Read ewe Mose IV 4 Bible Online

Mose IV 4 - ewe bible

Mose IV 4

¹Eye Yehowa ƒo nu kple Mose kpakple Aron bena:

²Miɖe Kehat viwo le Lewitɔwo dome, eye miŋlɔ woƒe xexlẽme le woƒe ƒomewo kple wo fofowo ƒe aƒewo nu.

³Amesiwo xɔ ƒe blaetɔ̃ kple vo vaseɖe ƒe blaatɔ̃, eye wodze na dɔwɔwɔ la, nawɔ Mawu ƒe agbadɔ la ŋu dɔwo.

⁴Kehat viwo ƒe dɔ enye be, woakpɔ nu kɔkɔewo ƒe nu kɔkɔeawo dzi le Mawu ƒe agbadɔ la me.

⁵Ne ameha la le hoho ge la, ekema Aron kple viaŋutsuwo nayi ɖe eme, eye woaɖe xɔmetsovɔ la atsyɔ na aɖaka, si me se la le,

⁶eye woatsɔ nyogbalẽ atsyɔ edzi, emegbe woatsɔ aɖabɛ blɔtɔ akeke ɖe dzi, eye woade kpoawo eŋu.

⁷Eye woakeke aɖabɛ blɔtɔ ɖe ŋkumeɖobolokplɔ̃ la dzi, emegbe woafɔ agbawo, nutɔgbawo, trewo kple goe, siwo me wokua nunovɔsa ɖo kpakple gbesiagbe boloawo ada ɖe edzi.

⁸Emegbe woatso nyagadzĩ atsyɔ nuawo dzi, eye woatsɔ nyogbalẽ abu edzi, eye woade kpoawo eŋu.

⁹Eyome woabia akaɖiti la kple eŋu kaɖigbɛawo, ɖovulãnuawo kple ganuviawo kpakple amigoe, siwo kpe ɖe eŋu la, ɖe aɖabɛ blɔtɔ me;

¹⁰emegbe woabia nyogbalẽ ɖe eŋu, eye woatsɔe aɖo agbati dzi.

¹¹Woakeke aɖabɛ blɔtɔ ɖe sikavɔsamlekpui la dzi, eye woatsɔ nyogbalẽ abu dzi, eye woade kpoawo eŋu.

¹²Emegbe woabia nusi wo katã ŋu dɔ wowɔna le kɔkɔeƒe la, ɖe aɖabɛ blɔtɔ me, eye woaxatsa nyogbalẽ ɖe wo ŋu, eye woatsɔ wo aɖo agbati dzi.

¹³Emegbe woalɔ afi le vɔsamlekpui la me, eye woakeke aɖabɛ dzĩtɔ ɖe edzi.

¹⁴Eyome woafɔ eŋu nu, siwo ŋu dɔ wowɔna la, aɖa ɖe dzi, afilɔnuawo, gafloawo, sofiawo, zeawo kple vɔsamlekpui la ŋu nuwo katã, eye woatsɔ nyogbalẽ abu wo dzi, eye woade kpoawo eŋu.

¹⁵Ne Aron kple viaŋutsuwo bia nu ɖe nu kɔkɔeawo kple wo ŋu nuawo katã ŋu va, eye ameha la le hoho ge la, eya ko hafi Kehat viwo nava atsɔ wo, bena womagaka asi nu kɔkɔeawo ŋu ahaku o. Esiawo nye Mawu ƒe agbadɔ la ŋu nusiwo Kehat-viwo natsɔ.

¹⁶Eleazar, nunɔla Aron viŋutsu, ƒe dɔ enye be, wòakpɔ ami, si woade akaɖigbɛawo me, dzudzɔʋeʋẽedonu, gbesiagbe nuɖuvɔsa, ami sisi la, nɔƒe blibo la kple eme nu kɔkɔeawo katã kpakple wo ŋu nuwo dzi.

¹⁷Eye Yehowa ƒo nu kple Mose kple Aron bena:

¹⁸Migana Kehat viwo natsrɔ̃ ɖa le Lewitɔwo dome o;

¹⁹ke boŋ miwo ale na wo, bena ne wote ɖe nu kɔkɔewo ƒe nu kɔkɔeawo ŋu la, ne womagaku o. Aron kple viaŋutsuawo nayi ɖe eme, eye woafia amesiame ƒe da kple eƒe agbae.

²⁰Ke womegava eme akpa nu kɔkɔeawo aɖabaƒoƒo ɖeka pɛ hã, ne woava ku o.

²¹Eye Yehowa ƒo nu kple Mose bena:

²²Ŋlɔ Gerson viwo ƒe xexlẽme hã le wo fofowo ƒe aƒewo kple woƒe ƒomeawo nu.

²³Tia amesiwo xɔ ƒe blaetɔ̃ kple vɔ vaseɖe ƒe blaatɔ̃, eye wodze na dɔwɔwɔ la xlẽ, bena woawɔ Mawu ƒe agbadɔ la ŋu dɔwo.

