia ŋu la, eŋu mekɔ o vaseɖe fiẽ.

²²Ne amesi ŋu mekɔ o, de asi nua ɖe ŋu la, eŋu mekɔ o, eye ne amea ɖe ɖe asi amea ŋu la, eŋu mekɔ o vaseɖe fiẽ.