Read ewe Mose IV 31 Bible Online

Mose IV 31 - ewe bible

Mose IV 31

²Bia hlɔ̃ Midiantɔwo na Israel-viwo; emegbe nayi tɔgbuiwòwo gbɔ.

³Tete Mose gblɔ na dukɔ la bena: Mina ŋutsuwo nabia akpa le mia dome, bena woaho aʋa ɖe Midian ŋu, ne woabia hlɔ̃ Midian na Yehowa.

⁴Israel-viwo ƒe to sia to naɖe ame akpe ɖeka aɖo ɖe ana la.

⁵Eye to sia to na ame akpe ɖeka tso Israel ƒe ame akpe akpeawo dome; amesiwo bia akpa hena aʋayiyi la, le ame akpe wuieve.

⁶Eye Mose ɖɔ ame akpe ɖeka tso to sia to me ɖo ɖe aʋa la, eye Pinehas, nunɔla Eleazar vi, he nu kɔkɔeawo kple kpẽ, siwo woaku atsiã ɖe nu la, ɖe asi.

⁷Woho aʋa ɖe Midian ŋu, abe alesi Yehowa de se na Mose ene, eye wowu ŋutsuwo katã.

⁸Eye wowu Midian-fia atɔ̃awo, siwo nye: Evi, Rekem, Zur, Xur kple Reba la, kpe ɖe ame bubuawo ŋu; eye wowu Bileam, Beor vi, hã kple via.

⁹Eye Israel-viwo ɖe aboyo Midiantɔwo srɔ̃wo kple wo viwo, eye woha woƒe agbatsɔlãwo katã, lãhawo katã kple woƒe kesinɔnuwo katã:

¹⁰eye wòto dzo du, siwo katã me wònɔ, kple woƒe agbadɔwo katã.

¹¹Woɖe aboyo amewo, eye woha lãwo.

¹²Eye wohe amesiwo wòlé kple nusiwo woha kpakple nusiwo woɖe aboyo la, va Mose kple nunɔla Eleazar kpakple Israel-viwo ƒe ha blibo la gbɔ, le Moab-tagba le Yordan nu le Yerixo kasa.

¹³Eye Mose kple nunɔla Eleazar kpakple Israel-amegãwo katã yi ɖakpe wo le asaɖa la godo.

¹⁴Eye Mose do dɔmedzoe ɖe aʋakplɔla, siwo wotso ɖo ame akpewo kple ame alafawo nu, amesiwo gbɔ tso aʋa la ŋuti.

¹⁵Eye Mose gblɔ na wo bena: A, miena nyɔnuwo katã tsi agbea?

¹⁶Evɔ wònye woawoe na Israel-viwo subɔ Peor hetrɔ ʋu le Yehowa yome le Bileam ƒe aɖaŋuɖoɖo la nu, eye dɔvɔ̃ ɖo Yehowa ƒe ha la me hafi.

¹⁷Eyata miwu ŋutsuvi, siwo katã le ɖeviawo dome, eye miwu nyɔnuvi, siwo katã ɖo ŋutsu gbɔ kpɔ;

¹⁸gake mina nyɔnuvi, siwo katã medo ŋutsu gbo kpo o te ɖeviawo dome la, natsi agbe na mi.

¹⁹Ke miawo mitsi asaɖa godo ŋkeke adre sɔŋ, eye amesiwo wu ame kple amesiwo ka asi ame tsiaʋawo ŋu la, naɖe nuvɔ̃ ɖa le wo ɖokui kple amesiwo wòlé la ŋu, le ŋkeke etɔ̃lia kple ŋkeke adrelia dzi.

²⁰Eye miaɖe nuvɔ̃ ɖa le avɔwo katã kple nusiwo katã wotsɔ lãgbalẽ kple gbɔ̃fuwo wɔe, kpakple atinuwo katã ŋuti.

²¹Eye nunɔla Eleazar gblɔ na aʋawɔla, siwo de aʋa la bena: Ale Yehowa de se na Mose enye si:

²²Mitsɔ sika kple klosalo, akɔbli kple gayibɔ, ga ɣi kple tsumi

²³kpakple nusianu, si ate ŋu aɖe dzo me la, haha dzoe, ekema wo ŋu akɔ; gake ele be, woatsɔ ameŋukɔtsi aɖe nuvɔ̃ ɖa le wo ŋu. Ke woatsɔ tsi aklɔ nusiwo katã mate ŋu ade dzo me o lae.

²⁴Eye ne mienyã miaƒe avɔwo le ŋkeke adreagbe la, ekema mia ŋu akɔ, emegbe miekpɔ mɔ ayi asaɖa la me.