²⁴Gerson viwo ƒe dɔwɔwɔ kple woƒe nutsɔwo nye si:

²⁵Woawoe atsɔ nɔƒe la ƒe kuntruawo kple Mawu ƒe agbadɔ la tamekuntruawo kple nyogbalẽ, siwo wotsɔ gba wo dzii, kpakple Mawu ƒe agbadɔ la ŋu vɔ,

²⁶kpɔ, si ƒo xlã nɔƒe la kple vɔsamlekpui la godoo va kpe la ŋu vɔwo kple agbonuvɔ la, agbadɔ ŋu kawo kple eŋu nu bubuawo: woawɔ eŋu dɔwo katã.

²⁷Alesi Aron kple viaŋutsuawo de se be, woatsɔ agbawo, eye woawɔ woƒe dɔwoe la, nenema ŋu Gerson viwo nawɔ woƒe do blibo la ɖo; miana amesiame ƒe agbae ɖekaɖeka.

²⁸Esia enye Gerson viwo ƒe ƒome la ƒe dowo le Mawu ƒe agbadɔ la ŋu, eye Itamar, nunɔla Aron viŋutsu, nakpɔ wo dzi.

²⁹Eye tia Merari viwo xlẽ le woƒe ƒomewo kple wo fofowo ƒe aƒewo nu.

³⁰Tia amesiwo katã xa ƒe blaetɔ̃ kple vɔ vaseɖe ƒe blaatɔ̃, eye woate ŋu awɔ dɔ la xlẽ, bena woawo Mawu ƒe agbadɔ la ŋu dɔwo.

³¹Dɔ, si le Mawu ƒe agbadɔ la ŋu na wo, enye be, woatsɔ nɔƒe la ƒe ʋuƒoawo kple gametiawo, sɔtiawo kple woƒe afɔawo,

³²kpɔtiawo katã kple woƒe afɔawo, wo ŋu tsyoliwo kple wo ŋu kawo kpakple wo ŋu nuwo ka lã, eye woa wɔ wo ŋu dɔwo katã; miaha amesiame ƒe agba, si wòatsɔ lae ɖekaɖeka.

³³Esia nye Merari viwo ƒe ƒome la ƒe dɔwo le Mawu ƒe agbadɔ la ŋu, eye Itamar, nunɔla Aron viŋutsu, nakpɔ wo dzi.

³⁴Eye Mose kple Aron kpakple ha la ƒe amegãwo tia Kehat viwo xlẽ le woƒe ƒomewo kple wo fofowo ƒe aƒewo nu.

³⁵Woxlẽ amesiwo xɔ ƒe blaetɔ̃ kple vɔ vaseɖe ƒe blaatɔ̃, eye woate ŋu awɔ dɔ le Mawu ƒe agbadɔa ŋu la.

³⁶Amesiwo wotia xlẽ le woƒe ƒomewo nu la, le ame akpe eve alafa adre blaatɔ̃.

³⁷Esiawo nye amesiwo katã Mose kple Aron tia xlẽ le Kehat viwo ƒe ƒome la me, bena woawɔ dɔ le Mawu ƒe agbadɔ la ŋu, abe alesi Yehowa de se na Mose ene.

³⁸Eye wotia Gerson viwo xlẽ le woƒe ƒomewo kple wo fofowo ƒe aƒewo nu.

³⁹Woxlẽ amesiwo katã xɔ ƒe blaetɔ̃ kple vɔ vaseɖe ƒe blaatɔ̃, eye woate ŋu awɔ dɔ le Mawu ƒe agbadɔa ŋu la.

⁴⁰Amesiwo wotia xlẽ le woƒe ƒomewo kple wo fofowo ƒe aƒewo nu la, le ame akpe eve alafa ade blaetɔ̃.

⁴¹Esiawo nye amesiwo katã Mose kple Aron tia xlẽ le Gerson viwo ƒe ƒome la me, eye woate ŋu awɔ ɖɔ le Mawu ƒe agbadɔa ŋu la, abe alesi Yehowa de se ene.

⁴²Eye wotia Merari viwo xlẽ le woƒe ƒomewo kple wo fofowo ƒe aƒewo nu.

⁴³Woxlẽ amesiwo katã xɔ ƒe blaetɔ̃ kple vɔ vaseɖe ƒe blaatɔ̃, eye woate ŋu awɔ dɔ le Mawu ƒe agbadɔa ŋu la.

⁴⁴Amesiwo wotia xlẽ le woƒe ƒomewo nu la, le ame akpe etɔ̃ alafa eve.

⁴⁵Esiawo nye amesiwo Mose kple Aron tia xlẽ le Merari-viwo ƒe ƒome la me, abe alesi Yehowa de se na Mose ene.

⁴⁶Lewitɔ, siwo katã Mose kple Aron kpakple Israel-amegãwo tia le woƒe ƒomewo kple wo fofowo ƒe aƒewo nu,

⁴⁷eye woxɔ ƒe blaetɔ̃ kple vɔ vaseɖe ƒe blaatɔ̃, bena woasubɔ le Mawu ƒe agbadɔ la me, eye woatsɔ agba la,

⁴⁸ƒe xexlẽme le ame akpe enyi alafa atɔ blanyi.

⁴⁹Mose na wòfiã amesiame ƒe dɔ kple agba, si wòatsɔ lae, abe alesi Yehowa ɖe se ene: eye wotia wo xlẽ, abe alesi Yehowa ɖe se na Mose ene.