Read ewe Mose IV 24 Bible Online

Mose IV 24 - ewe bible

Mose IV 24

¹Esi Bileam kpo bena, edze Yehowa ŋu be, wòayra Israel la, megayi afã ka ge abe tsã ene o, boŋ etrɔ mo ɖe gbedzi gome.

²Eye Bileam fɔ kɔ dzi, kpɔ alesi Israel ƒu asaɖa anyi tototoe. Tete Mawu ƒe gbɔgbɔ va edzi,

³eye wòdo eƒe numegbe la hegblɔ bena: Ale Bileam, Beor vi, gblɔ esi, eye ale ŋutsu, si ƒe ŋku ʋu la, gblɔ esi:

⁴Amesi sea Mawu ƒe nyawo, ƒe gbe enye si, amesi ŋusẽkatãtɔ ɖea nuwo fiana, amesi tsyɔ mo anyi, ke eƒe ŋkuwo le te:

⁵Oo, Yakob, wò agbadɔwo dze ani loo! Israel, wò nɔƒewo nyo loo!

⁶Ele abe alesi tɔʋu mlo ɖe nu le bali me ene; eye wòɖi aba le tɔsisi to, ele abe aloeti, siwo Yehowa do ene, eye wòɖi seder le to to.

⁷Tsi gbagba eƒe tɔkpowo, eye wòƒã nu ɖe tɔ geɖewo to. Eƒe fia xɔ ŋkɔ wu Agag, eye eƒe fiaɖuƒe keke ɖe nu.

⁸Mawu, si kplɔe tso Egipte la, le nɛ abe to ƒe dzowo ene; aɖu dukɔ, siwo nye eƒe futɔwo, eye woagbã woƒe ƒuwo, eye wòatsɔ eƒe da atsrɔ̃ wo.

⁹Etsyɔ akɔ anyi abe dzatatsu kple dzatanɔ ene, ameka le eʋuʋu ge? Ne amea ɖe yra wò la, woayrae; eye ne amea ɖe ƒo fi de wò la, woaƒo fi aɖee.

¹⁰Tete Balak do dɔmedzoe ɖe Bileam ŋu, eye Balak si akpe hegblɔ na Bileam bena: Meyɔ wò vɛ, bena naƒo fi ade nye futɔwo nam loa, ɖeko nètsɔ wo yra zi etɔ sɔŋ.

¹¹Eyata netsɔ nayi mia de! Ɖe mebe, made bubu ŋuwò pete hafi, gake Yehowa te bubu la wò.

¹²Bileam ɖo ŋu na Balak bena: Ɖe nyemegblɔ na wò amesiwo nèɖo ɖe gbɔnye la bena:

¹³Ne Balak atsɔ klosalo kple sika xɔ taŋ nam hã la, nyemate ŋu ada Yehowa ƒe se la dzi awɔ nyui alo vɔ̃ le ɖokuinye si o, negbe nya, si Yehowa alo la, eya ko magblɔ oa?

¹⁴Azɔ mele mía detɔwo gbɔ yi ge; eyata magblɔ nusi dukɔ sia le wò dukɔ wɔ ge le ɣeyiɣi, siwo gbɔna me la, fia wò.

¹⁵Eye wòdo eƒe numegbe la gblɔ bena: Ale Bileam, Beor vi, gblɔ esi, ale ŋutsu, si ƒe ŋku ʋu la, gblɔ esi.

¹⁶Amesi sea Mawu ƒe nyawo la, ƒe gbe enye si, amesi dzea si dziƒoʋitɔ ƒe susuwo, amesi ŋusẽkatãtɔ ɖea nuwo fiana, amesi tsyɔ mo anyi, ke eƒe ŋkuwo le te.

¹⁷Mele ekpɔm, gake menye fifiae o; mekpɔnɛ, gake mele kpuiƒe o. Ɣletivi ado tso Yakob me, eye fiatikplɔ ado tso Israel me; aŋe tonuƒuiwo na Moab, eye wòakaka la le amesiwo nye zi la nu.

¹⁸Woaxɔ Edom ƒe anyigba, eye woaxɔ eƒe futɔ Seir hã ƒe anyigba; ke Israel ya akpɔ ŋusẽ.

¹⁹Ame atso Yakob me aɖu dzi, eye wòawu amesiwo kpɔtɔ ɖe duwo me.

²⁰Esi wòkpɔ Amalekitɔwo la, edo eƒe numegbe la gblɔ bena: Amalek enye gbãtɔ le dukɔwo dome; ke mlɔeba la ava tsrɔ̃ tsã!

²¹Eye esi wòkpɔ Kemtɔwo la, edo eƒe numegbe la gblɔ bena: Wò nɔƒe sesẽ, eye nèwɔ alɔ ɖe agakpewo dzi.

²²Ke woatsrɔ̃ wò Kain ya, eye ekpɔtɔ vie, Asur naɖe aboyo wò.

²³Eye wògado eƒe numegbe la gblɔ bena: Alele! ameka anɔ agbe, ne Mawu awɔ nusia?

²⁴Ʋuwo atso Kitim, ava bɔbɔ Asur kple Eber ɖe anyi, eye woatsrɔ̃ eya hã.

²⁵Emegbe Bileam dze mɔ, eye wògbugbɔ va wo ɖe, eye Balak hã lé eƒe mɔ.