Read ewe Xagai 2 Bible Online

Xagai 2 - ewe bible

Xagai 2

¹Le dzinu adrelia ƒe ŋkeke blave vɔ ɖekɛlia dzi la Yehowa ƒe gbe va to nyagblɔɖila Xagai dzi bena:

²Gblɔ na Yuda ƒe anyigbanunɔla Zerubabel, Sealtiel vi, kple nunɔlagã Yosua, Yozadak vi, kpakple dukɔ la ƒe susɔea bena:

³Mia dometɔ susɔea, siwo kpɔ xɔ tsãtɔ ƒe atsyɔ̃ la, aleke miele esia kpɔmi? Esia meɖi naneke le mia ŋku me o ɖe!

⁴Eyata Zerubabel, lé dzi ɖe ƒo, Yehowa ye gblɔe! Nunɔlagã Yosua, Yozadak vi, lé dzi ɖe ƒo! Mi dukɔ hahoo la katã, milé dzi ɖe ƒo, eye miwɔ dɔ, Yehowa ye gblɔe! Elabena meli kpli mi, Yehowa Zebaot ye gblɔe,

⁵abe alesi meɖo gbe ɖi kpli mi, esime mieʋu tso Egipte la ene; eye nye gbɔgbɔ anɔ mia dome. Migavɔ̃ o!

⁶Elabena ale Yehowa Zebaot gblɔ esi: Esusɔ vie ko maʋuʋu dziƒo kple anyigba, atsiaƒu kple ƒuƒuiƒe;

⁷maʋuʋu dukɔwo katã, eye woahe dukɔwo katã ƒe nu vevitɔ vɛ, eye matso ŋutikɔkɔe ayɔ xɔ sia taŋ, Yehowa Zebaot ye gblɔe.

⁸Tɔnyee nye klosalo, eye tɔnyee nye sika, Yehowa Zebaot ye gblɔe!

⁹Xɔ megbetɔ ƒe atsyɔ asu gbɔ wu gbãtɔ tɔ, Yehowa Zebaot ye gblɔe! Eye made ŋutifafa teƒe sia, Yehowa Zebaot ye gblɔe!

¹⁰Le Dario ƒe ƒe evelia me, le dzinu asiekelia ƒe ŋkeke blave vɔ enelia dzi la Yehowa ƒe gbe va to nyagblɔɖila Xagai dzi bena:

¹¹Ale Yehowa Zebaot gblɔ esi: Mibia nunɔlawo, ne woafia nu mi be:

¹²Ne ŋutsua ɖe lɔ lã kɔkɔe ɖe avɔ nu; eye avɔ la toga ka abolo alo nuɖaɖa, wein, ami alo nuɖuɖua ɖe ŋu la, ɖe nusiawo ŋu akɔa? Nunɔlawo ɖo ŋu gblɔ bena: Kpao.

¹³Eye Xagai gblɔ bena: Ne amea ɖe gblẽ kɔ ɖo na eɖokui ɖe ame kuku ŋu, eye wòka, asi nusiawo katã ŋu la, ɖe woawo hã azu nu makɔmakɔa? Nunɔlawo ɖo ŋu gblɔ bena: Woazu nu makɔmakɔ.

¹⁴Tete Xagai ɖo ŋu gblɔ bena: Yehowa be: Alea dukɔ sia kple anyigba dzi dukɔ sia le; alea woƒe asinudɔwɔwɔwo katã kple vɔ, siwo wosana la le; wo ŋu mekɔ o.

¹⁵Azɔ minyẽ kɔ kpɔ megbe tso egbe dzi, esi womekpɔ tsɔ kpe ɖo kpe dzi le Yehowa ƒe gbedoxɔ la tutu me haɖe o:

¹⁶Ɣemaɣi la wova lu bablakɔa ɖe, si anye nudotree blave la gbɔ, ke wo ame ewo ko wònɔ; wova weinfiãƒe, be woaku goe blaatɔ̃, gake wo ame blave ko wònɔ.

¹⁷Mehe to na mi ɖe miaƒe asinudɔwɔwɔwo katã ŋu, ale be miaƒe bliwo hlɔ̃, eye wodze heteku, eye dzikpewo dza; gake miegbe tɔtrɔ ɖe ŋunye, Yehowa ye gblɔe!

¹⁸Minyẽ kɔ kpɔ megbe tso egbe, dzinu asiekelia ƒe ŋkeke blave vɔ enelia dzi vaseɖe gbesigbe woɖo Yehowa ƒe gbedoxɔ gɔme anyi la dzi; milé ŋku ɖe eŋu:

¹⁹De nukuwo tsi ava mea, eye ɖe wein kple gboti, yevuboɖati kple amiti wogbe tsetsea? Made yayra aƒe tso ŋkeke ma dzi.

²⁰Eye Yehowa ƒe gbe va na Xagai zi evelia, le dzinu la ƒe ŋkeke blave vɔ enelia dzi bena:

²¹Gblɔ na Yuda ƒe anyigbanunɔla Zerubabel bena: Mele dziƒo kple anyigba ʋuʋu ge,

²²mamũ fiaɖuƒewo ƒe fiazikpuiwo aƒu anyi, eye miatsrɔ̃ dukɔwo ƒe fiaɖuƒe sesẽwo, mamũ tasiaɖamwo kple wo me nɔlawo aƒu anyi, sɔwo kple wo dolawo adze anyi, eye amesiame atsi ehavi ƒe yi nu.

²³Ale Yehowa Zebaot gblɔ esi: Ɣemaɣi la matsɔ wò, nye ɖɔla Zerubabel, Sealtiel vi, awɔ ŋkɔsigee; elabena wòe metia, Yehowa Zebaot ye gblɔe!