²⁵Eye Yehowa gblɔ na Mose bena:

²⁶Mia kple nunɔla Eleazar kpakple ha la ƒe toawo ƒe amegãwo mixlẽ ame kple lã, siwo woɖe aboyoe la,

²⁷mimã wo na amesiwo de aʋa la, kple ameha blibo la.

²⁸Eye naxɔ ame alo nyi, tedzi alo alẽ ɖekaɖeka tso wo ame alafa atɔ me le aʋawɔla, siwo de aʋa la, tɔ ŋu ahawɔ adzɔe na Yehowa.

²⁹Naɖee le wo tɔ ŋu awɔ adzɔe na Yehowa ahatsɔ na nunɔla Eleazar.

³⁰Ke miaxɔ ame alo nyi, tedzi alo alẽ ɖekaɖeka tso wo ame blaatɔ̃ me le Israel-viwo tɔ ŋu ana Lewitɔwo, amesiwo wɔa dɔ le Yehowa ƒe nɔƒe la ŋu.

³¹Eye Mose kple nunɔla Eleazar wɔ, abe alesi Yehowa de se na Mose ene.

³²Eye aboyonu, siwo aʋawɔlawo ha la, ƒe kpɔtɔea le alé akpe alafa ade blaadre vɔ atɔ̃,

³³nyi akpe blaadre vɔ eve,

³⁴tedzi akpe blaade vɔ ɖekɛ:

³⁵eye nyɔnuvi, siwo medo ŋutsu gbɔ kpɔ o la, le ame akpe blaetɔ̃ vɔ eve.

³⁶Amesiwo de aʋa la ƒe gome enye ale akpe alafa etɔ̃ blaetɔ̃ vɔ adre kple alafa atɔ̃.

³⁷Eye adzɔ, si woɖe le alẽawo ŋu na Yehowa la, le alẽ alafa ade blaadre vɔ atɔ̃.

³⁸Nyiwo le akpe blaetɔ̃ vɔ ade, eye woɖe wo ame blaadre vɔ eve na adzɔ Yehowa.

³⁹Tedziwo le akpe blaetɔ̃ kple alafa atɔ, eye woɖe wo ame blaade vɔ ɖeke na adzɔ Yehowa.

⁴⁰Eye amewo le akpe wuiade, eye woɖe wo ame blaetɔ̃ vɔ eve na adzɔ Yehowa.

⁴¹Eye Mose tsɔ adzɔ, siwo wona Yehowa la, hena nunɔla Eleazar, abe alesi Yehowa de se na Mose ene.

⁴²Eye Israel-viwo tɔ, si Mose ma na woa kple amesiwo de aʋa la, enye si:

⁴³ameha la tɔ enye alẽ akpe alafa etɔ̃ blaetɔ̃ vɔ adre kple alafa atɔ̃,

⁴⁴nyi akpe blaetɔ̃ vɔ ade,

⁴⁵tedzi akpe blaetɔ̃ kple alafa atɔ̃

⁴⁶kple ame akpe wuiade.

⁴⁷Eye Mose ɖe ame ɖekaɖeka kple lã ɖekaɖeka tso wo ame blaatɔ̃ me le Israel-viwo to ŋu hena Lewitɔwo, amesiwo woa do le Yehowa ƒe nɔƒe la ŋu, abe alesi Yehowa de se na Mose ene.

⁴⁸Eye aʋakplɔla, siwo le aʋakɔ la fe ame akpewo nu, amesiwo wotsɔ ɖo ame akpewo kple ame alafawo nu la, va Mose gbɔ,

⁴⁹eye wogblɔ na Mose bena: Wò dolawo xlẽ aʋawɔla, siwo wode asi na mí la, eye wo dometɔa ɖeke meto le eme o.

⁵⁰Eyata mietsɔ sikanu, siwo amesiame ha la vɛ, be miana Yehowa, woawo nye: abɔkpowo, alonugɛwo, asigɛwo, togɛwo kple kɔdzonuwo, ne míalé avu na mía ɖokui le Yehowa gbɔ.

⁵¹Tete Mose kple nunɔla Eleazar xɔ sikatsyɔ̃ɖonu vovovoawo le wo si.

⁵²Eye sika, siwo katã amesiwo woɖo ame akpewo kple ame alafawo nu dzo na Yehowa la, le sekel akpe wuiade alafa adre kple blaatɔ̃.

⁵³Ke aʋawɔviawo dome ɖesiaɖe ha nu na eɖokui.

⁵⁴Eye Mose kple nunɔla Eleazar xɔ sikawo le amesiwo woɖo ame akpewo kple ame alafawo nu la si, eye wotso wo va Mawu ƒe agbadɔ la me, ne woanye ŋkuɖodzinu na Israel-viwo le Yehowa ŋku me.