Read ewe Mose IV 3 Bible Online

Mose IV 3 - ewe bible

Mose IV 3

¹Esiawo nye Aron kple Mose viwo, le ɣeyiɣi, si me Yehowa ƒo nu kple Mose le Sinai-to la dzi.

²Aron viŋutsuwo ƒe ŋkɔwo nye si: Eƒe ŋgɔgbevi Nadab, eyome Abihu, Eleazar kple Itamar.

³Esiawo nye nunɔla Aron, amesi wòsi ami na heɖoe be, wòanye nunɔla asubɔ la, ƒe viŋutsuwo ƒe ŋkɔwo.

⁴Ke Nadab kple Abihu ku le Yehowa ŋku me, esime wotsɔ dzo bubu va Yehowa ŋku me le Sinai-gbedzi; ke viŋutsu mele wo si o, eye Eleazar kple Itamar zu nunɔlawo kpe ɖe wo fofo Aron ŋu.

⁵Eye Yehowa ƒo nu kple Mose bena:

⁶Na Lewi-to la nava nunɔla Aron gbɔ, bena woasubɔe.

⁷Eye woawɔ do, si le eya ŋutɔ kple ha blibo la ŋu, le Mawu ƒe agbadɔ la nu; woawoe awɔ dɔ, si le nɔƒe la ŋu.

⁸Woakpɔ Mawu ƒe agbadɔ la ŋuti nuwo dzi, eye woakpe ɖe Israel-viwo ŋu, ne wova subɔsubɔ ge, eye woawɔ nɔƒe la ŋu dɔwo.

⁹Eye natsɔ Lewitɔwo ade asi na Aron kple viaŋutsuwo, etɔ woanye blibo le Israel-viwo dome.

¹⁰Eye naɖo Aron kple viaŋutsuwo, be woawɔ nunɔladɔ; ke ne ame tutɔa ɖe le va la, woawui.

¹¹Eye Yehowa ƒo nu kple Mose bena:

¹²Nye ŋutɔe ɖe Lewitɔwo le Israel-vi bubuawo dome ɖe ŋgɔgbevi, siwo ʋu ɖɔ nu na wo dada la teƒe, bena Lewitɔwo nanye tɔnye le Israel-viwo dome.

¹³Ŋgɔgbeviwo katã nye tɔnye; elabena gbesigbe mewu ŋgɔgbeviwo katã le Egipte-nyigba dzi la, mekɔ amewo kple lãwo ƒe ŋgɔgbeviwo ŋu le Israel, be woanye tɔnye, nye Yehowa.

¹⁴Eye Yehowa ƒo nu kple Mose le Sinai-gbedzi bena:

¹⁵Tia Lewitɔwo xlẽ le wo fofowo ƒe aƒewo kple woƒe ƒomeawo nu; ŋutsuvi, siwo katã xɔ dzinu ɖeka alo wu nenema la, natia axlẽ.

¹⁶Eye Mose tia wo xlẽ, abe alesi Yehowa gblɔ hede se ne la ene.

¹⁷Lewi-viwo ƒe ŋkɔwo nye si: Gerson, Kehat kple Merari.

¹⁸Gerson-viwo ƒe ŋkɔwo nye si le woƒe ƒomewo nu: Libni kple Simei.

¹⁹Kehat-viwo nye si le woƒe ƒomewo nu: Amram, Yizhar, Xebron kple Uziel.

²⁰Eye Merari viwo nye si le woƒe ƒomewo nu: Maxeli kple Musi. Esiawo nye Lewitɔwo ƒe ƒome le wo fofowo ƒe aƒewo nu.

²¹Gerson-hawo nye: Libni-viwo ƒe ƒome kple Simei-viwo ƒe ƒome. Woawo nye Gerson ƒomeawo.

²²Wotia ŋutsu, siwo xɔ dzinu ɖeka alo wu nenema la, xlẽ le wo dome, eye woƒe xexlẽme le ame akpe adre alafa atɔ̃.

²³Eye Gerson ƒome la ƒu asaɖa anyi ɖe nɔƒe la megbe le ɣedzeƒe gome.

²⁴Gerson ƒome la ƒe amegã nye Eliasaf, Lael vi.

²⁵Dɔ, siwo le Mawu ƒe agbadɔ la ŋu na Gerson-viwo wonye: Woakpɔ nɔƒe la, etamevɔ kple edzigbanuwo kpakple Mawu ƒe agbadɔ la ŋu vɔ,

²⁶kpɔ, si ƒo xlã nɔƒe la kple vɔsamlekpui la godoo va kpe, eŋuti vɔwo, agbadɔ ŋu kawo kple eŋu nu bubuawo kpakple kpɔnuvɔ la dzi.

²⁷Kehat-hawo nye. Amram-viwo ƒe ƒome, Yizhar-viwo ƒe ƒome, Xebron-viwo ƒe ƒome kple Uziel-viwo ƒe ƒome. Woawo nye Kehat ƒomeawo.

²⁸Ŋutsu, siwo xɔ dzinu ɖeka alo wu nenema la, ƒe xexlẽme le ame akpe enyi alafa ade, woawo nakpɔ kɔkɔeƒe la me nuwo dzi.

²⁹Kehat ƒome la naƒu asaɖa anyi ɖe nɔƒe la ƒe axa dzi le dziehe gome.

³⁰Kehat ƒome la ƒe amegã nye Elzafan, Uziel vi.

³¹Woƒe dɔe nye be, woakpɔ aɖaka la kple kplɔ la, akaɖiti la, vɔsamlekpuiwo kple kɔkɔeƒe la me nuwo kpakple xɔmetsovɔ la kple nu bubuawo dzi.

³²Lewitɔwo ƒe amegã ƒe tatɔ enye Eleazar, nunɔla Aron ƒe vi, eƒe dɔe nye be, wòakpɔ amesiwo le dɔ wɔm le nu kɔkɔeawo ŋu la dzi.

³³Merari-hawo nye: Maxeli-viwo ƒe ƒome kple Musi-viwo ƒe ƒome. Woawo nye Merari ƒomeawo.

³⁴Wo dome ŋutsu, siwo xɔ dzinu ɖeka alo wu nenema la, ƒe xexlẽme le ame akpe ade alafa eve.

³⁵Merari ƒome la ƒe amegã nye Zuriel, Abixail vi; woawo naƒu asaɖa anyi ɖe nɔƒe la ƒe axa dzi le anyiehe gome.

³⁶Merari-viwo ƒe dɔe nye be, woakpɔ nɔƒe la ŋu ʋuƒoawo, gametiawo, sɔtiawo kple woƒe afɔwo kple nu bubuawo katã,

³⁷kpɔtiawo katã kple woƒe afɔwo, tsyotiawo kpakple wo ŋu kawo dzi.

³⁸Eye Mose kple Aron kpakple viaŋutsuwo ƒu asaɖa anyi ɖe nɔƒe, si nye Mawu ƒe agbadɔ la ŋgɔ le ɣedzeƒe gome. Woƒe dɔe nye be, woawɔ dɔ le kɔkɔeƒe la na Israel-viwo; ke ne ame tutɔa ɖe te va la, woawui.

³⁹Ŋutsu, siwo katã xɔ dzinu ɖeka alo wu nenema le Lewitɔwo dome, amesiwo Mose kple Aron tia xlẽ, abe alesi Yehowa de se ene la, le ame akpe blave vɔ eve.

⁴⁰Eye Yehowa gblɔ na Mose bena: Tia Israel-viwo ƒe ŋutsu ŋgɔgbeawo katã, amesiwo xɔ dzinu ɖeka alo wu nenema la xlẽ, eye naŋlɔ woƒe ŋkɔwo ƒe xexlẽme di.

⁴¹Tia Lewitɔwo na Yehowa ɖe Israel-viwo ƒe ŋgɔgbeviwo katã teƒe; eye natia Lewitɔwo ƒe lãwo ɖe Israel-viwo ƒe lã ŋgɔgbeawo katã teƒe.

⁴²Eye Mose tia Israel-viwo ƒe ŋgɔgbeviwo katã xlẽ, abe alesi Yehowa de se ne ene.

⁴³Eye ŋutsu ŋgɔgbeawo katã, amesiwo xɔ dzinu ɖeka alo wu nenema la, ƒe xexlẽme le ame akpe blave va eve alafa eve blaadre va etɔ̃.

⁴⁴Eye Yehowa ƒo nu kple Mose bena:

⁴⁵Tia Lewitɔwo nam ɖe Israel-viwo ƒe ŋgɔgbeviwo katã teƒe, eye tia Lewitɔwo ƒe lãwo ɖe woƒe lãwo teƒe, bena Lewitɔwo nanye Yehowa tɔ.

⁴⁶Ke woaxe fe ɖe ame alafa eve blaadre vɔ etɔ̃, siwo Israel-viwo ƒe ŋgɔgbeviwo tsɔ sɔ gbɔ wu Lewitɔwo la ta;

⁴⁷naxa sekel kokoe atɔ̃ ɖe ame ɖeka ta; gera blave nanye sekel ɖeka.

⁴⁸Eye natsɔ wo dometɔ, siwo tsi dzi, ƒe ga la ana Aron kple viaŋutsuwo.

⁴⁹Eye Mose xɔ sekel kɔkɔe akpe ɖeka alafa etɔ̃ blaade vɔ atɔ̃

⁵⁰le amesiwo Israel-viwo ƒe ŋgɔgbeviwo tsɔ sɔ gbɔ wu Lewitɔwo la si.

⁵¹Eye Mose tsa ga la na Aron kple viaŋutsuwo, abe alesi Yehowa gblɔ hede se na Mose ene.